#الدم (٣)
مجاهد يوسف
حسب الرسول انخلع لمن سمع اسم ود اللغيبش وقال للتوم الزول دا لاقيتو وين ؟ واللماك فوقو شنو؟
_لماني فوقو القدر ساي بس صدفة وصدفة غريبة خلاس ، قبل كم يوم في الحلة التحتانية كنت بلقط في الشوالات جات بت باعت لي شوالات مقددن الفار والبت دي عجبتني شديد ، وبقديدن اشتريتن منها ومن يوم شفتها طلقت فوقي نارية خلت قلبي دي يسوي شح وقدر ما حاولت انساها ابت تتنسي لي اها الليلة مشيت لهم راسي عديل ولاقيتو وهو ابوها طلبتها منو طوالي
_وبتضهب ساكت انت وتخطب في بت الناس من غير تعرف اصلها وفصلها
_جات بظروفها وعلي اليمين آ بوي قدر ما حاولت اختاهم غلبني اتوكلت ومشيت لهم
_والرضية بت خالتك آ النجح ؟
_الرضية بدورها علا بي وين لسليمان اخوها
الناس ديل اول ما دقيت الباب جاني ابوها زول كريم بالحيل شربت معاهو الجبنة ولا كضبت خطبت بتو
_عرفك ود منو
_وريتو علا شبكني ود اب قطعة اب قطعة
_الله يكضب الشينة والنعلو سعلك مني
_سعلني وقال لي انا موافق علا لازم تسعل عني وكمان قال لي بتنط
_ كلامو صاح وأخير تنط منها والحلة دي ما تقرب ناحيتها تب تاني
_الزول دا قصتو شنو يا ابوي
_ما وكت قصتو هسي بس كلامي دا اخبرو زين واعملو ، الحلة حقتهم دي ما تقربها تب تاني والبت دي انساها
_يعني بتعرفو ؟
_بعرفو ايوة والكلام دا خليهو لمن يحين اوانو بوريك ليهو كلو وما تسعلني منو الا اوريك
وانا من بكرة مارق في الصعيد وانت من الحلة دي ما تمرق لمن اجي انا
_ماشي الصعيد لشنو وريني في شنو
_ما تساعل انا قلت ليك وماشي وبجي بعد يومين تلاتة اكان الله هون ، واكان ود اللغيبش جاء فوق اثرك ألزم عليك خشمك وقول ليهو نطيت ما بدور بتك وان سعلك مني قول ليهو ليهو شهرين مافي وماني عارفو وين
_دا كلام شنو يا ابوي
_اعمل القلتو ليك دا والحلة دي ما تمرق منها علا بعد اجي صاد
_سمح تب
اليوم التاني حسب الرسول مرق فجر وفات الصعيد والتوم ودعو وحمارو من بربنديهو ما فكاو جدعلو كليقة قصب وقنب في البيت ولمن جات ساعة الفطور مشى علي ناس خالتو قال يفطر معاهم اصلا مافي معاهو في البيت غير ابوهو وامو متوفية قبال كم سنة وما عندو لا اخت ولا اخو
خالتو زينب مرة طيبة خلاس وبتريدو قعد معاها والرضية في المطبخ تسوي في الفطور وقال يسعلها من ابوهو
_خالتي بتعرفي حسبو اب قطعة
_حسبو اب قطعة دا منو يا التوم ولدي ما عرفتو
_سمح أبوي دا ببقى ليكم شنو ؟
_ابوك ما ببقى لينا شي وهو زاتو ما من حلتنا مالو ما كلمك هو ؟
_ما كلمني علا انا فكرت براي قلت ابوي دا ما عندو اخوان مالو
_ابوك ما من الحلة وما عارفاهو من وين على جاء الحلة دي قبل سنين طويلة واشتغل مع ابوي في الحواشات وكان ساكن معانا قام ابوي عرس ليهو السرة اختي الله يرحمها واداهو البيت القاعدين فوقو دا
_يعني احتمال يكون عندو اخوان واخوات ؟
_شن خبرني بيهو يا ولدي ؟ لكن ما شفنا ليهو اهل ولا هو يوم طراهم علا جاء من بعيد
_والفترة دي كلها قاعد قبلو ما فات اي فجة ؟
_من الحلة دي ما مرق
حسب الرسول وصل الصعيد ونزل عند واحد بقولولو الفضل ود عباس والفضل لمن شافو لمن ختا يديهو فوق راسو وسلم عليهو سلام حار خلاس وضبح ليهو وفرح بيهو فرح شديد لمن ديمعاتو جرن
_الليلة دي عملتها كيفن آ اب قطعة اخوي وكنت وين الفترة دي كلها والله لمن شفتك لمن راسي لفا بي
_الحي بلاقي آ الفضل
_عارف لينا كم سنة من اخر يوم اتلاقينا فوقو ؟
_اي زمن طويل بالحيل
_عييييييك زمن والله ، اها وحالك شنو النعلك طيب ومرتاح
_طيب ومرتاح الحمد لله لكن الراحة الظاهر زمنها كمل تب
_مالك في شنو ؟
_ود اللغيبش كايس لي ولاقى التوم ولدي وعرفو
_الزول كايس ليك لسة ؟ السنين دي كلها ما هجس ولا فتر من الكواسة
_المهم انا جيتك عشانو هسي ، الزول دا صاحبك وبسمع كلامك ونحن كبرنا خلاس علي المشاكل وانت عارفو زول شراني وناوي شر بدورك ترسل في طلبو وللا تمشي ليهو وتبعدو من دربي
_ما بسمع كلام زول وقبال الحول جاني هو والباقر اخوهو وسعلوني منك
_انا خليت ليهو الحلة وناس الحلة وطشيت وهو لسة ما قنع ولا داير يخليني في حالي
_الله يكضب الشينة بس وانا بشوف تسيب ليهو الحلة الانت فوقها دي وتشوف محل تمشي عليهو ، الزول دا ما بخليك اكان لاقاك
_انا من حلتي الانا فوقها دي ماني فايت ولاني خايف منو
_ابراهيم ساهل لكن كعب الباقر وهو البتحلف عليك
_اكان ابراهيم واكان الباقر الدايرني كلو حبابو واخوهم مات موت الله وانا ما كتلتو
_قالوا ما حارقاهم كتلت اخوهم وحارقهم ابوهم المات بالمغسة والحسرة علي اخوهم وقال ليهم لو ما كتلتو اب قطعة ماني رضيان منكم عشان كدا بكوسوا ليك
يتبع....
