#الدم (٢٧)
مجاهد يوسف
خلف الله بعد لقى الديوان مبشتن والفجة كلها جايطة مرق يفتش للزول الكان معاهو في البيت ومشى علي الكمبو الجمبهم سأل منو هناك مافي زول قال شافو ولا في زول بعرفو رجع علي البيت في الطريق لاقاهو عمر ود اللغيبش قال ليهو مالك يا خلف الله ما علي بعضك ومرتبك كدا ؟
قال ليهو لا لا ما في شي
- مافي شي كيفن عاين لشكلك دا عامل كيف ؟
- قلت مافي شي يا عمر
- قبيل لقيت لي حرامي في بيتك ودقيتو دقة حارة خلاس لكن فلت مني وقام جاري
- ح حر حرامي في بيتي انا ؟
- آي حرامي مالك بتتمتم ما تخاف ما تخاف ما سرق شي لكن جراي جري شديد قدر ما جريت وراهو ما لحقتو
- ومشى علي وين
- كطع الترعة ودخل الحواشات بس الكويس انو ما سرق شي
- كويس كويس كتر خيرك يا عمر اخوي
- انت بيتك مطرف ربي ليك كليب يا خلف الله
خلف الله كلمة كليب دي زعلتو لكن اكلها ساي وفات وقال في سرو الله لا كسبك يا عمر حرم مافي كليب غيرك لكن أدبك عندي ما بخليك ما بخليك بس ما فاضي ليك هسي
عمر مشى لابراهيم اخوهو وقال ليهو الليلة صاحبك خلف الله بيتو قرب ينسرق لو ما انا . لقيت لي حرامي جوة بيتو دقيتو لكن فلت مني وقام جاري
ابراهيم طوالي مرق مشى علي بيت خلف الله لقاهو بهناك للترعة يفتش لزولو ومن شاف ابراهيم جاء علي بيتو جري
- كفارة يا زول عمر قال لي قبض ليهو حرامي في بيتك
- آي انا زاتي قال لي هسي انا مرقت افتش ليهو
- تفتش لمنو ؟
- للحرامي لانو عمر قال لي تلب الترعة ودخل علي الحواشات
حسب الرسول والمعاهو وصلوا الحلة الفوقانية والضابط مشى المركز وقال للعسكري جيب لي الزول القبيل
اول ما وقفوهو قدامو الضابط تاح قشطو كف وقال ليهو من غير ما استعمل معاك اسلوب كعب احسن حاجة توريني علاقتك شنو بخلف الله والجابك بيتو شنو ؟
قال ليهو داير اشاركو في الحواشة حقتو وجيتو في البيت لقيتو مارق فتح لي الديوان انتظرتو فيهو لمن يجي ومرقت مشيت الدكان اجيب لي سجار اول ما دخلت الديوان جوني اتنين لموا فيني ضرب وكهربوني
- خلف الله ما عندو حواشة لكن احسن توريني كل شي الراجل دا كلو بلاوي والكضب ما في صالحك
- انا عرفتو قبل كم يوم بس ما عارف عنو اي حاجة وانا زاتي هسي جبتوني لشنو هنا ما عارف لو ما مصدقني نادي خلف الله زاتو خليهو يوريك الحاصل ولو لقيت كلامي دا ما صاح اعمل الدايرو
الضابط قال للعسكري سوق دا قلع ليهو ضفرين من كرعيهو وضفرين من يديهو ولو ما اعترف قلع ضفورو كلهن واتلفت علي الزول قال ليهو اسمك منو انت قال ليهو اسمي علي لكن عليك الله ما تقلع لي ضفوري والله انا بوريك اي حاجة بس انا ما عملت شي
قال للعسكري خليهو خليهو ما دام داير يعترف أها قول
- انا علي صاح كنت حرامي قبل فترة لكن تبت وقبل تلاتة يوم جيت الكمبو القريب لحلة النعيم ولاقيت خلف الله فيهو قال لي دايرك في مهمة انا ما عرفت المهمة شنو لاني جيتي كدي دخلني في الديوان ومرق فات بعدها جوني اتنين دقوني وكهربوني بالوصلة وبعدها جبتوني هنا وانا زاتي ما عارف في شنو
الضابط قال ليهو انا بفكك لكن على شرط تتعاون معانا
علي قال ليهو طوالي ما عندي اي مانع
