#الدم (٢٤)
مجاهد يوسف
ناس الحلة الفوقانية رجالها الكبار كلهم اتلموا فوق بيت حسب الرسول اب قطعة وقالوا ليهو انت جيتنا في الحلة دي صغير وقعدت معانا وبقيت مننا وفينا ما شفنا منك غير الخير دحين ورينا الناس ديل مالهم معاك وناس حلتكم ديلك مالن داير يكتلوك المرة الفاتت انت انطعنت في بيتك لكن سجنتك ما خلتنا نعرف الحاصل شنو ولا في زول عارف الحقيقة غيرك والزول الاسمو الباقر الطعنك انكتل في حلتنا دي وكتيلو ما انعرف منو وهسي نحن جيناك بندورك توضح لينا الحاصل شنو انت زول الليل لينا والعليك علينا وان بقيت ماك غلطان حرم من صغيرنا لكبيرنا معاك وبالدم نفديك وان بقيت غلطان ليك غلطة قديمة وعامل ليك جريمة برضو ما بنخليك بنمش معاك لناس حلتك وبنحل المشكلة ونحن بعد طعنة التوم ولدك دا يوم عرسو ما بنسكت ونقعد نتفرج التوم زي ما هو ولدك برضو ولدنا وامو لحمنا ودمنا
حسب الرسول سكت مسافة وقال ليهم كتر خيركم والله علي الكلام القلتوهو دا وانا من سكنت معاكم ما حسيت باني غريب وياكم اهلي وناسي وهسي كلامكم دا فوق راسي
شيخ الحلة قال ليهو ما جاينك هني لشكرة جاينك تختنا في الصورة وتورينا قبل ما تجينا في شنو بينك وبين اولاد اللغيبش الدايرين يكتلوك ديل انت وولدك
حسب الرسول حكى ليهم الحصل كلو من طق طق لحدي ما هو بكلم فوقهم وقال ليهم دا الحصل كلو لا زدتو ولا نقصتو ولا دسيت منكم شي ولو قلتو غلطان ياني الفايت ليكم الحلة وان ما قلتوا غلطان برضو فايت من الحلة وبرجع لي حلتي حلة النعيم وهناك انا وناسي بنتباصر
قالوا ليهو ما ظنيناك خبرت كلامنا سمح نحن جيتنا ليك دي مانا ناس لوم ولانا مغلطنك ولا فينا زول شاكي في القلتو ونحن من هسع معاك اكان في حارة واكان في باردة
واتفقوا كلهم يمشوا تاني حلة النعيم ويقعدوا ابراهيم وخلف الله في واطة الله ويحلوا معاهم المشكلة وان دايرين دية مع انو حسب الرسول ما كتل اخوانهم قالوا بنديهم ليها بس ما بندور مشاكل اصلا الدم دا من ما يمرق من العرق ساي تاني ما بقيف
حسب الرسول قال ليهم خلاس نسوق معانا الضابط خالد عارف كل شي ويبقى شاهد علي كلامنا دا كلو وعشان تاني اولاد بلة اللغيبش ما يزيدوا الطين بلة
بعد فاتوا ناس الحلة من بيت حسب الرسول علي قاعد مع التوم وقال ليهو الطعنك منو يا التوم اخوي
- شن خبرني بيهو الفجة كانت ضلمة وما انتبهت ليهو جاني من وراء
- ان جاك من وراء طعنك كيفن في بطنك آ التوم قول لي ساكت ما تدس مني
- علي انت مالك ما مصدقني ما قلت ليك الفجة كانت مضلمة وما فرزتو
- طيب لي لمن قبضوا الجنى داك وسعلوك منو قلت دا ما ياهو
- عشان ما ياهو فعلا
- يعني انت عارف الطعنك ما تقول لي الفجة كانت ضلمة
- علي الكلام دا خليهو
- اخليهو كيفن يا التوم والله ياهو الجنى داك زاتو الطعنك من خليقتو دي انا عرفتو وكان مزرزر لمن جابوهو ليك في المركز عشان يسعلوك لكن انا ما بخليهو
- ياخ دا شافع ساكت ما ياهو الطعني ما تتعاور ساكت
- انا بعرف اقررو كيف وان بقى ياهو ياني الملحقو ابوهو
- ابوهو منو ؟
- ابوهو الطعن ابوك ولقوهو مكتول في حلتنا
- النعلك انت الكتلتو
- لا لا ما كتلتو لكن لمن نزلت منكم في الحواشة اكان شفت لي زول جاري انا قايلو هو وقلت ليكم بطني كعبة عشان اكنت ناوي اقبضو بس لمن انتو مشيتو جريت وراء الزول ما لحقتو محل غطس ما شفتو تاني وانا راجع لقيت الباقر ابو الجنى دا مكتول جمب الترعة رجعت البيت ما كلمت بيهو زول عشان ما يتهموني فوقو
- والكلام دا مالك ما قلتو للضابط في التحقيق
- يازول انا جريت وراء الزول الكتلو دا جري شديد بس ما لحقتو بعدين خفت اقول كدي يتهموني ساكت في صمة خشمي وبرضو ما خلوني انسجنت ساي
- علي يا اخوي امرق من الموضوع دا عليك الله ما دايرين مشاكل وهسي كلام ناس الحلة ديل براك سمعتوا خلينا نمشي حلة النعيم ونصالحهم ساي وانا ابوي دا لو في زول قرب منو حلة النعيم دي كلها ما بفضل فيها زول ما تشوفني كدا
- والجنى دا يمرق ساكت كدا بعد طعنتو ليك واكان تاني كررها ؟
- ما بكررها انا واثق من كلامي دا لانو قبال يسعلوني كان اعترف للضابط خالد وهو القال لي الكلام دا لمن انا قلت ما ياهو ساقني المكتب وقال لي مالك نكرت الولد وقلت ما ياهو قلت ليهو لانو ما ياهو قال لي هو بعضم لسانو اعترف لي انو طعنك انا اصريت انو ما ياهو لانو الجنى دا محرش وبعدين فقدت ابوهو حارة الزول الحرشو استغل الحتة دي وانا ما داير اضيع ليهو مستقبلو ويبقن علي امو اتنين سجن ولدها وموت راجلها لكن من ناحية هو هو وانا بعد طعني كان بامكاني اقبضو لكن خليتو بعد فات وجرى حتين مرقت عليكم
حسب الرسول سمع كلام التوم ولدو مع علي كلو ودخل قال ليهو يا علي يا ولدي نحن ما بندور مشاكل مع الناس ديل ولا ناس كتل وحمدنا الله علي الحصل دحين خليك عاقل الدم ما بقيف يا علي وزي ما نحن دايرين ننتقم هم برضو رجال وما بخلوا حقهم بعدين والشغلانية بتجر وبروحن فيها ارواح ساكت في الفاضي
شيخ الحلة الفوقانية مشى للضابط خالد معاهو كم واحد من ناس الحلة ووروهو الكلام الاتفقوا عليهو كلو وقال ليهم المرة الفاتت مشينا وعملنا معاهم صلح لكن ما عقلوا وتاني بنمشي ليهم بس المرة دي اخر مرة ان شاء الله وحباب الصلح مع اني واثق حسب الرسول ما كتل واحد من اخوانهم
قالوا خير وحددوا يوم الجمعة الجاية يتلموا ويمشوا لاولاد اللغيبش في حلة النعيم تاني
يتبع...
