الدم 28
مجاهد يوسف
خلف الله ما كان بعرف الصديق كويس لكن شايفو قال ليهو الزول منو ؟
_انت ابراهيم ود اللغيبش وللا خلف الله الكليب ؟
_كليب في عينك يا حيوان يا كليب انت
_اكان كدي انت الكليب
_انت منو يا زول واتكلم بأدب
_انا الصديق اخو الطيب الغرقتوهو انت وابراهيم والليلة جاي اغرقكم
_تغرق منو يا جنى والطيب شنو وصديق شنو امش من هنا انا ما ناقصك
الصديق طلع ليهو مسدس وقال للكليب امش معاي من غير كلام والله اكتلك هني ومافي زول يجيب لك خبر
خلف الله خاف لمن شاف المسدس وظهر تاني واحد مع الصديق اكان مندس بالحيطة ولمن الصديق اشر ليهو جاء جاري وساقوا خلف الله وفاتوا
بت اللغيبش مرة خلف الله قالت لبلة ود ابراهيم ورح قدمني ماشة البيت ابوهو قال ليها بوديك انا عشان داير راجلك قومي ورح
وصلوا لقوا البيت قرد ما فيهو وخلف الله ولا كأنو وصل البيت وابراهيم رجع اختو بيتو وساق ولدو واولاد الباقر يكوسوا ليهو
وللصباح ما ناموا ولا لقوهو وابراهيم طوالي مشى المركز فتح بلاغ في حسب الرسول وولدو
الشرطة مشت الحلة الفوقانية جابوا حسب الرسول والتوم المركز ولقوا ابراهيم قاعد
خالد الضابط قال لحسب الرسول خلف الله اختفى من امس وابراهيم متهمكم
حسب الرسول لولح راسو وقال للضابط والله انا لا شفتو ولا رأيتو ومن الحلة ما مرقت ومعاي الفضل ود عباس اسعلوهو
ابراهيم قال ليهو ما شرط تمرق تكتلو بيدك ممكن تأجر ليك ناس اعترف ساي خلف الله وين
حسب الرسول ولا عاين في ابراهيم وقال للضابط والله انا خايف تموت لاولاد بلة ديل غنماية يقولوا انا الكتلتها
الضابط قال لحسب الرسول معليش خلاس انت ممكن تسوق التوم وتمشوا
ابراهيم قال ليهو انت يا جنابو مالك واقف مع المجرمين ديل وبتصدق كلامهم وبتكضب كلامي مافي زول كتل خلف الله الا هم زي ما كتلوا بدري اخوي والباقر
الضابط قال ليهو اتكلم كويس انا ضابط وبتبع القانون لا معاهم ولا معاكم ولا ضدهم ولا ضدك ، ثم تانيا خلف الله اخر مرة شفتو امس بالليل علي حسب كلامك واحتمال يكون فات ليهو مشوار ما دايرك تعرفو وهو لا صغير ولا جاهل وكل البقدر اعملو حاليا بفتح ليك بلاغ فقدان بس وبعدين لو اتلقى مقتول بنعرف نحقق مع منو ونتهم منو وانت هسي ارجع بيتك احتمال تلقاهو هناك
حسب الرسول مرق هو وولدو وابراهيم مرق معاهم وقال ليهم والله خلف الله دا تجيهو حاجة الا اكتلكم اللتنين
التوم اتحامق وداير يرد عليهو لكن حسب الرسول نهرو وقال ليهو خلي الكليب ينبح ما تنهرو ولا تعبرو . وفاتوا منو
عمر قعد يسأل في جيران ناس خلف الله في واحد منهم قال امس شاف واحد غريب يتحاوم جمب بيتو لكن تاني ما شاف شي
ومشى وراء البيت لقى ليهو درب عربية جديد
بهناك الصديق وصاحبو دخلو خلف الله في اوضة وقعدوا يقرروا فوقو وهو نهائي ابى يعترف ليهم بشي ودقوهو لمن فتروا خلف الله قال ليهم والله ما يحلكم من البتسوهو فوي دا الا تكتلوني لكن يمين ما بخليكم بيها عمايلكم دي
في عمك كبير ببقى للصديق خالو عرف العملو الصديق دا جاء قال ليهم الا تفكوا الزول دا وترجعوهو بيتو والطيب مات موت الله ما كتلو زول
الصديق حاججو زين لكن خالو قال ليهو تفكوهو بس ابقوا عاقلين ما تفتحوا ليكم باب يغلبكم بعدينك سدو ودخل اعتذر لخلف الله كتير لمن رضاهو وقال ليهو ديل جهلاء ساي امسحها لي في وشي انا
خلف الله رجعوهو حلة النعيم وشو مورم من الدق الصديق وصاحبو ما قصروا معاهو تب
ابراهيم ساقو ووداهو المركز وفتح بلاغ في الصديق وصاحبو جابوهم اللتنين وخالد لام الصديق وقال ليهو ندمتني علي كلامي الزمان معاك قايلك زول عاقل وفاهم بس للاسف انخدعت فوقك ودخلهم السجن
خال الصديق ساق ليهو جماعة كتار من حلتهم ومشوا حلة النعيم ما فاتوا منهم الا بعد اتنازلوا عن البلاغ والضابط كتب الصديق وصاحبو تعهد ووقعوا عليهو وبصموا انو ما يجوا لحلة النعيم خير شر
بعد فاتوا حلة النعيم ابراهيم قال لخلف الله دي بلاوي شنو دي النحن فوقها دي ؟
_والله ما عارف بس في زول محرش الصديق دا
_محرشوا كيفن ونحن مالنا ومالو
_نسيت غرقة الطيب العرس بت السر ؟
_دي الدخلنا فيها شنو نحن ؟
_الطيب الغرقو منو ؟
_اوعك تقول لي ....
_بقول ليك آي غرقو برهان الضب ووريتك انا
_لا حرم ما وريتني
_ما بتتذكر ايامها جيت شلت منك قروش وقلت ليك عندي بيها حاجة بتنفعك
_متذكر لكن ما وريتني شنو الحاجة دي وانا قايلك محتاج قروش لروحك عشان كدا ما سعلتك منهن
_اها هسي وريتك بس مافي اي دليل ضدنا
خلف الله فات بيتو وساب ابراهيم ومحتار في الكليب دا وبقى هو زاتو خايف منو
بلة ود ابراهيم سمع كلامهم كلو ومشى وداهو لعمو عمر بحذافيرو وقال ليهو الكليب دا منو خوف والله وانا خايف علي ابوي منو
عمر قال ليهو كدا كل شي انكشف يا بلة وانا بعرف اتصرف صاح كويس انك جيت كلمتني
يتبع....
