#الدم 15
مجاهد يوسف
ابراهيم سمع من ود الباقر اخوهو انو الضابط دا قبال ما يجيهم شاف عربيتو قدام دكان السر وواقفة من قبل العصر وتاني شافوا مارق معاو من الديوان قام ابراهيم طوالي فات لحاج السر في دكانو وقال ليهو الضابط خالد دا بتعرفو من وين يا حاج ؟
_الضابط خالد منو ؟
_الزول الكان موقف عربيتو قدام دكانك قبيل دا ما الضابط الماسك قضية الباقر اخوي
_ما بعرفو والله بس جاني هني قبال العصر وقال عابر طريق وسقتو البيت اتغدى معاي
_ سعلك من شي ؟
_شي زي شنو ؟ كنا بنتونس ساكت نحن
_ما سعلك من الباقر اخوي ولا مني ؟
_ولا جبنا سيرتكن زاتو وونستنا كلها كانت ونسة عادية ساي
_قول لي الكلام القلتوهو جت
_ابراهيم امش علي شغلتك انا ماني فاضي قت ليك ما اتكلمنا فوقكن ولا بقول ليك القلناو
_كيفن ما بتقول لي القلتوهو
_والله دا كلام غريب اي ضيف يجيك انا قاعد اجيك واسعلك من الكلام القلتو ليو والقالو ليك ؟
_بس دا مو ضيف عادي دا ضابط آ حاج وبحقق في جريمة وانا لزوم اعرف قال ليك شنو
_قلت ليك ما اتكلمنا فوقكن خلاس بس لحدي هني
_طيب آ حاج السر بقيت تتلامض علي انا كمان
_انت منو يا العوقة دا كمان ، والله عشنا وشفنا ود بلة اللغيبش بقى يرفع في صوتو
_مالو ما برفع صوتو والله الحلة دي انا اكان ما خليتها ترجف كلها اكون ماني ابراهيم
_امش ها ما تخليني انضم ساي والله انت الحبة ما تعملها ولا عادنك زول
_سمح آ السر بنشوف وبتندم علي كلامك دا
ابراهيم فات زعلان تب وصل بيتو وقال لود الباقر تعال دايرك في شغلة
ود الباقر قال ليهو حاضر يا عمي
ابراهيم قال ليهو بدور أمشي بيت خلف الله خالك الوراء داك وانت تمشي الكمبو في واحد هناك اسمو برهان بتعرفو ؟
_آي بعرفو برهان الضب ، اها؟
_تقول ليهو قال ليك ابراهيم عمي تجيني في بيت خلف الله
_سمح يا عمي
_ود الباقر مشى الكمبو ولاقى برهان الضب زول مقتل وقصيروني وشين خلاس عيونو حممممر سكران لط وواقف لمبة كلمو بكلام عمو والضب طوالي فات وقال لود الباقر اقعد اشرب انا هسي بجيك نشرب سواء ود الباقر قال ليهو انا ما قاعد أشرب
برهان ضحك وقال ليهو في راجل ما بشرب والله ابوك اكان بقوم بالقزازة بفد نفس اشرب ساي وود الباقر قعد يشرب
عمر ود اللغيبش سمع انو ابراهيم ود الباقر رسلو ابراهيم عمو الكمبو كلمو اخوهو الصغير وطوالي مشى لحقو بس م صادف برهان الضب لكن كاس لود اخوهو لمن لقاو ولقاهو سكران ويجغم في العرقي دقاهو دقة حارة خلاس وساقو معاهو وقعد يفتش لابراهيم اخوهو لمن لقاهو هو وبرهان في بيت خلف الله الوراء وكان سايق معاو ود اخوهو وقال لابراهيم ابعد من اولاد الباقر ديل ما ترمدهم زي ما انت مرمد عاين ليهو سكران كيف
ابراهيم قال ليهو مالو ما يسكر ما راجل وارجل منك
_الرجالة بالسكر
_الرجالة الزول يعمل الدايرو فك الولد دا ما عندك بيهو شغلة وساق منو ود الباقر وطرد عمر
عمر ابى يخلي ود الباقر وجراهو جر لمن ود الباقر قال ليهو مالك ومالي ما اسكر انا داير اخد دم ابوي وانا راجل ما شافع وكل يوم بسكر
عمر حمر لابراهيم اخوهو وفات
وصل بيتهم وقال في نفسو برهان الضب الحرامي دا الجابو بيت خلف الله شنو ؟ اكيد ابراهيم دا ناوي يعمل ليهو مصيبة لكن ما بخليهو انا والله
عمر رسل ولد اخوهو قال ليهو تمشي لمحمد واللمين اصحابي تلقاهم في بيت ناس اللمين قول ليهم عمر عمي قال ليكم تجوني هسي في البيت وبعكاكيزكم
اللمين ومحمد اول ما ود الباقر كلمهم جوهو جارين جري
اللمين قال ليهو خير آ عمر
_خير تب بس ابراهيم اخوي جاب برهان الحرامي في بيت خلف الله وانا حاسي انو دايرو لمصيبة عشان كدا ناديتكم
محمد قال ورحكم ليهو في الكمبو نهبدو قبلو بس
_لا لا نراقبو نشوفو دايرو يعمل شنو اول عشان نقبضو متلبس لو هبدناهو ساي ما بورينا
ابراهيم قال لبرهان دايرك تسرق بيت السر ودكانو اللتنين ودايرك تضربو تعوقو بس ما تكتلو والبتسرقو كلو ليك وفوقو بديك مليون
برهان طوالي وافق بس ابراهيم قال ليهو عمر اخوي دا شافك معاي فما تسرق الليلة خليها بعد تلاتة يوم ونحن زاتو بنراقبو
برهان رجع الكمبو وعمر واصحابو مراقبنو
اليوم الاول من كمبوهو ما مرق وراقبوهو اليوم التاني برضو ما مرق
بهناك خالد الضابط مشى الحلة حقت ناس الطيب نسيب السر الغرق
وصل هناك وقعد يسأل من اصحاب الطيب الناس قالوا ليهو الطيب دا كان زول حبوب والناس كلهم اصحابو لكن اكتر واحد مصاحبو الصديق ود خالو
والضابط مشى للصديق في بيتو سلم عليهو والكلام دا اكان المغيرب والصديق جاب الشاي وقال للضابط ما عرفتك
_انا اسمي خالد ضابط شرطة
_مرحب مرحب
_جيتك بسأل عن الطيب ود عمتك الله يرحمو ، الزول دا مات كيف؟
_مالك داير تقلب علينا المواجع ، مات غرقان في الترعة
_ ما بعرف يعوم وللا شنو هو ؟
_والله كمان اكتر زول عوام ، لكن في شنو يا جنابو
_مافي شي بس انا بحقق في جريمة في حلة النعيم و. .
الضابط كلم الصديق بكل شي والصديق قال ليهو انا اصلو ما رضيت انو يندفن لكن ابوهو القال يندفن وكنت متأكد انو ما مات ساي
وقال للضابط انا معاك للطيش
بهناك برهان تلاتة يوم ما مرق من الكمبو لمن اللمين ومحمد قالوا لعمر ياخ اديتنا السهر ساكت وقنعوا التلاتة من مراقبتو ومشوا قعدوا في ديوان اللمين
الصباح دكان حاج السر وبيتو اللتنين انسرقن وحاج السر مضروب في راسو فاقد الوعي وجروا بيهو المستشفى
عمر واللمين ومحمد التلاتة مشوا الكمبو لقوا برهان الضب سكران ونايم وحلف انو من بيتو ما مرق
يتبع......
