#الدم 18
مجاهد يوسف
خلف الله وابراهيم رجعوا حلة النعيم واحساس الخسارة والخيبة والاحباط في وشوشهم ظاهر لانهم خسروا الباقر وما استفادوا اي فايدة من تفتيشهم لحسب الرسول الفترة الطويلة الفاتت دي كلها وخلف الله قال لابراهيم
_أحسن حاجة نفرش علي الباقر ونتنازل من القضية دي لانو كدا نحن لا قادرين نقتل اب قطعة ولا قادرين نكتل ولدو
_مافي فراش ولا حاجة ان ما كتلنا كاتل بدري والباقر
_نكتلوا كيفن وهو مسجون نان
_ما بنسجن العمر كلو بعدين مافي دليل عليهو بياخد ليهو مدة وبمرق وبلقانا راجنو بالسكين والمرة دي بنضبحوا شخخخخ
_اسمع كلامي يا ابراهيم اخوي احسن حاجة نعمل فيها عاقلين و نتنازل صدقني كدا ما بننتظر كتير
_سمح خليني أفكر في كلامك دا وأقلبو بجاي وبجاي اول
_انت ما داير تنتقم من اب قطعة دا ؟غير كدا انا ما شايف طريقة غايتو وبنكتلو هو والتوم ولدو
_قلت ليك خليني اقلبها واشوف ، انت بصح بمناسبة التوم ولدو دي نحن ما معانا اولاد التوم عمو هني في الحلة
_اولادو منو ها انت نسيت وللا شنو ؟ ما عندو اولاد غير حامد و مغترب ليهو كم سنة الا اكان داير تكتل بناتو واللتنين برجالهن
_نكتل حامد بعد يجي
_حامد ذنبو شنو وهو زاتو ما عندو شغلة بحسب الرسول ولا بعرفو ، نتنازل ونكتل اب قطعة وولدو التوم اللتنين بس
ابراهيم جاب اولاد الباقر اللتنين وقال ليهم طول ما انا حي دم عمكم وابوكم باخدو باخدو ومافي قوة بتمنعني منو اب قطعة وولدو كتلو ابوكم كتلة كلب وجدعوهو بهناك للترعة
اولاد الباقر قعدوا يبكوا وقالوا ليهو حسب الرسول دا لازم يلحق ابونا والله لو ندخل ليهو جوا السجن ونكتلو ما بنخليهو ولا بنخلي تارنا
الضابط كمل اجازتو ورجع لشغلو لقى خلف الله مرق ومرقتو قانونية لكن قال ما بخليهو لانو شاكي انو سبب البلاوي دي كلها
جاب عربيتو وساق معاهو عسكري وفاتوا حلة النعيم
وصلوا هناك لقوا الحلة كلها ملمومة فوق ديوان اللغيبش والناس يشيلوا في الفاتحة لابراهيم وعمر دخل وشال الفاتحة معاهم وقعد جمب ابراهيم وقال ليهو المات ليكم منو ؟
_مات الباقر اخوي
_الباقر مات ليهو كم يا ابراهيم ؟
_كنا منتظرين مرقة خلف الله نسيبو من السجن وبعد مرق فرشنا عليهو
_الفراش بتأجل ؟ اول مرة اسمع بالكلام دا
_كنا مصدومين والشيطان عمى لينا عيونا وهسي عقلنا و كويس انك جيت لانو نحن متنازلين من القضية
_ما علي كيفكم تتنازلوا نحن عندنا جريمة حصلت وعندنا زول مقتول ولازم نعرف العملها منو وتتنازلوا دي حاجة بتخصكم بس بعد يتعرف القاتل وتنازلكم عن الدية او الاعدام واسمو عفو
_نحن عافيين حسب الرسول من هسي
_القال ليك منو القاتل حسب الرسول
_مافي غيرو ودا اخونا التاني يكتلو لينا ونحن ما دايرين نخسر زول تالت دحين متنازلين
_بتخطط لشنو
_بخطط نعيش في سلام وعندنا اولاد وشفع وبنوت دايرين نربيهم
خلف الله من شاف عربية الضابط ماشة علي الديوان انزغم واتخارج منو وزاغ
الضابط قال لابراهيم ووين نسيبك خلف الله ما شايفو قال ليهو بكون في البيت وللا فات لغرض لكن هسي بجي اجري يا ولد ناغم لعمك خلف الله
الضابط قعد معاهم ساعة وخلف الله لا جاء ولا قرب من الديوان الا بعد فات
الصديق صاحب الطيب الكان معرس بتول بت السر جاء من حلتهم للضابط في المركز وسعلو من قضية غرق الطيب لو فيها جديد الضابط قال ليهو لسة لحدي هسي مافي جديد وانا كنت شاكي في ابراهيم ود بلة وخلف الله نسيبو لكن لسة ما بان لي شي مجرد شكوك ومافي دليل واضح عليهم
الصديق فات حلتهم واليوم التاني العصر عمل ليهو شكلة مع رواعية في حلتهم اتضاربوا فيها والصديق دخلوهو المستشفى والضابط مشى جابو من المستشفى هو والاتضارب معاهو باتوا في السجن
الصباح الضابط جاهو بلاغ انو في اتنين مطعنين في حلة النعيم مشى لقاهم ابراهيم وخلف الله اللتنين لكن ما ماتوا ولا معروف الطعنهم منو
الضابط طوالي جاء للصديق في المركز اول ما شافو تاااح كفتو
قال ليهو ما قايلك جاهل وشافع يا الصديق طعنت ابراهيم وخلف الله لشنو ؟
الصديق نكر خطب وقال ليهو انا مضروب زيهم وبايت في السجن من امس وانا زاتي لو لاقيتهم ما بعرفهم ولا بعرف اشكالهم
يتبع......
