#الدم (٥)
مجاهد يوسف
حسب الرسول قعد مع ود عباس أربعة يوم وقدر ما يقول ماشي الفضل يحلف عليهو وهو زاتو كان محتار وما عارف يرجع وللا يعمل شنو خاصة انو جيتو دي ما استفاد منها اي حاجة كدا يقولوا عليها
اليوم الرابع بقى مارق والفضل قبال يحلف حسب الرسول اتلهمو بالحليفة
- حرم آ الفضل أخوي الليلة ما بقنب معاك
- حرم شنو انت ما قلت لي المرة ماتت
- أها علي القسم ما بتحلف علي خليهو الحرام دا قسم عديل
- ادينا يومين تلاتة تاني لينا زمن طويل ما اتلاقينا خلينا نتونس فوق الزايلة دي كم يوم قبل ما نفارقها واصلنا مفارقنها
- بجيك تاني ان بقينا شداد الليام راقدة بس اديني خاطرك حسي
- امش ساكت بدون خاطر بعد حلفت علي ما احلف عليك
- ان قعدنا للحول ما بنفوت بخاطر زول مو يا ؟
- الله يعدل طريقك أ حسبو أخوي واعمل حسابك تب
- لا لا ما تخاف علي تب علا بدور اسعلك من سعد ود أمحمد الزول دا لسة حي
- ها زول ها والله شوفتنا ليهو مع شوفتك ومرقتك بجاي مرق بجاي انا ما كلمتك بيهو ؟
- دا كلام شنو دا ؟ وانا زاتي ما مرقت من الحلة الا بعد كلامو اها المرقو شنو وراي
- ما بعرفو والله لكن في ناس قالوا أكان متفق مع ابراهيم ود اللغيبش علي حاجة كدي وداك ما سواها ليهو ومرق ساب الحلة محل فات ما انعرف ونهائي ما رجع تاني . علا قبل كم سنة كدا في واحد من اولاد عبد القيوم سيد اللوري شغال في الخرطوم قال شافو هناك وسلم عليهو وسعد سألو من ناس الحلة چت ومنك بالتحديد قال ليهو اب قطعة رجع وللا لا ؟
- ألقاهو وين الزول دا انا ؟
- علا تمش الخرطوم تسعل منو هناك
التوم ود حسب الرسول من الحلة اربعة يوم ما مرق وقلقان علي ابوهو شديد ومحل ابوهو فات ما عارف وكل العارفو بس انو قال ليهو فايت الصعيد . قام فات لخالتو ام الرضية قال ليها ابوي دا عندو مشيات علي الصعيد . من زمان مشياتو دي ؟
قالت ليهو ابوك دا كان بخفس يغيب ليهو كم يوم زول عارف فجتو البمشي ليها مافي ولا أمك ما ظنيتها أكانت عارفة لانها كانت بتجيبك وتجي تقعدوا معانا في بيتنا هني ومرات تعدي معانا اسبوع حتين هو يجي
التوم فات وعندو واحد صاحبو بقولولو علي زول نجيض خلاس وبريد التوم دا ريدة شديدة وصاحبو الصحبة القوية ديك قام التوم فات ليهو في بيتهم وكلمو بالبت الشافها في الحلة التحتانية وقال ليهو والله البت هسي شكلها زاتو ما متذكرو وانا غير الرضية بت خالتي انت عارفني لا بدور ولا بعرس علا ما عارف زي الفي حاجة أكانت دافراني دفر علي الناس ديل
علي قال ليهو اها والناس ديل كلامهم معاك أكان عديل وقال ليك بتنط وهدا انت نطيت
- نطيت والله انا قلت ليك مشيت لهم زي الما واعي ما واعي مشية الزول المرسلو القدر ومجبور بدون ارادتو
- الله رايد شي , اها وعمي حسب الرسول وين هسي ؟
- شال الصعيد علا وين في الصعيد ماني عارف
- خليني امشي انا الحلة التحتانية اشمشم واعرف الناس ديل مالهم وقصتهم شنو وبجيك وصف لي بيتهم بس
- سمح بوصف ليك وانا لو ابوي وراني الحاصل شنو وللا في شنو اكان ارتحت وعرفت اعمل شنو وهسي بس قاعد قبلي لا قادر امرق من الحلة ولا قادر اقنب فيها
- لا لا قنب قبلك ساي وانا بجيب ليك خبرهم تب ما تشيل هم
الباقر جاء من حلة النعيم ويتحلف ساكت علي حسب الرسول وقال لابراهيم وصف لي حلتهم بس والله ما تصبح عليهو الواطة
