#الدم ١٣
مجاهد يوسف
الفضل بدا يحكي في قصتو للضابط خالد وقال ليهو قبال اخلي الحلة وافوت الصعيد اول حاجة انا كنت زول بتاع سكر وما السكر العادي داك لا لا السكر الكعب تب واليومي وكنت بسكر لمن ما بفرز القدامي منو وعديت لي فترة طويلة اكان عطشت ساي وما جنبي عرقي بتكون جمبي مريسة والموية ما قاعد اختها فوق خشمي لكن الحمد لله الله هداني وتبت منو توبة نصوحة وحلفت منو نهائي من كتلة بدري ود اللغيبش ما شربت ،اتوضيت وجبت كتاب الدين وختيت يدي فوقو وقلت تاني في خشمي ما بختو وعليها من الزمن داك
و بدري دا توم الباقر الاتهمو فوقو اب قطعة دا اكنا انا وياو ما بنتفارق كلو كلو علا يفرقنا النوم واليوم الانكتل فوقو اكنا سوا
_يعني انت عارف الكتلو
_ ما عارفو ولا شفتو لكن شاكي في واحد وبوريك ليو
_كدي احكي لي بالتفصيل من اللول الحصل شنو
_سمح ، اها اليوم داك اكنت قاعد في اللبخة الجمب دكان السر في نص الحلة جمب الشبخانة ومنتظر بدري التوم ود اللغيبش جاني وفتنا علي الكمبو عشان نسكر وحسب الرسول دا برضو اكان صاحبنا لكن ما زول سكر الا تكون في حفلة وللا مناسبة وما زول سكر زينا ولا ببارينا لكن صاحبنا واليوم داك بعد قطعنا الترعة بالرزقالة لاقيناهو ماشي علي حواشات عمو التوم وسلمنا عليهو وعارفنا ماشين نسكر يومي احنا بنمشي والحلة كلها عارفانا اللتنين مرمدين وسجمانين قام وقف معانا شوية وقعد ينصح فينا ونحن ما اشتغلنابو وخليناهو قال الدايرو تب ضحكنا وكملنا مشينا
ابراهيم ود اللغيلش ومعاهو خلف الله الكليب برضهم لاقونا وكانو مبارين اب قطعة وتابعنو لا اشتغلوا بينا ولا نحن اشتغلنا بيهم بس في واحد شراني كدي اسمو برهان ناس حلته مسمينو الصامت عشان كلامو ما كتير مشوا هم وقفوا معاهو مساااافة واشروا ليهو علي حسب الرسول انا لمن شفتهم معاهو قلبي اكلني ما اكضب عليكم بس ما وقفت وكملنا مشينا انا و التوم ود اللغيبش واتلفت ساكت لمن وصلنا الكمبو وملينا راسنا لكن انا ما شربت اليوم داك كتير وكنت ما مرتاح بوقفة ابراهيم والكليب مع برهان مرقت خليت التوم في الكمبو يشرب ومشيت لحسب الرسول احذرو
_تحذرو من شنو ؟
_ما عارف لكن وقفة ابراهيم وخلف الله مع برهان دي ما ارتحت ليها خاصة لمن شفتهم اشروا ليهو علي حسب الرسول
_اها كمل
_مشيت لحسب الرسول ومع مرقتي من الكمبو لاقاني الصامت زاتو داخل الكمبو ولا كلمني ولا انا كلمتو لكن باريتو لمن دخل وقعد يسكر حتين مشيت لحسب الرسول لكن ما لقيتو في الحواشة وجريت الحلة افتش ليو وبرضو ما لقيتو وتاني انا مشيت علي البيت ما عارف لشنو اها بعدها بمسافة سمعت النضمي حق الناس وقالوا ود اللغيبش انكتل وما صدقتهم الا لمن شفتو ملان دم ومطعن ومشيت لحسب الرسول قالوا ضرب الباقر توم بدري لقيت معاو سعد دا لكن ما دخلت عليهم ومرقت كايس لبرهان الصامت ومن اليوم داك تاني لا في زول شافو ولا في زول سمع عنو حاجة
_يللا المرقك من الحلة شنو ووداك الصعيد؟
_مرقت كايس لبرهان وكل العرفتو لمن قعدت اسعل انو من الصعيد عشان كدا مشيت الصعيد
_ولاقيتو ؟
_ما لاقيتو كلو كلو ولا عرفت ليهو اثر لاني كايس ليهو وما بقدر اعرفو الا لمن اشوفو المشكلة الصعبت علي ملاقاتو اني لا بعرف اسم ابوهو ولا بعرف هو من وين وهناك مافي زول بوريك زول اكان ما عرفوهو ود منو ومن ياتو فجة عشان كدا قعدت قبلي كايس ليهو وكلو كلو ما لميت فيهو
