#الدم (٢)
مجاهد يوسف
ابو النعمة سكت مسافة وقال ليهو اسعل مننا اول لانو نحن زاتنا أغراب وما من البلد دي دحين اسعل مننا قبال تتسرع
_ماني ساعل منكم تب وان قلت خير باكر العصر بجيب ناسي وبجيكم ناس عقد عديل
_ان علي انا خير تب علا الكلام انت ، خايفك بعدينك تنط دحين ما تتسرع آ ود حسبو اب قطعة
_حسبو اب قطعة دا منو دا ؟ انا ود حسب الرسول ود الطيب قلت ليك
_لا لا ما تاخد في بالك واللسم دا حق واحد صاحبي جاني في خشمي ساكت
_سمح البخليني شنو انط ؟
_ الكلام دا ما وكتو حسي وانت مالك متضايق ومستعجل كدي ؟ انا قلت ليك لو علي انا خير واديتك تب واديتك برضو فرصة تسعل عني انا ابراهيم ودبلة اللغيبش ومن حلة النعيم جيت الحلة دي لي سنتين اسعل مني احسن ليك
_انت لشنو مصر انا اسعل الناس عنك وانت هنداهو قدامي والفوقك احسن اعرفو منك والناس مون اخبر منك بيك وللا مو يا ؟
_بالحيل علا الجمل ما بشوف عوجة رقبتو وما في زولا بنبز ليك روحو لانو بكون شايف نفسو احسن زول وكل فعل يفعلو لو ما كان عملو ومقتنع بكون عندو مبرراتو المقتنع بيها هو ، لكن الناس بوروك الواضح والشايفنو
_سمح بسعل لكن انا زاتي الحلة دي ما بعرف فوقها زول اسعلو
_اسعل خلف الله سيد الطاحونة قول ليهو انا بدور اناسب ابراهيم ود اللغيبش الزول دا زول نصيحة والنصيحة بمرقها ان بقت بتكتلو
_سمح بسعلو وانت اسعل البت امكن ما ترضى
_ما عندنا بت بتقول كلام فوق كلام ود اللغيبش آ ود اب قطعة
_تاني ود اب قطعة ؟
_ ان شاء الله ما تكون هو
_هو منو هو ؟
_سيبو حسي ان الليام لمتنا بتعرفو
التوم ركب حمارو ومشى الطاحونة يسعل من خلف الله عشان يسعلو
لقاهو منبطح فوق النيمة القدام الطاحونة فوق عنقريب قصيروني وقدامو رادي قديم شغال ويتختخ ساي ولا بنسمع سمح سلم عليهو وخلف الله صنقر وجمبو كوز ملان موية ناولو للتوم وزح ليهو عشان يقنب جمبو
_جيتك آ حاج بسعل من ابراهيم ود بلة اللغيبش
حاج خلف الله قال ليهو بيتو في الشارع التاني ما بي جاي
_لا لا بيتو خابرو انا بدور اسعلك منو هو في روحو
_داير تعرف شنو عنو؟
_ بدور اناسبو داير النعمة بتو
_ شفتها وين وبتعرفها من وين ؟
_قبال كم يوم مرقت لي شوالات اشتريتن منها والبت عجبتني بدور اعرسها
_وما لقيت زول غيري تسعلو ؟
_هو القال لي كدا وقال لي انت بتمرق النصيحة ان بقت بتكتلك
_ لو بتدور النصيحة الزول دا غريب مننا وجاء الحلة دي كايسلو زول ما بعرف البيناتهم شني ، علا ناس كويسين ما بقدر اقول فيهم شيتن شين بس...
_بس شنو ؟
_بس احسن ليك تختاهم البنوت راقدات
_ما فهمت منك حاجة
_البعرفو قلتو ليك
التوم ركب حمارو وفات علي حلتهم
ابراهيم ود اللغيبش جاء لخلف الله سيد الطاحونة وقال ليهو الزول دا عرفتو ؟
_لا لا ما عرفتو
_الزول دا ود حسبو زولي الكايس ليهو زمن
_ود حسبو اب قطعة ؟
_ولدو آي والله جابوا لي في صمة خشمي
_ عرفتو كيفن ؟
_من عيونو ياهو زاتو اصلو ما بغباني
_اها وداير تعمل شنو ؟
_رسلت بلة ولدي للباقر اخوي يجي
_أكان تتأكد أول
_انا رسلتو ليك مخصوص عشان تتأكد لي منو وان بقى هو ياني الكاتلو
_ ما ظنيتو هو والولد دا الظاهر عليهو ضكيران
_يا خبر بقروش بكرة ببقى مجان ساكت
_قال بكرة بجيب ناسو وبجيك , اها وان بقى ما هو بتديهو بتك ؟
_خلينا نشوف اول
التوم وصل الحلة ودخل البيت ابوهو حسب الرسول راجل كبير تب ونظرو ضعيف كملان من لحم الدنيا زول اخضراني طويل التوم ولدو دا بشبه خيلانو علا ماخد عيون ابوهو تب
التوم مشى علي ابوهو وقال ليهو بتعرف ابراهيم ود بلة اللغيبش؟
ابوهو قام من رقدتو ووقف علي حيلو ونطط عيونو مكاااان وقال ليهو منووو؟؟؟
يتبع....
