#الدم (١٠)
مجاهد يوسف
الحلة كلها جمب الترعة والزول المكتول مافي زول في الحلة عرفو وفي ناس قالوا بكون انقتل في محل تاني والزول الكتلو جابو هنا والبوليس ملا الحلة ومنعوا الناس من اقربو منو ووقفوهم بعيد
خالد الضابط يحقق مع الناس قال ليهم اول زول شافو المكتول منو قالوا سر الختم ود الشيخ وسر الختم اكان قاعد الضابط جابو وقال ليهو شفتو متين قال ليهو كنا انا ومحمود ود حسن صاحبي جايين من برة الحلة وعيني للزول راقد اول حاجة انا قايلو زول سكران ما قايلو مكتول قلت لمحمود دا شايف الزول الراقد جمب الترعة داك ورح عليهو نشوفو منو والمرقدو هنا شنو في الليل ومحمود قال لي بكون واحد من السكارى الحيارى ديل السكرة رمتو في الفجة دي
مشينا عليهو وكانت الفجة مضلمة اتكلمنا معاو ما رد علينا قربنا منو لقيناهو ميت مشينا بلغناكم
- هبشتوهو وللا ما هبشتوهو ؟
- هبشناهو لانو اكان راقد علي بطنو ونحن قلبناهو عشان نعرفو دا منو لمن لقيناهو مكتول وهدومو مليانات دم جرينا القسم بلغناكم
- ما شفتوا ليكم زول قريب منو وللا واحد لاقاكم بعد الترعة ؟
- لاقانا التوم ود حسب الرسول لكن ما ظنيتو كان عارف حاجة وكلمناهو بيهو قال ما تهبشوهو عشان البصمات وهو زاتو مشى معانا ليكم لكن ما رجع معانا
الضابط قال وين التوم ود حسب الرسول دا والتوم جاهو قال ليهو انا موجود يا جنابو
- اكنت وين بفليل لمن الناس ديل لاقوك ؟
- مشيت ناس علي صاحبي اكان عامل ليهو شكلة مع سليمان ود خالتي وهسي هو مسجون من امس وانا لمن مشيت مع ديل عشان نكلمكم عرفت علي هناك قنبت اتكلم معاهو ومشيت جبت ليهو عشاء
البوليس بعد رفع البصمات شالوا الجثمان وفاتوا
الضابط قال لواحد من العساكر جيب لي علي من السجن
علي جابوهو للضابط وقال ليهو شاكلت سليمان في شنو يا علي ؟
- يا جنابو شكلة عادية دي والحلة كلها مشاكل زي دي
- عادية كيف وانت طعنتو بمطوة
- اي عادية من زمان ناس الحلة كلهم بتشاكلوا والطعين دا عادي وانا ما طعنتو جرحتو في يدو ساي عشان قل ادبو علي
- السبب شنو الخلاكم تتشاكلوا ؟
- براهو جاني وقعد يضارب وانا ولا سألتو كنت مع التوم وابوهو في بيتهم
- الكلام دا ما بحلك يا علي والعرفتو انا انو حسب الرسول كان مطعون في كتفو وانت علي وديتوهو الدكتور بعربية السيد صاح وللا ما صاح الكلام دا
- صاح اي لكن هو ما كان مطعون
- ما كان مطعون كيف وانتو مودنو الدكتور لكن دا هسي ما المشكلة والمشكلة انك ما مشيت معاهم الدكتور ونزلت منهم جمب الترعة قلت بطنك مغلباك ومشيت كتلت الزول
- زول منو الكتلتو يا جنابو انا ما كتلت زول
- وبعد كتلت الزول جمب الترعة مشيت عملت ليك شكلة مع سليمان عشان تبيت في السجن وما نشك فيك
- لا حولااا دا شنو دا الكلام دا يا جنابو انا ما كتلت اي زول
- احسن حاجة تعترف بس يا علي لانو مافي زول غيرك كان جمب الترعة ساعة الزول اتكتل في حلتكم
- الزول منو هو زاتو المكتول دا
- بتعرف بعدين ما هسي ويا عسكري تعال ودي علي دا السجن وما في زول يعرضو علي القاضي لانو متهم
- يا جنابو انا ما كتلت زول ما تورطني ساي في حاجة انا ما سويتها
- بعد التحقيق ونعرف المكتول دا منو والجابو الحلة شنو لينا كلام تاني معاك
العسكري ساق علي دخلو الحراسة وعلي يتكلم والله انا ما كتلت اي زول ولا عارف حاجة والله
والضابط شال صورة المكتول واداها العسكري وقال ليهو سوقو الدورية وامشى الحلال القريبة من الحلة الانكتل فيها واي زول يتعرف علي المكتول دا كلمو اهلو وجيب منهم اخوهو وللا ابوهو وللا اي زول قريبو عشان نعرف الوداهو الحلة دي شنو والضابط ركب دورية تاني مشى لحسب الرسول ود الطيب في بيتو
بعد سلم عليهو قال ليهو الزول المكتول دا بتعرفو وللا ما بتعرفو يا حسب الرسول
- بعرفو بالحيل اسمو الباقر ود اللغيبش من حلة النعيم وهو الطعني في كتفي امس بالليل وكان داير يكتلني لكن الطعنة جاتني في كتفي وهو قام جاري وانا ما جريت وراهو ولا عارف الكتلو منو
- الكتلو بتعرف ومصيرنا نعرفو لكن هسي انت لازم تمشي معانا المركز عشان نكمل التحقيق هناك
التوم كان قاعد وقال ليهو يا جنابو ابوي كان معاي امس وانا الوديتو الدكتور الضابط قال للتوم انت زاتك تمشي معانا لانك برضو متهم زي ابوك وعلي وانا متأكد فيكم واحد كتلو
حسب الرسول قال للضابط ولدي دا ما عندو اي دخل في الموضوع دا ولا عارف عنو شي ودي مشكلة قديمة والزول دا جاء الحلة دي عشان يكتلني لكن انا ما عارف زاتي الكتلو منو الضابط قال ليهو الكلام دا كلو بتعرف هناك بعد التحقيق وبعد يجوا اهل الميت
التوم وابوهو ركبوا مع الضابط في الدورية ولمن وصلوا المركز الضابط قال للعسكري ودي ديل الحراسة واي واحد خليهو في حراسة براهو ما تقعدوهم مع بعض في زنزانة واحدة وعلي زاتو ما تخلي واحد فيهم معاهو
الضابط جاب الدورية وركب مشى علي حلة النعيم عشان يكلم اولاد اللغيبش بكتلة اخوهم ويحقق معاهم في السبب الخلاهو يجي من هناك ويطعن حسب الرسول في بيتو
يتبع....
