#الدم ٢٦
مجاهد يوسف
خلف الله قال لابراهيم المرة دي دايرين نعملها نحن برانا والشفع ديل ما بقدروا علي الكتل دا انت تكتل واحد وانا بكتل التاني والليلة لو ما كتلناهم بكرة الناس كلهم جايين علينا تاني ما بنقدر نهبش لينا واحد فيهم
ابراهيم قال ليهو انت ما تفتكر الشغلانية دي ساهلة انا فكرت كتير في الموضوع دا وشايف احسن حاجة نحن نعملها نخليهم يجونا ونرضى بالصلح لاني واثق ومتأكد تماما ما فكوا ابراهيم ود الباقر دا الا عشان عندهم خطة في راسهم والناس ديل ما تستبعد يكونوا مراقبننا
_مراقبننا كيفن يعني بدورو يبارونا اليوم كلو
_خلف الله انت قايل الضابط دا ساب ابراهيم ساي ؟
_ابراهيم سابوهو عشان التوم قال ما ياهو
_دا القدام الناس لكن دقيقة يا ابراهيم يا ابراهيم بجي هسي وبوريك انا قبيل سعلتو قال لي انا اعترفت بعد العساكر دقوني ولمن فكوني قالوا لي ما توري عمك انك اعترفت
جاء بلة ولدو قال ليهو ابراهيم دا مرق يا ابوي قبل شوية
قال ليهو اجري ناديهو يا بلة بسرعة
بلة فات ينادي ابراهيم لقى عمر عمو واقف جمب الباب قال لبلة ما تمشي تنادي ابراهيم وتعال دايرك
عمر ساق بلة وبلة عاقل شوية وبسمع كلام عمو قال ليهو ابوك وخلف الله ديل بودرونا كلنا زي ما ودروا الباقر عمك عشان كدا انا دايرك تقيف معاي ونوقف خلف الله دا لانو هو سبب المصايب دي كلها
_والله يا عمي عمر الراجل دا فقر خلاس وقلبو اسود بس ابوي بسمع كلامو
_عشان كدا انا دايرك تقيف معاي قبال ابوك دا ما يتورط في مشكلة جديدة وهسي تمشي تقول ليهم ابراهيم مرق مع عمي عمر وما عارفهم مشوا وين ودايرك تتصنت ليهم وتجي توريني البقولوهو والناوين عليهو كلو
بلة رجع كلم ابوهو كدا وقال ابراهيم ما لقيتو اظنو فات مع عمي عمر
خلف الله قال لابراهيم خليهو ابراهيم هسي وقوم ورح ننتهي منهم قبال اليوم دا يكمل ساي ونحن معدنها نتحاجج
_خلف الله ياخي اسمع كلامي مرة واحدة بس المرة دي نصهين ونسكت كم شهر احسن ولمن البوليس وهم زاتهم ينسونا ويفتكرونا قنعنا منهم تاني كتلتهم بتبقى لينا ساهلة
_انت كتلت الباقر اخوك ما ظنيتها موجعاك
_ما موجعاني كيفن والله انا لي مراد اكتلهم الليلة قبال بكرة
_خلاس نكتلهم الليلة مالو
_خلف الله كدا نحن الاتنين بنضيع اكان اتمسكنا
_لا لا ما تخاف انا عندي خطة سمحة خلاس نمشي الحلة التحت بيتنا الهناك داك الليلة ولمن الدنيا تفلل تب نمشي عليهم وتاني خلي الباقي علي
_ يازول الشغلانة دي مي ساهلة
_اكان ما مشيت معاي براي بمش انا ما بخلي دم الباقر وبدري يروح ساي
بهناك علي وسعد قاعدين مع حسب الرسول والتوم وكان قاعد معاهم الفضل برضو
سعد قال لحسب الرسول انا غايتو مع علي دا ما مفروض اولاد اللغيبش ديل نمش ليهم ونعمل ليهم راس وقعر ولا رضيان بمرقة ود الباقر بعد طعنتو للتوم
حسب الرسول قال ليهو الكلام دا خليهو هسي مافي داعي ليهو وانا المشية دي من الاول ما قلتها انا قالوها ناس الحلة دي وانا ما بدور احرجهم عشان كدا رضيت بيها
الفضل قال ليهم والله يا جماعة المشية احسن وخلونا ننتهي من الشغلة دي مرة واحدة
ابراهيم وخلف الله وصلوا الحلة التحت وعمر مشى للضابط في المركز وكلمو بالناويين عليهو كلو وبكلام خلف الله وحريشو لابراهيم
الضابط قال ليهو احسن حاجة عملتها انك وريتني ونحن نمشي لحسب الرسول والتوم نكلمهم ونعمل ليهم كمين هناك عشان نقبضهم متلبسين تاني ما بتكون عندهم حجة
