#الدم (١٢)
مجاهد يوسف
ابراهيم فات من المركز ولمن وصل الحلة لقى عمر اخوهو واولاد الباقر رفعوا فراش ابو خلف الله وفارشين في نفس ديوانهم علي الباقر والناس كلهم معاهم يشيلوا في الفاتحة والحلة مليانة عربات وحمير حقات ناس الحلال القريبة منهم جوا للعزاء ومع دخلتو الديوان الناس كلهم قاموا عليهو ورفعوا يديهم عشان يشيلوا معاهو الفاتحة
الفاتحة الفاتحة يا حاج ابراهيم وهو يديهو ما رفعن وقف يعاين في عمر اخوهو وقال ليهم الفاتحة دي في منو ؟
قالوا ليهو الفاتحة علي روح الباقر اخوك
قال ليهم الباقر اخوي ما مات
الناس استغربوا في كلامو دا ووقفوا قدامو ما عارفين يقولوا شنو زاتو قام واحد من الحلة قال ليهو كيف ما مات ا حااج
قال ليهم الباقر اخوي ما مات عشان تشيلوا معاي فوقو الفاتحة
كيفن ما مات في ناس قعدوا يوسوسوا بيناتهم وقالوا الزول دا الظاهر عليهو اتطرطش تب والصدمة دي مأثرة فيهو شديد
قال ليهم الباقر اخوي انكتل ما مات والكتلو يشمشم في الهواء وهو متوسد التراب وانتو جايين تعزوني فيهو ؟ انا اخوي الانكتل قبلو بكم وعشرين سنة ما فرشت عليهو ولا قبلت العزاء فوقو اجي هسي اقبلو في الاتكتل امبارح ؟ فكفكوا الصيوان دا يا جنوي وفرتقوا الفراش دا نحن ما عندنا عزاء هسع ان ما اخدنا تارو واولاد بلة اللغيبش ما ملطشة عشان يموتوا كلهم مكتلين
الناس اتخارجوا من الديوان وأي واحد فات علي حمارو وعلي العربية الجاء بيها بقوا ناس الحلة القاعدين
عمر قال لابراهيم الكلام دا اعوج يا ابراهيم اخوي
- اللعوج السويتو انت دا اخوك انكتل امبارح وانت ولا يهمك وان ما كتلنا اب قطعة مافي عزاء ولا بندق لينا صيوان
- الباقر اخوي مافي زول كتلو غيرك انت يا ابراهيم ولو باريناك عايلتنا دي كلها بتروح وبتتلقط واحد واحد اعقل اعقل انت الكبير الجهل ما حبابو
- مافينا زول جاهل غيرك لانك جبان وخواف ومرعة ماك راجل
- الرجالة ان بقت متل سواتك دي تطير فرررر وانا زي ما اتبريت من دم اخوي داك اخوي دا برضو متبري من دمو وهسي لو عرفت الكتلو ما بمد عليهو يدي
- امرق مننا اصلك من يومك خواف وما فيك فايدة
- اصلا مارق وقلتها ليك قدام ابوي انا ما معاكم في تار وهسي ما معاكم وقبل افوت اسمعوا كلامي دا كويس يا اولاد الباقر اخوي لو في زول كتل ابوكم ياهو عمكم دا لانو عشرين سنة شغال يوسوس ليهو في اضانو زي الشيطان اب قطعة كتل اخونا ودليل ساي علي كلامو ما عندو واب قطعة خلالو الحلة دي كلو كلو مشى يفتش فوقو لمن لقاهو وبعد لقاهو رسل بلة ولدو للباقر قال ليهو تمشي تكلتلو والباقر تبعو وسمع كلامو وهدا مات
- امرق مننا يا خملة وما تسمعوا كلام المرة دا يا اولاد اخوي ودم ابوكم فوق رقبتي دي لامن اموت
- طيب مالك ما كتلت اب قطعة بعد عرفت دربو جيت جاري للباقر ؟
- الباقر توم بدري يا عمر وهو الكان حالف ياخد تارو وانا ما بغلبني اكتل اب قطعة لكن الباقر اكان حالف القسم مافي زول بكتل اب قطعة غيرو
- دا كلام الجهل زاتو علي الجزيمة وانا فايت منكم ومن يوم الليلة ماني معاكم واشهدوا علي كلامي دا يا ناس الحلة وانتو يا اولاد الباقر اخوي اعقلوا اعقلوا ما تتابعوا كلام عمكم الخرفان دا مافي زول ضرانا غيرو هو ومعاهو خلف الله الكليب الاتنين ديل شرانيين وشواطين وما عندهم فهم
ابراهيم كلام عمر اخوهو دا حرقو بالحيل وتاح قشطو كف قدام الناس وعمر قال ليهو ياكا دي الفالح فوقها بس وان ماك اخوي الكبير يدك دي اكان كسرتها ليك لكن ما في عوجة تب وانا فايت وانتو تاني بقولها ليكم عمكم دا ما تباروهو في اللعوج
- اختانا بس انت ونحن بنعرف ناخد حق اخوانا
