#الدم (٨)
مجاهد يوسف
التوم وعلي دقوا الباب مرتين تلاتة بس مافي زول من اولاد اللغيبش في البيت وحسهم زاتو ما في ووالتوم ينهز في الباب بعكازو نهز قام علي قال ليهو الناس ديل ما ظنيتهم في وبيتهم دا فاضي ما تتعب يدك ساي بالدق ورجعاكا علي اهلنا
_ طيب بكونوا فاتوا وين ديل ؟
_علمي علمك وزاتو احسن اننا ما لقيناهم
_مالك خايف منهم ؟
_لو خايف ما كان جيت معاك من هناك ، مالك آ التوم أخوي بتطعن فيني بكلامن يفور فوق دمي كدي
_العفو العفو يا علي اخوي بهاظر معاك ساكت ، ما اهاظر ؟
اولاد اللغيبش بعد ما جاهم اخوهم الطيبان داك ومرقوا كاسوا لعلي وما لقوهو ، اول ما رجعوا البيت جاهم خبر وفاة ابو خلف الله وكلهم ركبوا فاتوا ، عشان كدي ديل ما لقوا زول في البيت ورجعوا علي حلتهم
حسب الرسول ودع سعد وراجع علي الحلة قام سعد قال ليهو امش جيب ولدك وتعال قنب هني الخرطوم كبيرة وواسعة وسمحة
حسب الرسول قال ليهو الفيها الخير ربنا يسويها
_انا بنتظرك وبديك كم يوم لو ما جيت بجيك في حلتك الانت فوقها دي
_كم يوم شنو يا حاج انت قايل المرقة من الحلة والرحول كدي ساكت ساهل
_مو ساهل وانا مجربو ما تكلمني بيهو ، علا بقى ضروري واجباري
_البجبرني عليهو شنو ؟ ان علي اولاد اللغيبش حرم ما بمرق اخلي ليهم الحلة ، وجيتي وفتيشي ليك انت خابر لشنو مافي داعي نعيد النضمي ، زي ما مشيت للفضل في الصعيد هدا جيتك في السافل والعلي عملتو
_فعلا عملت العليك وابقى عشرة علي روحك وولدك
_لا لا ما تخاف علي ، يللا انا فايت ودعتك الله
_الله يوصلك بالسلامة
حسبو وصل الحلة ولقى التوم مقلق وزهجان وغالبو البسويهو وقال ليو مالك طولت كدي شفقتني عليك ما قلت يومين تلاتة
_بعد جيت من الصعيد مشيت علي السافل عندي زول كان لزوما الاقيهو ولاقيتو تب الحمد لله
_انا طبعا عرفت القصة كلها لكن ما بالتفصيل وسمح الكلام في خشم سيدو يا ابوي
_الكلمك بيها منو وانا ما قلت ليك ما تمرق من الحلة دي الا بعد انا اجي ؟
ما مرقت وكلمني بيها علي صاحبي مرق في حلة ود النعيم عرف القصة وجاء قالها لي
_بحكي ليك كل شي بس ما هسع
_متين نان ؟
_انا قصتي غير السمعتها دي ومافي زول عارفها اديني فرصة كم يوم وبراي بحكيها ليك ان شاء الله
_عديلة تب وعلي كيفك يا ابوي
اولاد اللغيبش بعد دفنوا ابو خلف الله قعدوا ليهم يومين وقبال التفرقة الباقر قال لخلف الله وابراهيم انا ماشي الحلة الفوقانية انتهي ليكم من قصة حسبو اب قطعة دا نهائي
ابراهيم قال ليهو قنب لمن نرفع الفراش ونمش كلنا مرة واحدة
_انا قصدت اكتلو اليوم عشان الناس كلهم عارفني انا هني وبكتلوا وبجي راجع
_سوق معاك زول ما تمش براك
_لا لا لا دي شغلانية حقتي براي بس ، وكف كرف بخطفها سريع سريع واجي راجع
_يللا اتوكل وامرق من هنا بي ضرا ما تخلي زول يشوفك
_ما بتوصى تب وما تخاف انا برجع في ليلي دا سريع سريع
سليمان ود خالة التوم من زمن شكلتو مع التوم ديك والقال ليهو بتتحشر وتنقل في الكلام زي المرة وهو شايف روحو ارجل من التوم وبخوفو عشان التوم ما كلمو وسكت ليهو ساي
سليمان من اليوم داك حارقو كلام علي صاحب التوم شديد والمغيرب كدي جاء للتوم في البيت وقال ليهو دايرك في موضوع
_احكي يا ود الخالة خير في شنو ؟
_بحكي ليك بس ما هني ورح كدي علي الكتر وللا علي الترعة
_موضوع شنو دا البنمرق ليهو من الحلة دا ؟
_مالك خايف مني ؟
_البخوفني منك شنو ؟ ورح ورح والله لو في سقط لقط معاك
علي جاء للتوم ما لقاهو وابوهو قال ليهو شوفو عند ناس خالتو جاهو سليمان هني قبل شوية وفات معاو
والليام ديك القمرة مافي والفجة كانت مضلمة شديد سليمان والتوم وصلوا لحدي الكتر قام سليمان وقف والتوم قال ليهو اها مرقنا تب من الحلة احكي وسليمان تااااح قشط التوم كف وقال ليهو يعني انت وعلي الحيوان الكان اول امس معاك عاملين لي فيها رجال ؟
التوم اكل الكف ساي وقال لسليمان هسع جايبني من هناك للكلام دا ؟
_جايبك عشان ادقك هنا واوريك انك ما راجل ولمن تجي تتراجل ما تتراجل علي زول ارجل منك
_حاضر يا ود خالتي تاني ما بتروجل زاتو ، يللا رجعاكا علي الحلة
_رجعاكا شنو انا لسة ما دقيتك وما بترجع بحلاتك دي وبعد ترجع دايرك تجيب لي صاحبك علي الحيوان داك هنا عشان ادقو برضو
_ياخ مافي داعي قلت ليك انت ارجل مني خلاس ورح
وسليمان تاني ضرب التوم والتوم قال ليهو خلاس ياخ انت راجل ومافي زول ارجل منك وانا خايف منك ياخ ووالله لو ضاربتني لبكرة يدي ما بمدها ليك
_لانك ما راجل بس
_صاح ما راجل يللا ورح علي الحلة
_امشي براك انا باقي لي علي والليلة برضو بأدبو وبكفتو اجري وناديهو معاك يجي بسرعة
التوم ما اشتغل بيهو ورجع البيت لقى ابوهو مطعون في كتفو بسكين وجرى جاب ليهو عربية ورفعوهو فوقها وأكان معاو علي صاحبو وجروا بيهو المستشفى
يتبع
