الدم 25
مجاهد يوسف
علي ما عجبتو حكاية ناس الحلة يمشوا تاني لاولاد اللغيبش دي قام مرق في حلة النعيم براهو ومشى هناك لي سعد ود امحمد في بيتو وقال ليهو دايرك تمشي معاي حلتنا ونتكلم مع حسب الرسول والتوم في حكاية جيتهم تاني لاولاد اللغيبش دي سعد قال ليهو انت مالك ما دايرهم يجوا في شنو
- يا حاج سعد انا متأكد انو ود الباقر الكريه دا هو الطعن التوم
- كيف هو الطعنو التوم ما قال ما هو في المركز وقدام الناس كلهم
- التوم عمل كدا خايف علي الولد مستقبلو يضيع بالله عليك شوف الطيبة دي ساكت ما يضيع اكان ضايع هو الوداهو يطاعن شنو
- انت متأكد انو هو الطعنو ؟
- متأكد والله والتوم براهو الكلمني
-طيب مالو نكر ؟
- ما قلت ليك قال ما داير يضيع مستقبل الجنى دا
- الكلام دا اكان صاح والله التوم يكون بالغ عديل كدي وكلامك صاح ما يجوهم تاني لانو المرة الفاتت جيناهم وصافيناهم وقالوا خلاس حصل خير وتاني ما في مشكلة بيناتهم هسي بعد كلامك دا معناتها الناس ديل ما عندهم كلمة نهائي
- وكان عاينت ليها من جهة تانية ليه حسب الرسول دا مضعف موقفو وهو البجيهم وليه ما بيجوهو هم
- والله كلامك منطقي ورح انا ماشي معاك علي اب قطعة نناقشوا في الحتة دي
حسب الرسول والتوم قاعدين في نص الحوش المغيرب كدا يتونسوا قام التوم قال لابوهو انت مالك ما خليتني اقول ود الباقر هو الطعني ليه داير حقنا يروح ساكت
- عندي راي يا التوم بوريك ليهو بعدين ما هسي بس ما تكون كلمت زول
- كلمت علي صاحبي
- ما كان تكلمو امش ناديهو لي عشان اقول ليهو الكلام دا ما يعرفو زول غيرو
- علي ما بكلم زول زاتو وهو زاتو ما كان راضي
- لا لا امش ناديهو لي احسن
التوم قام داير يفوت ينادي علي الباب دق ودخل عليهم سعد وعلي زاتو معاهو بعد سلموا وقعدوا سعد قال لي حسب الرسول المشية حقت يوم الجمعة لاولاد اللغيبش تتلغي
- تتلغي كيفن يا سعد الناس كلهم قالوا الجمعة
- انت ليه متضوعف للناس العواليق ديل ؟
- ما بدور مشاكل انا يا سعد اخوي
- ما حكاية مشاكل بس بعد الجنى ولدهم دا ماطعن ولدك حباب المشاكل معاهم ثم ثانيا انت يا التوم مالك نكرت قدام الضابط وقلت ليهو ما ياهو الطعنك
التوم عاين في ابوهو ما عارف يرد بي شنو وهو زاتو ماكان رضيان لكن ابوهو الجبرو يقول ما ياهو وحسب الرسول زاتو عاين في التوم وعلي بنظرة حقت لوم كدا يعني ما كان تتكلمو وتوروهو
حسب الرسول اتنهد وقال لي علي تاني غير سعد الكلام دا قلتو لي منو تاني
علي قال ما كلم غير سعد زول
حسب الرسول عاين في سعد مسافة وقال ليهو اي انا القلت للتوم قول ما ياهو وعندي راي في الحتة دي وقاصد
- ورينا رايك شنو
- بوريك بس ما هسع
-لا لا توريني بيهو هسع وللا تاني علي اليمين بيتك الا يجيبوني ليهو جنازة وانا ميت لكن طيلة ما انا حي ما بجيهو
- سمح بوريك قوم يا التوم سوق علي دا وفوتوا من هنا ما دايركم تعرفوا كلامي الداير اقولو دا
سعد قال ليهو ما يمرقوا من هنا الناس ديل ما صغار اتكلم ساكت
حسب الرسول قال ليهو خير يللا اسمعوا كلامي دا سمح ومافي زول يعرفوا
بهناك ابراهيم وخلف الله قالوا لابراهيم ود الباقر انت التوم دا ساعة طعنتو شافك وللا ما شافك ؟
قال ليهم شافني وعرفني كويس
- طيب مالو نكرك وقال دا ما انت
- والله انا زاتي مستغرب في كلامو دا
- سمح قبال يسعلوهو لمن قبضوك ناس البوليس حققوا معاك
- حققوا معاي لكن انا نكرت قلت ليهم ما طعنتو وجاء التوم اكد ليهم كلامي عشان كدا فكوني
- كويس انك بقيت ضكر وما اعترفت للضابط
- اها يا خلف الله العمل شنو تاني ؟
- والله انا شايف الليلة الاربعاء وسمعت انهم جايننا هني يوم الجمعة يصالحونا
- يصالحونا مالنا نحن عملنا ليهم شنو ؟
- خليهم اللجوا ساكت ما مشكلة لكن نحن حقو نبقى شاطرين وبكرة قبال يجونا نكتل واحد فيهم يا حسب الرسول يا ولدو دم الباقر وبدري ما يروح كدا ساكت
- والله كلامك عين العقل نتغدى بيهم قبال الصلح
سعد قال لي حسب الرسول كلامك دا غلط ولا بدخل في راسي
حسب الرسول قال ليهو ما غلط ولا شي وبتشوف
علي قال والله يا عمي انا مع سعد الكلام دا ما صاح الناس ديل ما تعملوا ليهم راس وقعر ساكت
سعد قال ليهو يعني يا حسب الرسول داير تقنعني انو ابراهيم وخلف الله لمن يعرفوا يوم الصلح انك فكيت ولدهم من السجن عشان مستقبلو ما يضيع بيتأثروا بالحتة دي وبعقلوا ؟ تكون غلطان ثم غلطان وما بتعرفهم كويس
خلف الله وابراهيم جهزوا حالهم تب وقالوا بكرة الخميس بالليل واحد منهم لازم يموت والطعنة المرة دي تكون في الرقبة اوالقلب عشان ما يمرق منها البنطعن فيهم
يتبع
