رواية الدم 29
الحلقة الأخيرة
مجاهد يوسف
عمر حمد الله انو ابراهيم ما عارف حاجة عن كتلة الطيب ولا شارك فيها مع الكليب وقال لي محمد صاحبو قوم ورح علي سعد ود امحمد نسوقو ونمشي هسي الحلة الفوقانية لي حسب الرسول في بيتو وهناك معاهو الفضل ود العباس وعلي هم اربعة ونحن ومعانا سعد تلاتة ونقوم السبعة نفتش لبرهان الضب ونقلب البلد دي قلب لحدي ما نجيبو وجيبتو بتكشف لينا كل الحقايق
محمد قال ليهو انا شايف احسن حاجة نكلم برضو الضابط خالد عشان البوليس زاتو يفتش معانا
قال ليهو بعد نمشي نجتمع هناك ونشوف راي الجماعة شنو
مشوا وساقوا معاهم سعد ودأمحمد الحلة الفوق وهناك عمر وراهم الكلام القالوا بلة كلو
واتفقوا يكلموا خالد الضابط
بهناك خلف الله قال انا ما كان اوري ابراهيم كتلة الطيب دي ما عارف عندي احساس زي الولدو بلة دا سمعنا
خلف رجع لي ابراهيم وقال ليهو نادي لي بلة ولدك وبلة اكان بتصنت ليهم جرى طوالي وعمل فيها نايم ابراهيم قال ليهو مالو بلة
_بلة دا انا قبيل مع مرقتي لمحتو ماشي بيت عمر اخوك وانا شاكي انو سمع كلامنا القبيل ومشى كلمو بيهو
نادى بلة وبلة قال ما سمعت اي حاجة وانا مشيت لي عمر عشان ابراهيم ود عمي الباقر قاعد معاهو بس
خلف الله ما صدقو وقال لابراهيم ورح لعمر اكان عرف كلامنا انا بعرفو
مشوا بيت عمر ما لقوهو قاعد قاموا فاتوا ليهو عند محمد صاحبو ومحمد اكان مكلم امو انو ماشي برة الحلة مع عمر لكن ما حدد ليها وين
وخلف الله قال اكان كدا مشوا لي ابقطعة في الحلة الفوق نحن نمش نتأكد اكان لقيناهو هناك معناتها عرف
ابراهيم قال ليهو بلة ما بكضب علي ورح نسعلو تاني وبلة كضب تاني وركبوا عربيتهم وفاتوا الحلة الفوق
لمن وصلوا هناك ابراهيم قال ليهو اها نحن جينا الحلة الفوق نمش نقول شنو ونعرفو كيف معاهم ؟
_انت بس قرب من بيت اب قطعة انا بتصرف
لقوا عربية الضابط خالد واقفة قدام بيت حسب الرسول وطوالي رجعوا وابراهيم قال ليهو اها دا الضابط زاتو معاهم
_اكان كدي انكشفنا
_انكشفت براك انا ما معاك في غرقة الطيب دي
_دا كلام شنو يا ابو بلة ؟
_اها الراي شنو هسع نعمل شنو في الورطة دي ؟
_لا ورطة ولا حاجة حلها عندي
ورجعوا الحلة
الضابط وجماعة حسب الرسول اتفقوا كلهم يفتشوا برهان الضب ويجيبوهو لو من تحت الارض
الضابط مشى الكمبو لي علي الكان قبضوهو قبال كم يوم وسألو من مكان برهان قال ليهو برهان دا ليهو فترة طويلة ما جاء هنا لكن العارفو ومتأكد منو انو في جهة الصعيد كدي
الفضل قال ليهم انا لو هو في الصعيد بطلعوا ليكم تب وفات الصعيد لانو عارفو كويس وعايش زمن فوقو ومشى معاهو التوم وعلي وعسكري
فتشوا ليهو ما خلو محل وقلبو ليهو الصعيد كلو ونهائي ما لقوهو ولا في زول قال شافو
بعد كم يوم الشرطة اعلنت انو برهان الضب لقوهو مكتول ومجدوع وراء بيت الصديق
والصديق الشافو وبلغ البوليس
ابراهيم لمن عرف برهان انكتل جاء لخلف الله يوريهو لقاهو عارف وقال ليهو خليهم تاني يمسكوا علينا دليل اكان عندهم
ابراهيم قال لي خلف الله يازول والله انا بقيت اخاف منك
_ هههههههههههه ياخ معقولة ياخ
_دي عملتها كيفن دي ؟
_ يازول والله بعيني ما شفتو
_اها الكتلو منو؟
_خليهو هسي دا ما وقتو
_حلفت عليك اكان توريني قول ساكت انا في بيتك ما سامعنا زول
_ بلة ولدك وين هسي ؟
_خليتو في البيت ما تخاف ساكت قول الكتلو منو؟
_كتلو علي الزول القبضو عمر اخوك في بيتي وقال حرامي اديتو مية ألف بس اول امس طوالي كتلو