ابراهيم طاوع خلف الله ساي ما دايرو يفوت براهو قام فات معاهو ولسة مصر ما يكتلوا حسب الرسول الليلة لكن خلف الله مصر وقال ليهو لو ما كتلناهو الليلة انا تاني لا بيني ولا بينك
بالليل الضابط مشى الحلة الفوقانية وعمل خطتو تب مع ناس حسب الرسول ومنتظرين ديل يجوا
لحدي الساعة اتنين صباحا مافيهم زول ظهر وابراهيم حاجج خلف الله شديد واقنعوا انو يخلوهم الليلة قلبو قال ماكلو شديد وبعد تعب حتين خلف الله اقتنع ليهو ورضا ورجعوا حلة النعيم وديل ساهروا للصباح ما جاهم زول
الضابط ساق عساكرو ورجع وناس الحلة جهزوا ليهم تلاتة عربات ملوهن وجوا بيت حسب الرسول ركب معاهم هو وجماعتو وفاتوا علي حلة النعيم
ابراهيم قبال ديل يجوهم قال لخلف الله نعمل كل البقولوهو ونرضى بيهو وبعد شهر شهرين نعمل الدايرنو
عمر مرق من البيت شاف ليهو واحد غريب جمب دكان السر يتلفت ساي مشى عليهو وقبال يصلوا العربات دخلن الحلة وماشات علي بيتهم ساب الزول الغريب دا ومشى عليهم استقبلهم وفتح ليهم الديوان
خلف الله وابراهيم جوا عليهم وعمر خلاهم معاهم ومشى يكوس للزول الغريب ما لقاهو قام مشى للضابط وراهو ووصف ليهو الزول الشافو قال ليهو ما تخاف ما في زول بقدر يعمل حاجة انا معاي اربعة عساكر في نص الناس ديل وبعدين الدنيا نهار مافي زول بقدر يعمل حاجة
قام شيخ الحلة الفوقانية اتكلم وشكر للناس حسب الرسول شكير شديد وقال ليهم نحن الزول دا لو ما عارفنو كويس وانو زول ود حلال وما فيهو كلام ما جيناكم دحين لو انتو شايفنو هو الكتل اخوكم نحن قدامكم ان قلتو دايرين دية نحن جاهزين مع اننا متأكدين انو ما كتلو لكن المشاكل ما حبابها وجيتنا دي عشان تاني ما دايرين زول ينكتل تاني قلتو شنو ؟
ابراهيم قال ليهم بدري والباقر اخوانا وحسب الرسول برضو اخونا وجيتكم دي علي العين وفوق الراس ونحن عافيين ما بندور لينا دية بس هو يعترف قدامكم
حسب الرسول قال اعترف بشي انا بري منو ؟ انا لا كتلت البدري ولا كتلت الباقر اعترف ليكم بشنو ؟
ابراهيم قال ليهو مافي زول بنكتل براهو وان اعترفت نحن ما بندور شي ولا فينا زول بطالب بدم ولا بدية واكان دايريننا نسكت يعترف بس
خلف الله قال لو ما اعترف بالعملو قدامكم مافي صلح ودا العندنا
حسب الرسول قال انا ما بعترف بشي ما عملتو والناس جاطوا
قام الضابط قال ليهم ما قدرتوا جيتنا ليكم ولا جية الناس الكتار ديل
خلف الله قال ليهو مقدرين لكن بندور نعرف الكتل بدري والباقر منو اول ومافي غير اب قطعة دا احسن يعترف ونحن زي ما قال ابراهيم ما مطالبين لا بدية ولا بدم
عمر ومحمد صاحبو لقوا الزول الغريب وباراهو محمد لمن دخل في بيت خلف الله وجاء كلم عمر وعمر طوالي فات معاهو لقوهو قاعد في الديوان وقعوا فيهو ضرب لمن قال ليهم انا منتظر خلف الله
عمر ربطو وضربو ضرب شديد وجاب الوصلة قطع سلكها وقال ليهو بكهربك لمن تموت ان ما وريتنا الجابك شنو
ابى يعترف كلو كلو قام عمر مشى الديوان وقرص للضابط والضابط مرق معاهو مشى رفع الزول دا في عربيتو وجاء قال لعسكري وديهو المركز لحدي انا ما اجي وقعد في الديوان ابراهيم وخلف الله مصرين الا حسب الرسول يعترف وداك قال ما بعترف بحاجة ما سواها
الناس مرقوا وركبوا عرباتهم راجعين خلف الله جرى بيتو ما لقى زولو ولقى الديوان كلو مبشتن
يتبع...
