#الدم 20
مجاهد يوسف
علي وصل لعند سعد ود امحمد وقال ليهو انا صاحب التوم من الحلة الفوقانية وجايك مرسلني عمي حسب الرسول قال ليك تمشي حلة النعيم وتسوق معاك الفضل ود العباس وتقعدوا مع ابراهيم ود اللغيبش حلوا لينا المشكلة دي معاهم انا الباقر اخوهم دا لا كتلتو ولا فكرت يوم اكتلو وهو الاعتدى علي وجاني في بيتي للكتل والموضوع دا لو ما دخلت فيهو ودخلت معاك الناس الكبار في الحلة بجر وببقى دم ما بقيف وانا ما عندي غير التوم ولدي دا ما داير ادخلو في مشاكل لا هو ولا انا ما عندنا فيها شغلة
سعد قال ليهو عين العقل وانا برسل للفضل ود عباس نتلاقى بعد يومين في الحلة
علي قال ليهو بفوت ليهو انا اكلمو وبوريهو والموضوع دا لازم يتحل بس ما بعد يومين خلوها بعد اسبوع كدا او الجمعة الجاية الناس بكونوا كلهم يوم الجمعة في الجامع تقوم تتكلم في الموضوع دا ونوري الناس كلهم انو المشكلة دي لازم تتحل
علي فات كلم الفضل برضو لكن الفضل قال ليهو لا انت لا سعد ولا حسب الرسول ما بتعرفوا اولاد اللغيبش ديل زيي انا والمشكلة دي كدي ما بتنحل
علي قال ليهو كيف ما بتنحل
- يعني دايرنهم يعملوا ليكم شنو الناس ديل يعفوا الدم مثلا
- بس عمي حسب الرسول ما كتل اخوهم
- ما كتل اخوهم لكن خت نفسك في محلهم بترضى حسب الرسول يطلع ؟ والله لو وافقوا وعفوا الدم ما يخلوهو
-هي لكن الزول دا مسجون في الفاضي ساي وهو ما كتل
- المشكلة الباقر ما مشى هناك الا عشان يكتل حسب الرسول وطعنو بالسكين في كتفو اها الكتلو منو وفي منو بعرفو هناك عشان يكتلو برا سبب
سعد عارف الفضل ما بجي ولمن جاهو علي كلمو بكلام الفضل قال ليهو انا عارفو ما بجي لكن لو دايرين الصاح كلامو صاح والله ونحن عشان ما نخبط ساكت مفروض نكلم الضابط خالد ونوريهو اي حاجة واول حاجة نعملها نمشي نرجع الحلة انا والفضل ود عباس ونسوق معانا الضابط زاتو ناس صلح وحل للمشكلة دي
علي قال ليهو ارح انا وانت برانا لو الفضل قال ما بجي نحاول فيهم احتمال يرضوا بكلامنا لكن الضابط دا انا شايف ما ندخلو في الموضوع دا
سعد قال ليهو انا بمشي معاك عشان تعرف كلام الفضل صاح بس لكن ما بندخل ناس الحلة الا بعد نعرف الفي نية ابراهيم اول
ابراهيم وخلف الله قبال ما يجيهم سعد وعلي براهم مشوا للضابط في المركز وساقوا معاهم عمر وعمر اول شي ما داير يمشي معاهم لكن بعد شافهم المرة الفاتت لمن اي واحد فيهم طعن روحو قال يشوف اخرهم شنو
ابراهيم قال للضابط نحن ناس كبرنا والزول بعد العمر دا مفروض يبقى عاقل ويتصرف بعقلو ما تشيلو الحماقة والعوارة ساي وقال للضابط القضية حقت اخونا دي قفلها كدي ونحن عافيين والكاتل الله حسيبو امرق حسب الرسول وولدو من السجن وهم اصلو ما في زول متهمهم
كلام ابراهيم دا الضابط ما اقتنع بيهو لكن عمل فيها مقتنع لكن قال ليهم تاني بقول ليكم زي المرة الفاتت انتو ممكن تعفوا حقكم وما تاخدوا الدية ولا تخلوا الكاتل ينعدم دا حقكم وحق مشروع واسمو الحق الخاص لكن دا بعد ينعرف القاتل ونحن ما بنقدر نتكلم فيهو لكن في حاجة ما تنسوها اسمها الحق العام ونحن قدام جريمة قتل والقاتل لسة ما معروف منو ولو اي زول مات مقتول وجونا اهلو قالوا نحن عافيين نحن برضو لازم نحقق لحدي ما يتعرف القاتل منو وما بنقفل القضية طالما في ناس متهمين ولا بنقدر نقفلها ضد مجهول الا بعد نيأس من وجود اي ادلة علي المتهم واثبات براءتو
ابراهيم وخلف الله كانوا دايرين الضابط يمرق ليهم حسب الرسول بأي طريقة ولمن سمعوا كلامو دا اي واحد فوقهم عاين في التاني وفاتوا دايرين ليهم فكرة جديدة غير دي وعمر كان معاهم ساكت ساي خشمو ما فتحو ليهم ولا للضابط ولمن مرقوا ابراهيم قال ليهو مالك ساكت يا عمر ساي كدا ما قلت شي
قال ليهو اقول شنو يعني الضابط كلامو صاح وانتو عملتوا العليكم ما قصرتم بس ننتظر التحقيقات لمن تنتهي ولو طلع بريء الحمد لله ولو طلع حسب الرسول هو القاتل الساعة ديك نجي نعفيهو وربنا يعظم الأجر انا كنت ظالمكم ساي والحمد لله ربنا هداكم للصاح
رجعوا حلة النعيم لقوا سعد ود امحمد منتظرهم في الحلة ومعاهو علي صاحب التوم وانخلعوا زاتهم لمن شافوهم وسعد وراهم الجابو كلو قالوا ليهو هسي نحن جايين من الضابط في الموضوع دا زاتو ونحن لو علينا عافيين تب امشوا طلعو حسب الرسول ساي لو بتقدروا وللا نزلوا ليهو محامي امكن يقدر يطلعو ليكم منها لكن دم اخونا نحن عفيناهو تب ولو دايرين تعهد قدام الضابط بنكتبوا
سعد وعلي صدقوا كلام ابراهيم دا ومشوا للضابط فرحانين
خلف قال لابراهيم انت الزول المع سعد دا منو وانا شفتو وين الزول دا شكلو تب ما غريب علي
ابراهيم قال ليهو والله انا برضو زي البعرفو لكن ما ركزت معاهو شديد
عمر قال ليهم دا الزول الجاكم في الحلة التحت لمن انا جيت للباقر اخوي وقلت ليكم الزول دا كان هنا في الحلة
خلف الله قال بسسسس دا الكان عامل لينا فيها فكي وشيخ زاتو لكن بعرف سعد من وين ؟ الزول دا ما جاء ساي الا يكون ليهو معرفة بحسب الرسول شديد ولازم نتأكد منو كويس
عمر قال ليهم ما قلنا عقلنا وما عندنا شغلة بزول
ابراهيم قال ليهو عقلنا يادووب نحن فعلا وماشين صاح
يتبع
