#الدم 11
مجاهد يوسف
ناس حلة النعيم واولاد اللغيبش جاهم خبر كتلت الباقر فوق الحلة الفوقانية العلي البحر زي الصاقعة وابراهيم اخوهو ولا صدق مع انو شاف الصورة واتأكد تب انو هو لكن برضوا ما مصدق لانو امس القريبة دي اكان معاهو وبتكلموا في مشيتو الحلة الفوقانية وابراهيم منعو واقنعو ما يمشي هسي والباقر اقتنع وسمع كلامو وقال لخلف الله الباقر دا الوداهو شنو هناك براو وانا قدامك قلت ليهو ما تمش
خلف الله قال ليهو الباقي عنيد انت عارفو لو خت المشي فوق راسو ما بقنب تاني
وصلوا مع الضابط المشرحة لقوهو ياهو والدم مالي هدومو ومطعن قريب ستة طعنات فوقن طعنة بي وراء في كلوتو والباقيات كلهن في بطنو وصدرو ، شالوهو وترجعوا بيهو حلة النعيم دفنوهو وجوا راجعين المركز
ابراهيم اول ما فتح خشمو قال متهم حسب الرسول اب قطعة وولدو التوم
الضابط قال ليهو متهمهم علي اي اساس والسبب شنو البخليهم يكتلوهو ؟
_بيناتنا دم قديم
_يعني الباقر جاء من هناك عشان يكتل حسب الرسول
_لا لا ما جاء يكتلو
_طيب الجابو المسافة الطويلة دي كلها شنو وبالليل
_ هو كان قاعد في الحلة التحتانية عندنا فوقها بيت واحتمال اب قطعة هو الجاهو وكتلو
_ويشيلو من هناك بعد يكتلو ويرميهو جمب الحلة حقتهم ؟
_بكون جابو اول وبعدينك كتلو
_الباقر اخوك جاء براهو عشان يكتل حسب الرسول وطعنو في كتفو وقام جاري يعني هو البدأ وهو الخاطيء وحسب الرسول في الحالة دي كتلو دفاع عن النفس
_دفاع عن النفس كيفن يا جنابو ؟
_أخوك طعن حسب الرسول في بيتو والطعنة ان ما جاتو في كتفو اكان هسي هو المكتول
انتهى التحقيق مع ابراهيم والضابط حقق مع اخوهو عمر وعمر داك لقاهو ما عارف اي حاجة عن الموضوع وما عندو اي شغلة لكتلة اخوه الزمان وقال للضابط انا مكلم اخواني قدام ابوي الله يرحمو وقلت ليهم تاركم دا انا برة منو وما معاكم فوقو وخلف الله شاهد
الضابط قال ليهو خلف الله دا منو
_نسيبنا وهو الزول البولع النيران وكل مرة بقول لينا دم اخوكم دم اخوكم ومن فوتت حسب الرسول من الحلة اكان بفتش ليهو ويوسوس زي الشيطان لابوي واخواني وانا شاكلتو كم مرة
الضابط استدعى خلف الله زول قصيروني ونضام ومراوغ وكضاب عندو وش اصلو ما مريح الخباثة ظاهرة فوقو
الضابط من شافو ساي ما ارتاح ليهو قعدو في كرسي ونهائي ما اتكلم معاهو ول سعلو قريب نص ساعة والضابط مدنقر في ورقو يكتب ساااي ولا عاين في خلف الله
وخلف الله يتململ لا قادر يقوم ولا قادر ينضم ومرات يعمل فيها حزنان علي موتت الباقر ومرات يقعد يرتب في اجاباتو علي الضابط والضابط لخبطو وعمل ليهو نفسيات وبعد قريب ساعة الضابط اتلفت عليهو وقال ليهو ازيك يا خلف الله
_الحمد لله كويس بس الدخلتها فيني كتبت الباقر اخوي دا ما بتمرق بالساهل اصلا اكان صاحبي و....
الضابط قاطع وقت ليهو ما تكمل كلامك لو صاحبك ما كان كتلتو
خلف الله نطط عيونو كبار وقال اكتلو كيف يا ججنابو
الضابط كورك للعسكري وقال ليهو ودي المجرم دا الحراسة وختو مع حسب الرسول في زنزانة واحدة
خلف الله قعد يجقلب دقيقة دقيقة يا جنابو انا م عملت حاجة عشان تدخلني الحراسة
الضابط قال للعسكري وديهو وخليهو في زنزانة براو والعسكري ساقو وداهو
ابراهيم كان منتظر خلف الله برة لمن شافو مودنو السجن جاء سأل الضابط قال ليهو خلف الله دا مالو سجنتوهو
الضابط قال ليهو نحن قدام قضية وجنائية اي زول نسجنو لحدي ما نعرف القاتل منو وانت زاتك لو داير اسجنك بسجنك
_بس خلف الله دا كان معانا في الحلة وقاعدين في فراش ابوهو
الضابط قال ليو امشي يازول واقعد في فراش اخوك لمن ادورك بناديك
_بس يا جنابو...
_ابراهيم تمشي من هنا قلت ليك
ابراهيم فات بي جاي وسعد ود امحمد جاء بي جاي وكان معاهو الفضل ود عباس اصحاب حسب الرسول و الاتنين دخلوا علي الضابط
يتبع...