ابراهيم قال ليهو ولا تتعب نفسك وتمش ليهو بجيك هني في محلك دي
- ياخ يا ابراهيم انت روحك طويلة خلاس وصف لي الحلة الهو فيها بس انا ما بريد الانتظار دا
- لازم تصبر شوية الشفقة مي سمحة بتضيعك وبتضيعنا معاك وانا لو عارفك شفقان ومتهور كدي ولا كنت رسلت ليك اصبر اصبر
- السنين دي كلها وانا شايل الصبر ولا يوم واحد ما نسيتو وخلاص بعد كدا زمن الصبر فات وريني بس حلتهم وانا بريحك وبريح روحي منو
ابراهيم ابى يوصف للباقر حلة ناس حسب الرسول والباقر قال ليهو لو ما وريتني اسم الحلة الهو فيها براي بمشي اكوس بالحلال القريبة قريبة لامن اعتر فوقو
ابراهيم قال ليهو لا تصبر وانا قلت ليك بجينا في محلنا دي
خلف الله قال لابراهيم كلام الباقر صاح ووريهو الحلة القاعد فيها خليهو يمشي ينتهي من الشغلانة دي وهم بتحاججوا وبتكلموا كدي بابهم كو كو دق مشى بلة ود ابراهيم فتحو لقاهو دا واحد شايل ليهو سبحة كبيرة ومخلاية فوقها هتش وهو زول صغير ما كبير ملفلف راسو بعمة وجادع ليهو شال فوق كتفو
اتفضل اتفضل الزول دخل عليهم سلم وقال انا عابر سبيل ساكت وبيتكم اول بيت ادق بابو في الحلة
خلوا كلامهم الكانوا بقولوا فيهو وقالوا ليهو مرحب بيك حبابك
قال ليهم مالكم زي العندكم مشكلة عندكم مشكلة كدي
ابراهيم قال ليهو ما عندنا اي مشكلة وكنا بنتونس ساكت ما عندنا اي عوجة
الزول دا عاين في الباقر قوي لمن الباقر زاتو قال ليهو مالك يا زول بتعاين فوقي كدي
- انت عندك مشكلة اسمك منو انت ؟
- داير بيهو شنو اسمي وانت منو وشغال شنو زاتك وشن خبرك بالمشكلة العندي
خلف الله بريد الشيوخ والناس الزي الزول دا قال ليهو اسمو الباقر ود بلة
الزول دا غمض مسافة وقال ليهو الباقر ما تولع النيران ارجع اهلك انت ماشي ليك في درب ما سمح معاك والرجعة منو مي ساهلة
الباقر عاين لابراهيم اخوهو والاتنين عاينو في الزول الجاهم دا وقال ليهو نيران شنو يا زول ودرب شنو الانا ماشي فوقو دا
-ما بعرفو علا شايفك شايل ليك سكين وهدومك ملانات دم وسكينك نضيفة
- كيف يعني
- يعني انت ميت ليك في مشكلة وجيت تكتل كتلوك
- كتل شنو ومشكلة شنو يا زول انت الظاهر عليك ماك شديد
- انا اشد مني مافي وهسي ممكن اوريكم حاجات عملتوها ومافي زول عارفها غيركم
ادوني اساميكم بس وانا هسي بوريكم الداسنو كلو والدايرين تعملوهو
- الجابك هنا شنو يا زول ما تورينا اي حاجة ولا دايرين نعرف منك حاجة خلينا في حالنا وابقى مارق من البيت دا برا شعوذة ودجل
دا كان كلام ابراهيم ود اللغيبش
خلف الله خاف وقال لابراهيم دقيقة يا ابراهيم دقيقة ما تطرد الزول دا
الزول داك لمن سمع ابراهيم قال ليهو اسمك ابراهيم موش دقيقة النوريك انت شنو وسكت مسافة وبعدها قال لابراهيم لا حول ولا قوة الا بالله دي مصيبة شنو دي الانا دخلت فيها دي معقول اول بيت في الحلة دي يطلع ناسو كدي وقال لابراهيم انا مارق من بيتكم دا ومن حلتكم دي كلها لكن انت بتضيع اخوانك ديل وبتقعد براك وبتندم وانت سبب المشاكل دي كلها ومافي داعي اتكلم بالعارفو وقال للباقر اكان داير تسلم ابعد من دربك دا وكوس وراء اخوك دا شوفو داسي ليك شنو
الباقر بقى يعاين في ابراهيم اخوهو ومحتار في كلام الزول القالوا دا
يتبع ....
