#الدم (٤)
مجاهد يوسف
في حلة النعيم في واحد عاقل خلاس وزول حكيم ونضميهو بقعدو تقعد وبوزنو وزن قبال يقولو وزول نصيحة ما بخاف كلو كلو من زول اسمو سعد ود أمحمد
بدري ولد بلة اللغيبش لمن مات اليوم داك حلة النعيم جاطت جوطة شديدة خلاس وانقلبت فوق تحت وكل زول بقى شايل عكازو وسكينو فوق كتفو وفي بعضهم جابوهن سيوف راسن عديل التقول ماشين الحرب
اليوم داك حسب الرسول جاء شايل بدري ود اللغيبش فوق كتفو وجاريبو وقال للناس لقيتو واقع وراء الترعة وكان بسرخ بطول حسو لكن لمن وصلتو فرد شخرة طويلة تاني ما تناها خميتو وجيت جاريبو هني ،
مافي زول كضب حسب الرسول لانو صاحبو شديد و الناس بدوا يكوسوا في الزول الكتل بدري دا منو ما لقوا ليهم لا دليل ولا طريف خيط يوصلهم للزول الكتلو
ابراهيم ود بلة اخو بدري اكان بريد ليهو بت في الفريق واتقدم ليها أبتو ولمن سعل وشمشم لقاها بتريد حسب الرسول وهو زاتو بريدها قام استغل جيبتو لبدري اخوهو وقال للناس مافي زول كتلو غير حسبو اب قطعة دا وحسبو أكان قاعد والباقر ود اللغيبش كان قاعد جمبو قام طلع سكينو م ضراعو بدور يطعن بيها حسب الرسول وحسب الرسول ولا كضب كان شايل ليهو عكاز لفخ بيو الباقر فد لفخة رماهو هناااك وفات بيتهم زعلان
الباقر العكاز جاهو في وشو عشان اكان قريب من حسبو كسر عمود نخرتو وكم سن ورقد فوق المستشفى زمن حنين طلع وطلع يتحلف بجملة الايمان علا يكتل حسبو وان في زول كتلو قدامو بلحقو ليهو
حسب الرسول دا بعد ضربتو للباقر فات بيتهم وكان زعلان خلاس كيف يتهموهو في كتلت بدري وهو صاحبو
سعد ود امحمد اليوم داك مسك الناس وقال ليهم اقعدوا في واطاة الله دي وابردوا وخلونا نفكر ونوزن الامور قبال تتسرعوا وتولعوا لينا في الحلة دي نار يغلبنا نطفيها
مافي زول اشتغل بيهو لا بلة اللغيبش ولا ابراهيم ولدو لكن باقي الناس سمعوا كلامو واي زول ساب عكازو وسكينو وبقوا يهدوا في اولاد اللغيبش
قام سعد فات لحسب الرسول في بيتو وكان معاهو كم واحد من كبار الحلة وقالوا ليهو امرق من الحلة اخد ليك كم يوم كدي على بال النفوس ما تهدأ والناس يعقلوا شوية وتعال صاد
حسب الرسول ابى يمرق وقال ليهم ماني خايف من زول ولا من شيتن غلط سويتو واكان لجيبتي لبدري اي زول لو لقاهو في محلتي دي اكان جابو واكان للباقر شفتوهو براكم لمن ابراهيم تهمني بالكضب طلع سكينو من ضراعو وقبل بيها علي ، استناهو لامن يطعني ؟
سعد قال ليهو انت ماك غلطان تب بس نحن مرقتك بندور نتجنب بيها المشاكل
انا من الحلة دي ماني مارق يعني ماني مارق
سعد قال ليهو لو عرفت الخلاني منو اقول ليك الكلام دا بتمرق آ حسب الرسول
_ دا منو دا الدايرني اشرد من شيتن ما سويتو دا ؟
_ دا ابراهيم ود اللغيبش زاتو القال كدي
_ابراهيم بستفيد شنو من مرقتي من الحلة علا اكان خايفني ألحقو الباقر أخوهو
_أقطع الشر آ حسبو وامرق كلها كم يوم وتعال صاد تلقى الناس هجسوا والعوة والجوطة دي راحت وساعتها بنعرف نعمل الصاح
_يعني مرقتي انا البتهدي الناس
_ايوة بتهدي الناس ، وهسي لو جاك واحد من اولاد اللغيبش داير يضاربك بتسكتلو ؟
_ اسكتلو كيفن ؟
_عشان كدا قلنا ليك امرق من الحلة
مرقة حسب الرسول دي ثبتت عليهو التهمة تب و ابراهيم استغلاها استغلال صاح وبعد ما سعد جاهو وقال ليهو اقنعتو ومرق ابراهيم لملم ناس الحلة وقال ليهم الكاتل اتعرف والليلة كمان ساب الحلة وشرد منها ، سعد كلام ابراهيم دا زعلو شديييد وقال ليهو ما اتفقنا علي كدا ، ابراهيم سفهو ساكت ولا رد عليهو ، وسعد قال ليهو ما عيب تستغلنا ونحن ناس كبار كدي ، وقعد يكلم في الناس انو حسبو ما الكاتل وانو ابراهيم غشاش ومخادع ومتهمو زور لكن مافي زول سمع ليهو وقالوا لو ما كتل ما كان شرد
والتهمة وقعت فوق حسب الرسول واللغيبش قال لاولادو لو ما كتلتو اب قطعة دا وجبتو تار اخوكم ماني عافي منكم والباقر قال لاخوانو البكتل حسب الرسول قبالي بكتلو
وسعد ود امحمد من اليوم داك ساب الحلة ومرق منها مع مرقة حسب الرسول
يتبع...