_انت داير بيهو شنو ؟
_شاكي فيهو انو هو الكتل ود اللغيبش ومتأكد
_الخلاك تشك وتتأكد انو برهان الكتلو شنو ؟
_لاني لمن قعدت اسعل منو اول حاجة مشيت الكمبو وسعلت منو هناك وعرفت انو اليوم داك كان شايل ليهو سكين وسكر لمن بقى يترتح ومرق تاني ما في زول شافو
_ولا لقيت ليهو اثر في الصعيد
_اسم برهان دا هناك كتير آ جنابو والصامت دا مسمنو ليهو ناس حلتنا ومافي زول بعرف اسم ابوهو
_طيب اهلو مافي زول جاء يسعل عنو
_انا تاني ما رجعت الحلة الا بعد زمن رجعت عرست بت عمي وسقتها معاي والقعاد في الصعيد نفع معاي والله اكرمني اشتغلت وعملت لي دكان الحمد لله وبقر وغنم وانشغلت في حالي لمن جاني حسب الرسول
_وحسب الرسول عرفك كيفن هناك
_يوم جاني سعلتو نفس السوال دا وقال لي لو ما خابرك ما كان جيتك وما وراني الوراهو محلي منو وانا كنت فرحان بشوفتو ما كترتو معاهو
_يعني يوم انكتل بدري ود اللغيبش برهان اختفى ؟ طيب حسب الرسول لو ما كتل ود اللغيبش ابراهيم اتهمو لشنو ؟
سعد ود امحمد قال ليهو خليني اجاوبك انا لاني السبب في مرقت اب قطعة
_اها جاوب
_حسب الرسول اكان داير ليهو بت و ابراهيم برضو اكان دايرها فاتهامو ليهو ومرقتو من الحلة بقت ليهو في صالحو وكان قاصد كدي ودي الزعلتني انا منو وخلتني افوت افتش لحسب الرسول
_وابراهيم عرسها ؟
_قالوا ابتو واخدها واحد من برة الحلة ورحلها حلتهم لكن السمعتو قالوا ما قعدت معاهو كتير راجلها مات غرقان في الكنار وقالوا عندو منها ولد هسي بقى كبير ولمن رجعت الحلة ابراهيم تاني مشى طلبها وتاني ابتو تاني خلاها
_وراجلها غرق كيفن امكن ابراهيم كتلو ؟
_الله اعلم ، معقول يكون هو الغرقو ؟ والله دي تبقى مصيبة
_راجلها اسمو منو ومن ياتو حلة ؟
الفضل وسعد اي واحد قعد يعاين في التاني وقالوا للضابط والله بالضبط ما عارفين لكن لو رجعنا الحلة بنعرف
الضابط قال ليهم ما ترجعوا الحلة ولافي زول يعرف كلامكم القلتوهو لي دا وامشوا علي اهلكم وبيوتكم وما تجوا هنا ولا الحلة وانا لو درتكم برسل ليكم بس هسي وروني المرة دي اسمها منو
قالوا ليهو اسمها بتول وابوها السر سيد الدكان ومرقوا منو وقبل يفوتوا جوهو تاني قالوا ليهو دايرين نسلم علي حسب الرسول لو ممكن والضابط رسل جابو ليهم سلموا عليه قام حسب الرسول قال للفضل الزول ابراهيم العولاق دا انا لمن جيتك في الصعيد ما قلت ليك كلمو يبعد مني ؟
الفضل قال ليهو اولاد اللغيبش ديل انا لي منهم زمن طويل ما شفتهم وانا صاحبي وصاحبك بدري اخوهم المرحوم علا لا ابراهيم لا الباقر ما عندي معاهم علاقة
حسب الرسول قال ليهو بلسانك يا الفضل ما قلت لي هم جوني قبال حول وسعلوك عني
الفضل قال ليهو صاح قلت ليك كدا وما صدقتك القول وكنت دايرك تعمل حسابك منهم بس ما كان قصدي شي تاني
الضابط قال لحسب الرسول انت عرفت مكان الفضل دا كيف في الصعيد ؟
_سمعتبو ساكت قبل فترة كنت بمشي الصعيد وصادفت مرة واحد بعرف الفضل دا والكلام جاب الكلام وهو لمن قلت ليهو انا من حلة النعيم وراني بالفضل ووصف لي فجتو وانا مشيت ليهو لمن ظهروا لي الناس البجم ديل
_انت كنت مندس منهم ؟
_ ما مندس ولا شي بس البعد منهم خير لي وليهم
الضابط نادى العسكري وقال ليهو رجع حسب الرسول دا الحراسة وقال لسعد والفضل خلاس امشوا انتو وزي ما قلت ليكم
ومرقوا فاتوا والضابط فات حلة النعيم
يتبع...
