#الدم (١٤)
مجاهد يوسف
الضابط بعد سعد والفضل ود عباس فاتوا ركب عربيتو وفات حلة النعيم وصلها مع العصر ومشى بيت اولاد بلة اللغيبش قال يعزيهم ويقنب معاهم شوية ولقى ديوانهم مقفل ولا فارشين علي الباقر اخوهم
دخل نص الحلة ووقف قدام دكان السر عرفو باللبخة الجمبو لمن الفضل كان بحكي ليهو
سلم علي حاج السر وداك ما عارفو بوليس لانو ما جاهم لابس رسمي طلب ليهو بارد وقعد يتونس مع حاج السر
_الحلة دي اسمها شنو يا حاج ؟
_جيتها عابر طريق ساكت وللا ضهبان ؟
_ماني ضهبان عابر طريق عابر طريق
حاج السر مسك منو قزازة البارد ورجعها في تلاجتها وكورك يا ولد يا محمد الكع ألكع تعال
محمد جاهو جاري قال ليهو اجر لامك وحبوبتك قول ليهن ابوي السر معاهو ضيفن سونلو غداء وتعال قنب بايع هني وقال للضابط ورح علي البيت
_كدي اسمعني دقيقة
_ورح انضم هناك في البيت قريب قريب ياهو دا الباب ما سايقك بعيد وفات قدامو ويسوي ليهو ورح آ زول الغداء جاهز ما بنأخرك
الضابط فات معاهو فتح الديوان وشغل مروحتو وفتح الشبابيك
_يا حاج مافي داعي امش علي دكانك
_دكاني الجايهو شنو ومحمد ولدي بعرف يبايع
حاج السر فات ما عد ليهو عشرة دقايق جاهو بالصينية وقعد ياكل معاهو ، الضابط اتكيف منو كيف شديد وقال ليهو دا شنو يا حاج مالين الصينية كدي انا براي وانت متغدي
_القال ليك منو متغدي أكل أكل وهدا انا باكل معاك ما تختشي الخير راقد الحمد لله
_سمح نادي محمد خليهو اتغدى
_محمد اتغدى قبيل اكل اكل خليهو النضمي هسع
الضابط ما كان متغدي ولقاها فرصة حلوة انو يسعلو بطريقة ظريفة
_عندك كم مرة يا حاج ؟
_ليه سعلتني السوعال دا ؟
_لا لا بس عشان شفت ولدك ما شاء الله صغير
_هههههههه محمد دا ولدي ود بتي بتول وانا جدو
_الله يحفظك ليهم ويحفظهم ليك
_آمين ، محمد دا ابوهو الطيب الله يرحمو من حلة تانية قريبي وامو بتبقى لي وانا وهي اولاد خالات وأخد بتي بتول دي لكن مات وولدو محمد دا كان في بطن امو
_يا سلااااام الله يرحمو والبركة فيكم ، مالو اكان عيان ؟
_البركة في الجميع وما كان عيان غرق ساي في الترعة
_ما كان بعرف يعوم وللا شنو؟
_والله كمان عوامن بس الكنكيج
لكن قدر الله ساكت جاو
_الترعة بتغرق زول عوام ؟
_تمت ساكت آ ولدي ولمن تتم ما بتدورلها سبب ، اكل اكل ما تقيف
_والله انا شبعت تب كتر خيرك وربنا يزيدك من فضلو ، بس حيرتني غرقة نسيبك دا والله ، ما وديتوهو المشرحة مالكم
_مشرحة شنو يا زول ، ما عندنا ميت بنرضى يشرحوهو
_امكن مات مكتول بتدفنوهو ساكت
_البكتلو منو وهو كان زول طيبان خلاس والناس كلهم بريدوهو وغرقتو دي وقعت عليهم زي الصاقعة ناس كتيرين ما صدقوا لكن دا حال الدنيا كدي وكلنا فايتين منها
_صاح لكن اكان كدي البنكتل عندكم بضيع ساكت ولا بنعرف
_كاتل الروح ما بروح وبعدينك هو ما عندو عداوة مع زول ، كدي النقوم اجيب ليك الشاي
_الكتل ما الا بالعداوة مرات يصادف زول يكتل ليهو زول ولا بعرفو زاتو وفي حاجة بسيطة ومرات الكتلو ما بتعرف منو
_صدقت صدقت وحلتنا دي امس لقوا واحد منها مكتول
_معقول ؟ لكن ما سامع صوت بكى ما فرشوا عليهو ولا شنو
_دي قصة طويلة خلاس واخوان المرحوم ما فرشوا وقالوا الا بعد ياخدو تارو ودا اخوهم التاني ينكتل ويابو العزاء فيهو
حاج السر مشى جاب الشاي والونسة جرت والضابط ما خلالو سعال ما سعلو منو واستاذن من حاج السر وركب عربيتو وفات بيت اولاد اللغيبش
وصل هناك ودق الباب جاهو بلة ود ابراهيم واكان معاو واحد من اولاد الباقر والضابط قال لبلة امش نادي لي ابوك
_مالكم يا ابراهيم ابيتو العزاء في اخوكم ؟
_اخونا انكتل يا جنابو ما مات ساي عشان نحن نفرش
_سبلتوهو يعني
_ما سبلناو نسبلو كيفن هو ما شافع
_اها دا يسموهو شنو
_كدي الكلام دا خليو هسي واها اب قطعة اعترف ؟
_لسة التحقيق شغال وانا جيت عشان اعزيكم ما عارفكم ما فارشين
_بنفرش بنفرش قريب يا جنابو
الضابط نضم مع ابراهيم شوية وفات
يتبع. . .
