#الدم 16
مجاهد يوسف
ضربة حاج السر وسرقة بيتو دي عمر اصلو قال ما بخليها تعدي ساي وقال للمين ومحمد مافي حل غير نتف الضب لمن يعترف لينا بالعملو كلو ونبلغ البوليس اول
الضابط سمع بفلقة حاج السر قام فات ليهو في المستشفى زارو وقال ليهو ما تشيل هم نحن قاعدين نفتش للحرامي
حاج السر قال ليهو الحرامية قول لانهم اكانو تلاتة وسرقوا الدكان والبيت ما خلوا شي
_انت صحيت بيهم وللا ضربوك كيف
_ما صحيت بيهم لكن ضربوني وانا نايم ما شفت غير تلاتة انفار وكانوا مكمكين
اللمين وعمر والسر ساقوا برهان بالليل من الكمبو ومرقوا بيهو بيت خلف الله اصلا هو في طرف الحلة وفاضي من يوم خلف الله انسجن مرتو بت اللغيبش ابراهيم ساقها هي واولادها من بيتهم قال ليها تقعدي في بيت ابوك لمن راجلك يجي ما تقعدي براك والبيت بقى فاضي
اول ما عمر واصحابو فتحوا بيت خلف الله ودخلوا فوقو برهان لقوا الحاجات الانسرقت من بيت السر ودكانو كلهن فوقو وبرهان قبال يدقوهو اعترف وقال لعمر دا ابراهيم اخوك القال لينا اسرقوا
عمر فكاهو وقال ليهو امش لكن لو طلعت من الكمبو بنكتلك والضب فات جري ورسل واحد من جماعتو كلم ابراهيم بانو عمر عرف كل شي
ابراهيم طوالي قال ليهو امرق من الكمبو سافر اي مكان بعيد
اللمين قال لعمر اها نعمل شنو هسي المشكلة مافي المسروقات في ضربة الراجل الكبير دا
عمر قال ليهم نبلغ البوليس بس
محمد قال ليهو اخوك بنسجن لكن لو بلغنا
_بس اخوي غلطان وحرامي والمجرم لازم يتعاقب
برهان مرق فات وديل بلغوا البوليس وجاء الضابط خالد زاتو معاهم وابراهيم نكر مافي دليل عليهو بعد برهان فات
والضابط قال ليهو الحرامية كيف دخلوا المسروق في بيت خلف الله
ابراهيم قال ليهو بيت مطرف وفاضي مافيهو زول واحتمال يكونوا عمر اخوي دا زاتو واصحابو هم السرقوا لانهم اكانو تلاتة
_عرفت كيف انهم تلاتة يا ابراهيم
_لانو ال ال الحاجات دي كتيرة زول واحد ما بقدر يشيلها عشان كدا
الضابط اتأكد انو دا ابراهيم تب لكن مافي دليل يثبت عليهو
حاج السر رجعوا ليهو حاجاتو وطلع كويس من المستشفى وقال عافي لكن ابراهيم كان مصر انو ديل عمر واللمين ومحمد والضابط قفل الموضوع بس عرف انو ابراهيم دا زول ما ساهل
خلف الله الكليب مرمي في الزنزانة اسبوع مافي زول حقق معاهو ولا في زول كلمو وبقى قلقان ما عارف يعمل شنو والضابط قرر يلعب باعصابو قام رسل جابو عشان يحقق معاهو اول ما دخلوهو عليهو قال للعسكري دا شنو يا عسكري انا قلت ليك ابراهيم ما خلف الله تجيب لي خلف الله دا لسع دورو ما جاء رجعو رجعو وجيب لي ابراهيم عشان يكمل اعترافو
خلف الله قال للضابط ابراهيم مسجون برضو
الضابط قال ليهو مسجون ليهو تلاتة يوم واعترف كمان ما تعبنا زيك
_اعترف بشنو يا جنابو ؟
_بكل العملتوهو انت وهو من غريقكم الطيب راجل بتول لحدي كتلة الباقر
_الباقر الكتلو منو ؟ والطيب منو الغرقناهو ؟
_يا عسكري رجع المجرم دا وجيب ابراهيم
العسكري رجع خلف الله وجاء للضابط يضحك
خلف الله محبوس في حبس انفرادي وممنوع من الزيارة ولافي زول يتكلم معاو ولا عارف بمرق متين وكلام الضابط جننو جن وخاصة لمن قال ليهو غريقكم للطيب احتار زيادة وقال دا مافي زول عارفو غير ابراهيم نهائي واحتمال ابراهيم يكون رماها فوقي انا ، اصلا هو اناني وزي الحربوية متلون وما بعيد يكون رماها فوقي وهو صاح انا الغرقتو لكن هو كان معاي ما براي ، خلف الله بقى يكلم في روحو مرات يشك في ابراهيم انو ورطو ومرات يشك في الضابط ويقول دايرني عشان اعترف ليهو وانا لو ما شفت ابراهيم بعيني جوة السجن ما بصدق كلام الضابط دا لانو أكيد دايرني اعترف ليهو
تاني قال بس عرف غرقة الطيب من منو ؟ لا لا اكيد ابراهيم هنا بس كيف اعرف انو ابراهيم هنا لازم اشوفو
الضابط قال لعسكري تاني لمن تمشي علي السجن تودي للمساجين الغداء خلف الله بسألك من مسجون اسمو ابراهيم قول ايوة في واكان في المكتب والضابط بعد رجعوك هنا ودوهو ليهو يحقق معاهو وقول ليو كذا وكذا وكذا...
وفعلا العسكري اول ما دخل لخلف الله الغداء سألو
_اسمع بسألك من مسجون اسمو ابراهيم
_مالو ؟
_في مسجون اسمو ابراهيم وانسجن متين ؟
_انت يا زول مجنون السجن دا ملان مجرمين ومساجين انا بعرف اساميهم كيف
_لا لا دا انسجن ليهو تلاتة يوم في جريمة كتل واخوهو انقتل
_ما بعرفو لكن في واحد ليهو تلاتة يوم صاح بعد انت ما جابوك قبيل دخلوهو مكتب الضابط وسمعت انو بعد دقوهو اعترف انو غرق ليهو واحد زمان وكان معاهو نسيبو من حلة اسمها حلة النعيم
خلف الله نطط عيونو كبار وقعد يبلع في ريقو والغداء غلبو ياكلو
العسكري فات للضابط وقال ليهو الفار بلع الطعم
الضابط قال بعد كدا اخليهو يشوف ابراهيم جوة السجن عشان يعترف جد جد
وقعد يفكر في طريقة يدخل بيها ابراهيم السجن ويخلي خلف الله يشوفو جوة
يتبع .....
