#الدم (٢١)
مجاهد يوسف
عمر عارف ابراهيم اخوهو وخلف الله ديل قاعدين ليهم فوق راي لكن شنو ما متأكد منو بس المتأكد منو شديد انهم ما عملوا كدا ساي ولو بيدهم يمرقوا حسب الرسول الليلة اكان مرقوهو ويا في راسهم يكتلوهو او يكتلوا التوم ولدو
فات منهم ومشى علي اصحابو وبعد فات خلف الله قال لابراهيم فاروق اخوك دا مكيفاهو حركتنا دي ومصدق اننا عفينا
_اي شايفو شايفو متحمس للعفو شديد اصلا عمر دا كدي خملة ساكت من زمنو الصغير ، ما علينا منو ياخ
_اها وين ابراهيم ود المرحوم الباقر
_تلقاهو مشى يلعب كورة جنو كورة
_كورة شنو القايم فيها الجنى دا ؟ احميو ياخ تاني ما يشتغل بالفارغة نحن دايرنو ياخد تار ابوهو واكان عمر دا لما فوقو بخرب لينا رويسو
_لا لا ابراهيم نجيض تب ما تشيل همو طالع لي انا وما بخلي حقو
_والله دي احسن حاجة انت الزيك منو ياخ يا ضو القبيلة يا الجبل الما بتنهز يا شيال التقيلة
ابراهيم ضحك ما في زول بكيفو الا خلف الله دا عشان بريد الشكرة وقال لخلف الله السجن بقاك شاعر يا ابو النسب
_السجن كعب آ ابراهيم اخوي وبطير الفي الرويس والعجب الزنزانة ضيقة والواحد براو قرد ما معاو انا غايتو لو ما مرقت ما اكان قعدت لحدوت هسع حي ، البركة فيك يا ابو الرجال
_خاتنكم اي زول براو وللا ناس حسب الرسول معاك ؟
_لو معاي ما كنت لجنتو زمان ياخ وارتحنا منو ، لكن اي زول في حراسة براو شوف ساي بعيني ما شفتو
ابراهيم رسل ولدو بلة قال ليهو نادي لينا ابراهيم ود عمك الباقر دايرنو هسع
سعد بعد رجعتو الحلة وملاقاتو لاولاد اللغيبش قال احسن ليهو يجيب اولادو ويقنب في بيتو قبلو اخير ليهو من الخرطوم ومشى قعد ليهو كم يوم هناك وجابهم وجاء قنب في بيتهم عندهم بيت ابوهو كبير قاعدة فوقو اختو وراجلها براهم قعد معاهم وقال يقسم معاها البيت النص النص
ومرت الايام وسعد وعمر ود اللغيبش كل يوم طالعين ونازلين يمشوا للضابط خالد في شان حسب الرسول وولدو ومعاهم علي صاحب التوم ومرات بجي الفضل ود عباس من الصعيد واتفقوا اللربعة جابوا ليهم محامي وبقوا يساسقوا لمن قدروا طلعوا حسب الرسول وولدو من السجن وهم زاتم ما كان في دليل ضدهم لكن سجنتهم الضابط قصدها عشان ما يجي واحد من اولاد اللغيبش يكتل واحد فيهم وبعد شاف النفوس هدت تب حتين مرقهم
اول ما حسب الرسول مرق قال للضابط بندور نمشي حلة النعيم نشيل الفاتحة في الباقر ونقعد مع ابراهيم في بيتو نصفي النفوس
قال ليهو عين العقل وانا زاتي بمش معاكم
حسب الرسول شال ليهو عجل وساق التوم ولدو والضابط والفضل وسعد ود امحمد وعلي زاتو فات معاهم ولموا كبار الحلة ناس حاج السر سيد الدكان والناس الكبار وقصدهم يوم الجمعة بعد ما الناس صلوا كلهم فاتوا بيت اللغيبش
ابراهيم اصلو ما كضب مرقة حسب الرسول دي فرحتو زاتو وحمد بيها الله وما اداهم الشينة وقلد حسب الرسول قدام الناس والحريم زغردن
اليوم داك الحلة كلها اتلمت وابراهيم زاتو جاب عجل ضبحو وكم واحد جاب ليهو خروف والحلة التقول فوقها عرس
حسب الرسول لفاها بيت بيت ومشى لبنات التوم عمو ولاقى بتول بت حاج السر حبو القديم والناس كلهم اكانو فرحانين بجيتو دي ومبسوطين
الضابط قفل القضية علي كدا وكاتل الباقر ولا اتلقى بس ارتاح من كترة التحقيق
بعد اسبوع من جيتهم لحلة النعيم حسب الرسول قال للتوم بعد كدي تعرس واكان داير بت اللغيبش ورح عليهم وان قلت بت خالتك يكون احسن
التوم قال ليهو بدور بت خالتي اخير لي والله مالي ومال المشاكل
بت خالتو زاتها بتدورو ومافي عقبة قدامو غير سليمان اخوها قام فات ليهو كلمو وسليمان طوالي وافق واعتذر ليهو من الفات والحصل
التوم ساق ابوهو وسدوا مالهم في الحال وحددوا يوم العقد والعرس وما خلوا زول ما عزموهو حتى ناس حلة النعيم عزموهم
خلف الله قال لابراهيم الجنى دا دحين اول ما شفناهو ما كان داير بتك
_وان ما قال كدي نحن عرفناهو وللا عرفنا مكان ابوهو ؟
_مالو نان نط منها ؟
_هو زاتو خاف انا بديهو ليها ؟ والله بقى عاقل
_هسي اكان جاك
_حرم اطردو طردة الكلب انت يا خلف الله ماك نصيح ؟
_البركة الما جاء
_اريتو اكان جاء لكن عرفها والله اب قطعة عارفني ما بخليهو
_اها نمشي نحضر عرس ولدو دا وللا ما نمش
_ليه ما بنمش ؟ والله نمش مشي ونلاقي اب قطعة ونخت في الداعي عشان اصلو مافي زول يشك فينا ونلجن ليهو ولدو الفرحان بيهو دا في نفس اليوم
_دا الكلام البعجب زاتو حرم عافي منك يا ابو الرجال
_فرحتهم دي لومك علي اكان ما قلبناها ليهم بكاء
حسب الرسول مبسوط شديد وقال ناس حلة النعيم ما برسل ليهم الكروت مرسال ، الا اوديها ليهم بيدي وشالن وفات بيهن ليهم
عزم الناس الكبار جت وقيل مع سعد صاحبو واليوم داك كمان قابل حاج السر سيد الدكان مشى ليهو في دكانو وقال ليهو بعد ننتهي من عرس التوم ولدي دا انا داير بتول بتك يا حاج
حاج السر قال ليهو ان علي مبروك من هسي والقول قولها بعد كدي خليني اشاورها واوريك
قال ليهو شاورها وانا قاعد مستنيك في بيت ود امحمد
بتول وافقت بعد تردد كتير اول حاجة ابت لكن ابوها اقنعها ورسل لحسب الرسول جاهم لاقاها ودي تاني مرة يشوفها فيها بعد كم وعشرين سنة
يتبع...