الضابط قال ليهو وبفكك هسي بس ما تقيف الا في بيت خلف الله شوفو دايرك في شنو وكلم الزول الدقاك بالحاصل كلو وهو بجي بوريني ولو ما اتعاونت معانا ما تلوم الا نفسك وفي اي وقت بجيبك
علي مرق وهو ما مصدق زاتو وطوالي مشى ركب المواصلات وفات حلة النعيم
ومشى طوالي لخلف الله في البيت لقى معاهو ابراهيم دخل وقعد معاهم
ابراهيم قال لخلف الله دا منو الزول دا ؟
قال ليهو واحد بفتش لشغل وانا بعرف ابوهو جاني قبل فترة قال لي أشوف ليهو شغل
- ابوهو منو دا ما اظن انت بتعرف ليك زول انا ما بعرفو
- لا لا دي معرفة قديمة شديد وقابلتو بالصدفة ساي قال لي برسل ليك ولدي شغلو اي شغل
- وانت داير تشغلو شنو ؟ لو ما عندك ليهو شغل ما تقعدو ساي خليهو يمشي يترزق
ابراهيم فات وخلف الله طوالي مسك علي وقبقبو وقال ليهو مشيت وين انت ؟
- مشيت علي الحواشات جاني واحد دقاني وكهربني بالوصلة وقمت جاري منو تلبت الترعة ودخلت في القطن
- شفت الزول الكان معاي دا ؟
-آي شفتو مالو ؟
- دايرك تكتلو
- دا ما نسيبك وصاحبك ود اللغيبش ؟
- ما صاحبي ولا شي نسيبي لكن زول فقر خلاس وهو لازم يموت بس ما هني
- وين ؟
- عندنا بعد كم يوم مشوار كدا لحلة تانية اول ما نصلها اطعنو اكتلو واطعني انا برضو في كتفي طعنة خفيفة كدا وقوم جاري تاني ما تظهر نهائي وانا لمن ادورك بجيك
- نمشي متين ؟ الليلة ؟
- ما الليلة قلت ليك بعد كم يوم وهسي انت امش الكمبو ولمن نبقى مارقين بنجيك هناك خليك مستعد
- انت داير تكتلو لشنو ؟
- انت مالك ياخ ما تسعلني كتير اعمل البقولوا ليك بس امشي وما تجي الحلة دي تاني وما داير زول يشوفك هني
علي فات الكمبو ولقى عمر ومعاهو اتنين عساكر مرسلهم الضابط وراهم وكلمهم بكلام خلف الله القالو ليهو كلو وفاتوا منو كلمو الضابط
الضابط قال لعمر معقول خلف الله داير يكتل ابراهيم ؟
عمر قال ليهو يعني هو الكتل الباقر اخوي واحتمال كبير يكون هو الكتل بدري اخوي اعوذ بالله منو دا والله الليلة ما اخليهو
- دا شنو يا عمر انت كمان الزول العاقل
- لكن يا جنابو .....
- عمر ما تتهور خلينا نقبضو بالثابتة ونحن اول حاجة ح نعملها نخلي واحد من العساكر يقعد مع علي في الكمبو عشان الزول دا ما حدد لعلي متين بجوهو والدايرو منك تسكت بس كأننا ما عارفين حاجة ونخليهم كدا بس لمن نقبضهم
عمر قال خير لكن ممغوس من خلف الله الكليب
بالليل خلف الله ساق مرتو وداها بيت اللغيبش ابوها وقال لابراهيم انا قبيل كضبت عليك ساي وقلت الزول المعاي داك ولد صاحبي
ابراهيم قال ليهو اها دا منو ؟
قال ليهو دا واحد جايبو يكتل حسب الرسول ونحن بنمشي معاهو وبعد ما يكتل لينا حسب الرسول يطش يشوف ليهو بلد بعيدة من هنا بس داير قروش كتيرة قال
- قروش كتيرة شوية ما في مشكلة بس يكتل حسب الرسول ويريحنا منو
- لا لا بكتلو بكتلو تب
- انت برهان الضب وين الزول دا لي زمن ما شفتو ؟
- شن خبرني بيهو انا من يوم مرقتا من السجن ما فارقتك هسي الذكرك ليهو شنو الزول دا ؟
- نجيض ياخ واحسن لينا من الشفتو معاك قبيل دا
- دا برضو نجيض ما تشوفو كدا
خلف الله قال لابراهيم انا ماشي عندي كم شغلة كدا داير اعملها ومرق فات وصل
بيتو ولقى الصديق صاحب الطيب الكان متزوج بت السر سيد الدكان واقف قريب من بيتو
يتبع...
