#الدم (٦)
مجاهد يوسف
الزول الجاء لناس اولاد اللغيبش دا حيرهم كلو كلو وما عرفو زاتو يردوا عليهو كيفن والباقر اتضايق شديد من كلامو وقام عليهو طردو من البيت لكن خلف الله ما خلاهو يفوت وقال ليهو انا اسمي خلف الله عليك النبي شوفني قبال تفوت آ سيدي الشيخ
الزول غمض عويناتو مسافة وفتحن وحمر في خلف الله وقال ليهو بنهرة قوية شيطان انت شيطان انت اعوذ بالله منك ومن الراجيك
خلف الله خاف وقال ليهو مالي انا
_انت زول مضر وولاع نيران وفتن بعد كبرك دا
وقال ليهم والله يا جماعة قبال ما افوت منكم دايركم تسمعوا مني كلام
الباقر قال ليهو كلامك ان بقى متل القبيل ما بندور نسمعوا
_انا بقولو وانتو تاني علي كيفكم انتو الظاهر عليكم ناس اشرار وما فيكم خير و الظاهر ناوين ليكم علي شيتن لو ما فرقكم ما بترتاحوا دحين صفوا نيتكم وابقوا داب روحكم مالكم ومال المشاكل واعوذ بالله التلاتة ما شفت فيكم واحد فيهو خير ونيتو طيبة وزاتي الجابني عليكم شنو ماني عارف وانا فايت ومويتكم ما بدورها
ومرق فات خلف الله مسك فوقو دايرو يقعد لكن الباقر قال ليهو خليهو يطير من هنا انا زاتي من ساعتي الشفتو ما ردتو الزول دا فقر وكضيضيب خلاس
قال ليهو الفقر فوقكم ومتلفحكم تب وقلوبكم سوداء وانا الشفتو قلتو لا دسيتو ولا زدتو والسلام عليكم ومرق منهم
ابراهيم قال لخلف الله الكلام دا كيفن دا والزول دا عرف كيف الفي نفسنا
خلف الله قال ليهو الزول دا عندو خدام وروحانين وبوروهو الليلتنا كلنا وان بقى كلامو دا صاح احسن نخلي اب قطعة في حالو ونرجع حلتنا نشوف مشهادنا
ابراهيم والباقر اولاد اللغيبش غير اخوهم المات داك تاني عندهم اخو بس داك اخير من ديل وما عندو شغلة بالفي راسهم ولا معاهم في الدايرين يعملوهو واليوم داك جاهم في الحلة التحتانية ومع مرقت الزول الكان معاهم هو جاء داخل وصادفو مارق وهو دخل جاء في قفا الباقر اخوهو بدور منو غرض
بعد قعد قال ليهم الزول المرق منكم قبل شوية دا منو والجابو هني شنو ؟
ابراهيم قال ليهو انت بتعرفو ؟
_لا لا ما بعرفو لكن لو ما خايف الكضب الزول دا انا امبارح شايفو في حلتنا ،
_شفتو هو زاتو وللا مشبهو ساكت ؟
_مشبهو كيفن آ جماعة الكلام دا امس القريبة دي ما بعيد
ابراهيم قال الزول دا اكان كدي ما جابو لينا الطريق وجانا هنا راسو عديل ورحكم نلحقو
مرقوا يفتشوا ليهو ريحتو في الارياح مافي
التوم بهناك منتظر جيت ابوهو ومقلق واقف في طرف الحلة ويشيل وعاين ويسعل في الجايين علي الحلة اكان فيهم زول شاف ابوهو وما في زول قال شافو منهم
ولمن فتر من الوقفة والوكت راح رجع بيتهم جاهو علي صاحبو
_انت وين ياخي ليك كم يوم مافي ؟
_مرقت في حلة النعيم
_الوداك شنو هناك ؟
_وبعد حلة النعيم مشيت لاولاد اللغيبش في الحلة التحتانية لاقيتهم كلهم واتكلمت معاهم وعملت ليهم فوقها انا شيخ
_كدي قنب وريني بالتفصيل
حسب الرسول من الصعيد مرق في الخرطوم كايس سعد ود امحمد
ويشيل ويسعل لمن عتر فوقو
سعد لمن شافو بكى بكاء شديد
علي كلم التوم بالقصة كلها وقال ليهو الناس ديل الظاهر دايرين يكتلو ابوك واخوهم مات بس ما معروف الكتلو منو لكن مرقت ابوك من الحلة ثبتت التهمة فوقو وديل الزمن دا كلو كايسين ليهو
يتبع....
