#الدم (٧)
مجاهد يوسف
التوم بعد سمع كلام علي وعرف منو القصة كلها قال ليهو انا ماشي الحلة التحتانية الاقي اولاد اللغيبش ديل واشوفهم ناوين علي شنو
علي احماهو وقال ليهو والله لو قلت ليك بخليك تمش ليهم كضبت عليك
_يعني دايرني اقعد ساي كدا لمن يكتلوا لي ابوي
_اها يعني مشيك ليهم بغير شنو؟
_والله ابوي دا لو الناس ديل فعلا ناوين يكتلوهو بتعبوا معاي
_التوم ابرد يا اخوي خلينا نشوف لينا طريقة نمنعهم بيها من الوصول لعمي حسب الرسول اول
_ابرد لمتين احسن امش اتكلم معاهم واقعدهم في فجتهم دي واوريهم نحن شنو
_كدا انت ماشي ليهم زول مشاكل يا التوم اخوي أقصر الشر
_الشر جانا في فجتنا وكايسنا يا علي ، نجر منو وللا نتصدالو
_نتصدالو حرم وانت عارفني ما في شيتن بخوفني
_خلاس خليني انمشي عليهم اتفاهم معاهم
_واكان ضاربوك ؟
_يمين الواطة ما بتفلل عليهم وسكيني دي علا تخلي دمهم يشر جتك عليهم
_دا الما دايرك تسويهو زاتو اصبر اصبر لمن ابوك يجي وحرم البرشو بموية الا اشرب دمو قبالك ، انا اخوك آ التوم
سليمان ود خالة التوم جاء لقى علي والتوم يتكلموا وسمع طرف الكلام قال ليهم في شنو ؟
التوم قال ليهو مافي حاجة مافي حاجة
_مافي حاجة كيفن سمعت طرف كلامكم انا دايرين تكتلو منو
علي زي التوم صاحبو ما بريد سليمان دا كلو كلو قال ليهو امش شوف شغلتك ها دا كلام رجال انت شن دخلك فوقو
كلام علي زعل سليمان وقال ليهو قصدك شنو آ المرمد
التوم قام قال لسليمان امش آ ود الخالة مافي عوجة ما بندور نكتل زول قاعدين نتونس ساكت
_امش شنو ماك سامع صاحبك الحيوان دا قال شنو
_ امسحها لي في وشي انا يا ود خالتي علي بهاظر ساي
علي قال ليهو عليك النبي يا التوم اكان ما خليتو النشوفو بدور يعمل شنو
التوم ساق سليمان وقال ليهو ورح ورح مافي داعي للمشاكل انت علي ماك عارفو بنضم ساي
سليمان قال لعلي بأدبك يا حيوان وفات
التوم قال لعلي ما كان تقول ليهو كدي ياخ
_والله الزول دا شدة ما بكرهو داير لي شكلة معاهو من زمااانك اكان تخليهو عشان زعلتي دي افشها فوقو
_ما ناقصين ياخي خلينا في اولاد اللغيبش الوهم ديل انا ما بسيبهم والله
_التوم والله ما بخليك تمشي ليهم
_يمين بمشي وبكرة من الصباح واكان ابوي ما جاء الليلة ياني الماشي ليهم
_خلاس الحجل بالرجل وانا معاك والله وان درت هسي قوماكا
_قوماكا عليهم
التوم مشى شدا حمارو وعلي برضو شدا حمارو ودرعو سكاكينهم فوق ضرعاتهم وشالوا عكاكيزهم وفاتوا
سعد ود امحمد فرحتو شوفة حسبو فرح شديد خلاس واتونسوا سواء لمن قالوا بس
وحسب الرسول قال ليهو انا مرقت من الحلة عشان كلامك اها انت المرقك منها شنو ؟
سعد قال ليهو مرقت وكست ليك لمن قلت بس كنت دايرك ترجع ، بعد انت ما مشيت ابراهيم تهمك وثبت التهمة عليك تب ودفنوا اخوهم وقالوا ان ما كتلوك مافي زول في الحلة يجي يشيل معاهم فاتحة ولا فرشوا عليهو وانا كلام ابراهيم دا زعلني بالحيل منو لاني بعد كم يوم عرفت انو اتهمك زور وهو عارفك ما كتلت اخوهم
_طيب مالهم ما اشتكوني ولا بلغوا البوليس
_البوليس دا نهائي مافي زول جاب سيرتو ولا عارف شي
_اها واخوهم دا الكتلو منو ؟
_ما معروف علا هو اصلا أكان رمدان ساكت ومباري الكنابي غير السكر ما عندو شي واكيد كتلوهو في شكلة مع الناس البسكروا معاهو
_انا والله قصدت ما ارجع الحلة وما قصدت خوف من شي لانو اصلا ما عندي فوقها شي
_ما عندك فوقها شي كيفن اهلك نسيتهم ؟ عمك التوم نسيتو ؟
_عمي التوم دا الوحيد الما نسيتو والوحيد الاشتقت ليهو ومسمي ولدي عليهو
_ مشيت وين الفترة دي كلها وقضيتها كيفن؟
_ساقتني كرعي لحلة فوق كدي علي البحر ولاقيت فيها راجل ما بفضلو عليك علا حرم اكرم منو وارجل منو تب مافي واشتغلت معاهو في الحواشة هيلتو وبقاني زي ولدو وواحد وعندو بتين بقولن للقمرة انزلي وبقعدن في فجتها عرس لي منهن ام التوم الله يرحمو ويرحمها ناس احسن منهم ما لاقيت نسوني اي حاجة في الدنيا دي
بعد السنين دي كلها وعشان تعرف الحي بلاقي التوم ولدي ما عتر علا في اولاد اللغيبش وبالصدفة والغريبة لسة بجهلهم داك كايسين لي قالوا بدوروا يكتلوني فوق دم اخوهم المعولق
_الله يهديهم بس والكلام دا كلو من ابراهيم وخلف الله الكليب
_خلف الله الكليب دا زمانك دقيتو دقة لمن بكى بطول حسو قدام الناس ما بتتذكرها؟
_ههههههههههه الله يجازي محنك دي بتتنسي لمن قعد يكورك في نص الحلة وقال انا مرة موش
_بس ياها زاتها
_لكن تعال هني انا لسه ما عرفت سبب دقتك ليهو دي
_الكليب ما خبيث وخسيس خليهو السبب مافي داعي نحن كبرنا وزمنا فات
_لا حلفت عليك اكان توريني السبب أكان شنو
_ها ود امحمد مافي داعي
_لا يمين اكان توريني
_بتعرف ود اللمين النجار الاعمى؟
_بعرفو بالحيل الله يرحمو
_لقيت خلف الله الكليب بشاغل في واحدة من بناتو ودقيتو وقلت ليهو لو ما قلت للحلة دي كلها انك مرة يمين ما بخليك
_الله يلعنو الوسخ والله صدق السماهو الكليب
والله الكلب اخير منو اها عشان كدا كايس لكتلك
التوم وعلي بهناك وصلوا الحلة التحت والتوم كوكو كوكو بعكازو دق باب اولاد اللغيبش
يتبع....
