رواية الدم (١)
مجاهد يوسف
التوم ود حسب الرسول حلتهم جمب البحر وشغال ببيع الشوالات عندو حمار مكادي كدي سمح خلاس اشتراهو من العاقب ود علي ولا كمل ليهو قروشو ، يوماتي بشد حمارو وبلف بالحلال يلقط الشوالات الفاضية وبعد تكتر عندو بشيلها السوق يبيعها فوقو وهو زول كلس خلاس وحقاني علا كان متلقي حجج وبتحشر في البخصو والما بخصو لكن تاب من التحشر من يوم اتدخل بين سليمان ود الضو واخوه عبد المحمود اولاد خالتو كانوا متشكلين ومتخاصمين زمن قعد ينقل في الكلام يشيل من دا ويودي لي دا وكان بكره سليمان علا ما بين ليهو وسليمان لمن عرفو خنقو في القيفة وكان داير يغرقو لكن الناس حجزوهو منو ومن ديك خاف بقى في الليلتو والتحشر زاتو خلاهو
خالتو ام ناس سليمان دي عندها بت نجيضة خلاس وسميحة اسمها الرضية ورضية زي اسمها التوم بدورها وناضم فوقها علا سليمان الوحيد الوقف ليهو وابى يديها ليو
وبقى في شغلتو يلملم في الشوالات ويبيع فوقن لمن يوم في حلة من الحلال القريبة منهم ناغمت ليهو بت سمحة خلاس مشى ليها ومرقت ليهو ستة شوالات ألات عيش جداد علا مقدقدن الفار وهو متره فوق البت وشاف القديد لكن شالن منها واشتراهن منها بأكتر من حقهن لمن هي قعدت تتكشم وانبسطت منو شديد قام قال ليها جيبي لي موية يا بت عمي النهار حار وانا وحماري عطاشة ، دخلت وملت ليهو الجك ظت ومرقت الطش وجرت الخرطوش وهو قنب يصفر للحمار ومتره في البت عجبتو عجب شديد علا ما وراها وبقى يوماتي يجي حلتن وحارس شارع بيتهم ويكورك بطول حسو العندو شوالات العندو شوالات وهي نهائي ما مرقت ليهو وقلبو وجعو تب بدور يشوفها بأي طريقة وما لاقي
تم اللسبوع ما شافها ولا فات من شارعهم والتوم لمن اتضايق تب قام دق الباب حقهم واسمها ما بعرفو
اليوم داك فتح ليهو الباب ابوها راجل وقور والشهامة والرجالة والكرم باينات فوق وشو للما بعرفو
_حبابك آ سيد الشولات اتفضل ابقى داخل
والتوم ولا كضب توشك دخل وابوها فتح ليهو الديوان وفات جاب ليهو موية وقال ليهو اجيب ليك فطور ؟
_لا لا فاطر الله يزيدك من كرمو علا رامياني الجبنة
ابو البت فات كلم اهلو يعملوا ليو الجبنة وجاء قعد معاهو
_الواضح ما فاضح آ عمي وانا ان داير الصدق مي جايباني الجبنة بس والله والجايبني غرضن تاني
_حبابك تب ووصلت لكن ان ما شربت الجبنة ما تقول غرضك وان بقدر عليهو حرم غرضك مقضي تب ارقد قفا
التوم شرب الموية وجابوا ليهو الجبنة شرب البكري والتني والبركة وقعد يتنحنح
_غرضي يا حاج قبل كم يوم جيت بي هني وناغمت لي بت مرقت من بيتك دا واشتريت منها ستة شوالات وجابت لي موية سقتني وسقت حماري كتر خيرها
_آي دي النعمة بتي
_اها انا البت دايرها علي سنة الله ورسولو
ابوها سكت مسافة والتوم قال ليهو انا اسمي التوم ود حسب الرسول ود الطيب من حلة الشيخ العلي البحر شغال شوالات بس ما عندي شغلة غيرها اسعل مني اي زول في حلتنا ان قال ليك فوقي كلام
ابو النعمة عاين فوق التوم مسافة وقال ليهو انت سعلت مننا ؟
_لا لا ولا بدور اسعل الجواب بكفينا عنوانو وغير الكرم ما شفت منكم شي
ابو النعمة سكت مسافة وقال ليهو ...
يتبع...