عمر مرق من الديوان وفات علي بيتو واولاد الباقر كانو تلاتة اولاد كلهم بقوا مع عمهم ابراهيم علا واحد بقولولو اللمين وهو اصغرهم واعقلهم مرق فات مع عمو عمر وابراهيم عمو قعد يكورك ليهو تعال يا اللمين تعال يا اللمين ما تبقى مريعة زي عمك
اللمين ولا اشتغل بيهو مشى لحق عمو
قام ابراهيم قال لابراهيم ود الباقر ودا اكبر واحد فوقهم امش جيب اخوك دا ما تخليهو يبقى زي عمر عمك
ابراهيم جرى مسك اللمين اخوهو وقال ليهو فايت وين وسايب دم ابوك ؟
اللمين قال ليهو كلام عمر عمي صاح وانا زيو وواحد ما معاكم في التار
ابراهيم جابدو ابراهيم عمو زيو في كل شي قام عمل زي عمو لمن كفت عمر وتاح قشط اللمين كف واللمين عاين فوقو ساي وقال ليهو بقول ليك زي ما قال عمي عمر لمن عمي ابراهيم كفتو ياكا الفالح في دي وان ماك اخوي الكبير يدك دي كان كسرتها ليك لكن مافي عوجة تب وانا فايت لاحق عمي عمر
بهناك الضابط في التحقيق جاب التوم ود حسب الرسول وقال ليهو انا عارف ابوك ما كتل الباقر لانو فعلا ما لحقو ولانو الزول دا انكتل بعيد من البيت وابوك ما الزول البقدر يباريهو وهو مجروح لحدي الفجة ديك وكمان ما في اثر دم غير دم الباقر وابوك كان مجروح ودمو دفق كتير وكلو في البيت
التوم قال ليهو نان مالك ساجنا انا وهو
الضابط قال ليهو سجنتكم عشان ديلك متهمنو وما داير بزعلتهم ديك يقوموا يتحامقوا ويطعنوا ابوك يكتلوهو عشان كدا ح تقعدوا معانا تاني كم يوم لمن النفوس تهدا
التوم مرق من الضابط والضابط دخلوا عليهو الفضل ود عباس وسعد ود امحمد وقال ليهم كملوا لي كلامكم القبيل
سعد قال ليهو زي ما قلت ليك قبيل قبل اكتر من عشرين سنة اولاد اللغيبش ديل عندهم اخوهم اتكتل وما بلغوا البوليس دفنوهو ساي ولا قبلوا ياخدوا فيهو العزاء وتهموا فيهو حسب الرسول اب قطعة دا
- السبب شنو الخلاهم يتهموا حسب الرسول ؟
- حسب الرسول اللقاهو ميت برة الحلة وشالو في كتفو لمن وصلو البيت وختاهو قدامهم وهم طوالي قالوا هو الكتلو اصلا البينو وبين ابراهيم ود اللغيبش وخلف الله الكليب ما كانت عامرة
- وحسب الرسول علاقتو شنو باخوهم المكتول
- علاقة عادية زيو وزي اي شاب من شباب الحلة واصحاب بس ما كانوا اصحاب شديد
- طيب المرق حسب الرسول من الحلة شنو ان ما كتلو ؟
- مرق بسببي انا دا واليوم داك جاني ابراهيم في البيت وقال لي حسب الرسول دا صاحبك وبسمع كلامك وانت اعقلنا فكلموا خليهو يمرق من الحلة لحدي ما النفوس تهدا شوية وبعدها يرجع وانا علي حسن نيتي مشيت كلمت حسب الرسول واقنعتو بالمرقة وهو ما كان راضي ومرقتو دي ابراهيم بعدها قال للناس اب قطعة هرب بعد كتل اخونا
- وليه ابراهيم عمل كدا ؟
- انا كلام ابراهيم دا زعلني شديد ومرقت برضي في قفاهو فتشت ليهو عشان ارجعو علا ما لميت فوقو وابراهيم اتاريهو ما أكان دايرو يمرق عشان يتهمو علا اكان حسب الرسول داير ليهو بت وابراهيم برضو أكان دايرها وهي ابت ابراهيم فقام قال كدا عشان اب قطعة يفوت والجو يبقى ليهو فاضي
- حسب الرسول ان ما كتل اخوهم الزمن داك مالو ما رجع تاني
-حسب الرسول جاء الحلة القاعد فوقها دي ولقى ليهو ناس رادوهو ورادهم وتاني ما قدر يفوتهم
- وامو وابوهو ما رجع ليهم لشنو
- امو وابوهو كانوا متوفيين وهو وحيدهم ما عندو اخوان وما عندو زول غير عمو التوم الله يرحمهم جميعا عشان كدا تاني ما رجع
الضابط بعد انتهى سعد من كلامو دا قبل علي الفضل ود عباس وقال ليهو انت قصتك شنو يا الفضل والمرقك شنو برضو من الحلة ؟
الفضل قال ليهو انا قصتي لو قصيتها ليك ولا بتصدقها
يتبع .....
