#الدم (١٩)
مجاهد يوسف
الضابط خالد غلبو زاتو البسويهو وفتر من التحقيق الكتير واحتار في المشكلة الجديدة دي وشعر بإنو القضية دي متشعبة شديد وقدر ما يمسك ليهو خيط ويقول يباريهو عشان يوصلو يجيهو خيط تاني جديد ويدربكو
قعد يفكر وكان في البيت جاتو مرتو منال قالت ليهو مالك سارح بعيد كدا
قال ليها القضية الماسكها دي بتجنني لمن كنا مع حسن صاحبي خلف الله مرق من السجن واليوم التاني من مرقتو في زول طعنو وطعن معاهو ابراهيم ، اول انا قلت دا الصديق وهو الوحيد الشاكي فوقو ممكن يعملها بس الصديق زاتو أكان في السجن و مافي زول غيرو بفكر يطعن ديل دا من جانب مشكلة الطيب ، ولو قلت دا زول من حلة النعيم يكون الزول دا منو و ليه انتظر لمن خلف الله يمرق حتين طعنهم الاتنين ؟ و منو القتل الباقر و منو ومنو و منو ؟
منال قالت ليهو خليها علي الله وكاتل الروح ما بروح مصيرو ينكشف ويا ما في قضايا وجرايم اغرب واكعب من دي اتحلت ما تتعب نفسك بالتفكير ساي ان قوم اعمل ليك شاي
خالد يفكر ويفكر وطوالي غير هدومو وركب عربيتو وفات الشاي ما انتظرو مشى المستشفى لابراهيم وخلف الله لقاهم خرجوهم وفاتوا اهلهم مشى ليهم هناك في اهلهم لقى اي واحد راقد في بيتو بدا بأبراهيم قال ليهو الحصل شنو بالتفصيل
_امس بالليل كنا انا وخلف الله قاعدين نتونس معانا ابراهيم ود الباقر اخوي قاعدين في بيت خلف الله و ابراهيم جاء هني قدامي ومرقنا بعدو بشوية انا وخلف الله واقفين في الشارع جاء واحد جاري علينا ما انتبهنا ليهو كويس ولما فينا طعين
_ما عرفتو منو ؟ طويل قصير من الحلة من برة؟
_الفجة اكانت مضلمة ما فرزتو بعدين بعد طعنا جرى سريع ما فرزتو ولا متذكر شكلو كيف
_بتتهم منو ؟
_ما في زول اتهمو ولا بتهم ساي
الضابط مرق من ابراهيم وفات بيت خلف الله وخلف الله من شافو بطنو طمت قام قال للضابط و ديني السجن سوقني معاك انا ما داير اموت مطعون اريتني لو ما مرقت
الضابط سألو عن الحصل قال نفس كلام ابراهيم زاتو ما نقص منو حرف ولا زادو وقال ما بتهم زول برضو
الضابط جاب ابراهيم ود الباقر ولد شراني شايل طبايع عمو وخلف الله الاتنين
قال ما شاف اي شي ولا متهم زول
الضابط رجع بيتو والصباح مشى طلع الصديق وطلع علي برضو
علي صاحب التوم ود حسب الرسول لقى مافي داعي لسجنتو وهو مشكلتو بسيطة جاب سليمان ود خالة التوم وقال ليهم اتصالحوا هنا وكتبهم الاتنين تعهد انو ما يتشاكلوا
علي مرق فات الحلة والضابط قال ليهو لو ماشي اي محل ما تمشي الا تديني خبر
وما عندك اي شغلة بقضية حسب الرسول والتوم ولدو وما تدخل نفسك فيها
علي قال ليهو خير وعديلة تب
بهناك ابراهيم وخلف الله اجتمعوا وقعدوا يتضاحكوا ساي وقالوا نسكت من القضية كم يوم ونبقى في شغلتنا بس وبعدها نكمل باقي خطتنا
عمر ود اللغيبش قاعد مع حسن و محمد اصحابو ومحتار زي الضابط في الاحداث الاتراكمت فوقهم فجأة دي ولا عارف يعمل شنو
محمد قال ليهو مالك يا عمر
_داير اسافر والله واسيب البلد دي
_تسافر وين يا زول وتخلي الدنيا مقلبنة كدا
،مافي حل غير اسافر بعد الحاجات الغريبة الشفتها دي
_ شفت شنو تاني ؟
_ لا لا دي لو قلتها ليكم بتقولوا كضاب
_ قول ساي والله حاشاك
_ابراهيم اخوي وخلف الله مافي زول طعنهم
_معقول؟
_اي والله ولو ما شفتهم بعيني ولا بصدق ، امس قلت امشي علي بيت خلف الله ازورو بعد طلع من السجن سمعتهم يتكلموا قالوا كلام غريب وبعدها جابوا العربية وقالوا بعد نقرب من المستشفى اي واحد يجرح روحو ونقول طعننونا
_انت بصحك آ عمر ؟
_ما قلت ليكم ما بتصدقوني
_وبستفيدوا شنو من الحكاية دي
_ما عارف والله بس بخططوا لحاجة ما عارفها شنو الناس ديل اكعب من ابليس والله انا زاتي خفت منهم
_لا لا دا كلام عجيب لازم ندي الضابط خبر
_والله يعرفوني عرفتهم وكلمت الضابط الا يكتلوني في روحي عشان كدا داير اسافر
_والبوريهم منو ؟نحن نكلم الضابط بس ونعمل العلينا
علي مشى للضابط وزار التوم وابوهو وقال للضابط انا ماشي الخرطوم اشوف لي شغل قال ليهو امشي
علي فات لسعد ود أمحمد في بيتو وحسب الرسول هو الرسلو ووصف ليهو فجتو
يتبع....