الني للنار آبراهيم اخوي باقي لينا اب قطعة بس وانا لو قلت ليهو اكتلو بكتلو لكن تارنا ما بنأجر ليهو زول وبناخدو برانا
ابراهيم فات بيتو وقبل يدخل عربية البوليس وقفت قدامو ورفعوهو ومشوا رفعوا خلف الله برضو وجابوهم للضابط
خلف الله قال للضابط مالكم جايبننا هنا في شنو يا جنابو ؟
_انتو متهمين انكم كتلتو برهان
_برهان دا منو ؟
_يا عسكري نادي الشاهد
العسكري جاب ليهم علي وخلف الله نطط عيونو ونكر حطب قال علي زاتو ما بعرفو
علي اعترف للضابط وطلع المية ألف الاداها ليهو خلف الله والضابط قال ليهو ما قتل برهان بس وغرقة الطيب برضو كانت بسببك
خلف الله برضو نكر وقال الزول دا كضاب
الضابط قال للعسكري دخل الشاهد التاني والعسكري دخل ليهم برهان وبلة ود ابراهيم
خلف الله ماعندو تاني أي حجة وتم سكت
ابراهيم قال للضابط وانا قابضني مالي الجريمتين ديل انا ما عارف عنهن شي وعملن خلف الله براهو
برهان لمن علي لقاهو بلغ البوليس والضابط قال ليهو احسن حاجة تعترف لانو الاعتراف بخفف عليك العقوبة
برهان اول حاجة نكر لكن لمن عرف خلف الله دفع لي علي قروش عشان يكتلو اعترف طوالي
خلف الله قال لي ابراهيم ما تخليني ساكت وتفوت امش وكل لي محامي ابراهيم قال ليهو خير
لكن بعد عرف عمايلو دي كلها ابى يشتغل بيهو وقعد يتذكر في تحريضو للباقر اخوهو وليهو وكلامو وعمايلو الخبيثة كلها
بعد كم يوم خلف الله بالتعذيب اعترف بالعملو كلو
واعترف كمان بإنو هو الكتل الباقر يوم جاء طعن اب قطعة رسل وراهو برهان كتلو
الضابط قال ليهو والكتل بدري ود اللغيبش منو قال ليهو كتلو اب قطعة قام الضابط عصرو شديد في التحقيق لمن اعترف انو هو الكتلو
ابراهيم لمن عرف انو خلف الله هو الكتل بدري والباقر قال للضابط الا تواجهني بيهو
وجابوهو ليهو في المكتب ابراهيم قال ليهو ليه كدا يا خلف الله انا خاويتك السنين دي كلها لا قصرت معاك في شي ولا خالفتك في راي ليه تخون العيش والملح وتكتل اخواني وتطلع فعلا كليب والله الكلب وفي وأحسن منك وما بعضي اليد الوكلتو
خلف الله قال ليهو والله الدور اكان عليك وبعدك عمر داير اكتلكم واحد واحد
ابراهيم قال ليهو طيب ليه بس عملنا ليك شنو نحن ؟
خلف الله قال ليهو بيني وبينكم دم لانو بلة ابوك هو الاكل حق ابوي قلع ساكت وخلانا عايشين عيشة فقر وابوي مديني عدم العفو اكان ما اخدت ليهو حقو الشالو ابوك
ابراهيم قال ليهو لكن ابوي ما شال من ابوك شي وابوي الاراضي الورثها من جدي دي كلها حقتو وابوك ما اخوهو عشان يرث فيها
_ابوي من ساعتو الصغير مع جدك وبقول ليهو ابوي وعادي بلة زي اخوهو وواحد وماسك الحواشات والبقر والغنم كلهن وبعد وفاة جدك ابوك طرد ابوي شر طردة وقلع منو الحواشة ومرقو ساكت لا قرش لا تعريفة ومن الزمن داك قال لي لو ما قرضت اولاد اللغيبش ديل چت لا ولدي ولا بعرفك وان مت ما عافي منك
_اها والطيب المسكين داك مالو معاك كاتلو
_الطيب كتلتو عشان اورطك في موتو وتنسجن لكن بعد غرق قلت احسن اكتلك من تنسجن
وليه صبرت السنين دي كلها ما كتلتني
_صبرت لحدي ما لقينا حسب الرسول ابقطعة عشان يبقى لي شماعة وستارة ومافي زول يشك فيني
_طيب اب قطعة ذنبو شنو تخلينا نعاديهو السنين دي كلها ؟
_اب قطعة مشكلتو انو هو الجاب بدري اخوك لمن لقاهو ميت
_اعوذ بالله منك يا الكليب اعوذ بالله منك لا حول ولا قوة الا بالله
ابراهيم مرق ماشي الحلة الفوقانية لي حسب الرسول واول ما مرق لاقاهو جاي علي المركز مسكو قلدو وقعد يبكي معاهو وندم ندم السنين في العملوهو مع حسب الرسول
انتهت
