#الدم (١٧)
مجاهد يوسف
الضابط خالد اخد ليهو يومين اجازة وفات ساق اولادو ماشي علي حلتهم عندو ولدين صغار متزوج بت عمو وساكن في المدينة من يوم اتعين في الشرطة ضابط قرر ياخد ليهو اجازة يرتاح فيها من تعب الجري والشغل الكتير
في الطريق للحلة عندو صاحبو شديد اسمو حسن زمان اكان بقرا معاهو في الثانوي قال لمرتو نمرو في طريقنا نسلم عليهو ونشوف اخبارو شنو الزول دا انا طولت منو شديد
حسن بعد كمل الثانوي ساب القراية واشتغل في الزراعة وعندو دكيكين صغير عاملو في الحلة عايشو ما مخليهو محتاج لحاجة مع زراعتو
اول ما الضابط وصل بيت حسن ومع وقيفتو للعربية حسن جاهو جاري سلم عليهو ودخلو البيت وطوالي مشى علي الزريبة فنقل ليهو خروف وخالد مسكو
- يازول بطل عوارتك دي مافي زول قاعد ليك جيت اسلم سريع وفايت
- حرم ما تقول شي ياخ انت شوفتك عيد عديل كدا
- قلت ليك ما قاعدين
- ما قاعد ما قاعد انت امش لكن اولادك حرم ما بباروك اكان ما اكرمناهم
- لو عارفك بتعمل كدا ما كان مريتك
- والله البسمعك يقول كل يومين تلاتة بتمر ياخ ليك كم سنة ما جيتنا هنا وانا جيتك في الفترة دي تلاتة مرات
- انت ما براك عارف شغلتنا دي وتعبها كيف
- الله يكون في العون
حسن ضبح وخلى اخوهو يسلخ ومشى قعد مع خالد في الديوان يتونسوا
- عارف اليومين ديل ماسك لي قضية جنائية غريبة خلاس وفترت منها ساي ومن تعبها وجريها قلت امش اقعد لي يومين تلاتة في الحلة اروق شوية وارجع تاني ليها
- خلاس تقعدن معانا هنا ما بخليك تمشي
- لا لا بمشي والله طولت من الاهل داير اسلم عليهم واقعد معاهم شوية
- انت قلت يومين تلاتة بسون ليك شنو ديل
- اخير من الانقطاعة
- والله اخير لكن دي قضية شنو دي المتعباك دي عارفك شاطر وبتعرف المجرم من وشو
- المرة دي الموضوع شايك حبة وما عارف زاتو الحل حقها كيف اصلا واحد من حلة النعيم لو بتعرفها عندو اخوهو مات مكتول من فترة طويلة وكانوا متهمين ليهم واحد وداك ساب الحلة بدري اها لمن لقوهو فات اخوهو عشان ياخد تارو انكتل في رقبتو وما انعرف الكتلو منو
- اعوذ بالله الناس ديل الموت عندهم ساهل خلاس ياخ والله ما عارف الزول بقدر يكتل كيفن والله سبحانه قال كأنما قتل الناس جميعا
- فعلا والله الكتل دا كعب وخاصة مشاكل التار والدم دي شوف دا قريب عشرين سنة ما عفى ولا قال يسيب الكاتل لربو براهو بنتقم منو مشى ليهو مسافة بعيدة خلاس عشان يكتلو والمشكلة انو اتضح الزول المتهم بكتل اخوهو ما كتلو لكن قدرو كدا
- دا الجهل يا خالد اخوي والله والناس بعيدة من الخالق وعايشين في غفلة الواحد يكتل ساي كأنو مافي اخرة وحساب
- الشيطان والجهل الاتنين هم السبب وزي ما قلت الناس بقوا ما بخافوا من الحساب ياخ والله انا بشوف حاجات وقضايا لو قلتها ليك ما تصدق زاتو
في واحد قبل فترة كاتل ود عمو ونسيبو في غنماية زي دا تقول فيهو شنو
وللا واحد كاتل اعز اصحابو في بت قال بحبها وداك عارفو قام اتقدم ليها ولو شفت البت هههههههههههه ولا سمحة السماحة البتخلي الزول يكتل فيها صاحبو
والله الشرطة دي ورتني حاجات ومشاكل ياخ لمن الواحد بقى يخاف من اي شي وما يثق في اي شي والبلد دي بقت كلها اجرام
- انت عشان في الشرطة لكن كلامك دا نحن هنا ولا بنسمع بيهو
- ياخ واحد كتل اخوهو في مربوع حق ارض فاضي حق جدهم اتشاكلو فيهو دا اسمو شنو دا . ودا غير السرقات والضرب والاغتصاب وووو ياخ والله حاجات تخلي الواحد يعمل الف حساب لروحو ولاولادو
بهناك ابراهيم ود اللغيبش جاب ليهو محامي عشان يطلع خلف الله نسيبو ومشوا لقوا ضابط تاني في محل خالد نظر في التحقيق ولقى خلف الله دا ما عليهو اي شي ولا في شي بخليهو ينسجن قام طلعو بكفالة وتعهد انو ما يسافر اي فجة لحدي ما ينتهي التحقيق في القضية
خلف الله اول ما مرق قال لابراهيم انت ماك مسجون ؟
- البسجني شنو وعملت شنو انا عشان انسجن ؟
- ياخ الضابط خالد دا خبيث خلاس اتخيل قال ابراهيم مسجون واعترف انو انا وانت كتلنا الطيب راجل بتول بت السر
- يازول ؟ اوعك تكون قريت ليهو بشي
- انا اخوك يا ابراهيم , اقر كيفن واقر بشنو هههههههههههه الطيب دا منو زاتو ؟ والله لكن داير يعمل لي فيها حريف عرفتو انا والغريبة سعلت عسكري تاني قال لي انت مسجون برضو وليك تلاتة يوم
- داير يطلع منك بكلام ساي الضابط دا خبيث فعلا وكويس نحن الطلعناك
- ياخ ساجني ساكت برا سبب
- الله حلاك منو وانا قلت للمحامي ارفع فيهو شكوى عشان ساجنك ساي لكن المحامي قال لي من حقو يسجن اي زول يشك فيهو لانو دي جنائية
خالد بهناك اخد قعدتو مع صاحبو وفات علي اهلو في حلتهم
علي صاحب التوم زهج من السجن وهو زاتو ما عارف مسجون لشنو وشايف الضابط دا سجنو ساكت بدون اي سبب حتى الزيارات ممنوعين منها لا هو لا التوم ولا حسب الرسول
يتبع .....
