#الدم (٩)
مجاهد يوسف
حسب الرسول مشى مع التوم ولدو وعلي المستشفى بعد تعب وما كان راضي كلو كلو والجرح اكان بسيط لكن نزف دم كتير وقال ليهم اكان خليتوني ربطتها ساكت وكبيتو لي فوق الضربة دي حبة ملحة اخير لينا من الاسبتالية دي انا جني وجنها ونهائي ما بريدها وهسي بعملوها قضية ، التوم قال ليهو فعلا قضية والضربك شفتو وللا ما شفتو
_انا ما ضربني زول السكين حقتي اكانت تحت المخدة وما فوقها جراب واتاريها كانت مفندرة وانا رقدت فوقها
_ دا كلام شنو يا حاج الطعنة دي طعنة زول عديل
_يعني ابوك كضاب ؟
_ما قصدي يا ابوي بس دي جريمة ما تسكت عليها والطعنة دي اكان ما جاتك فوق كتفك اكانت كتلتك
_علي الطلاق ما بخش الاسبتالية عشان كضيبك لي دا
علي قعد يضحك وقال للسيد سيد العربية رجعنا ودينا لود الماحي خليهو يربط لعمنا دا الجرح ويكتح ليهو فوقو ملحة زي ما قال
التوم زعل من كلام علي لكن علي قال ليهو الدكتور بقول داير اورنيك تمانية من البوليس ارجع ارجع يا السيد
حسب الرسول اتكيف من كلام علي وقبل يدخلو الحلة علي قرص للسيد ومع هدينتو في الكنار تلب من العربية وقال للتوم بجيكم في بيت ود الماحي انا بطني دي الليلة مغلباني وفاتوا خلوهو
وصلوا بيت ود الماحي ونضفك نضفك ود الماحي نضف الجرح وربطو وقبل يربطو اداهو حتة كوية بالنار وحسب الرسول قال للتوم بعد مرقوا من بيت ود الماحي وماشين علي بيتهم خشمك عندك والجرحة دي ما بدور زول يعرفها من ناس الحلة ديل ولا قصتي مع اولاد اللغيبش لمن نشوف لينا معاهم صرفة
التوم قال ليهو سمح لكن وريني الضربك بالسكين دا منو فيهم
_دا الباقر وغدرني غدر وما عارفو عرف بيتنا دا كيف ، انت الناس ديل باروك وللا جوا الحلة دي ساعتي الانا مافي ؟
_ما فيهم زول باراني وانا الباقر دا لو لاقيتو ما بعرفو بعرف ابراهيم وخلف الله ياهم الشفتهم بس
_لكن عرف بيتنا دا كيف المرمد دا
_انا مافي عرفتو للبيت لانو البسعل اي زول بوريهو بس انا في طعنتو ليك دي كانت كيفن
_لقاني منبطح وسمعت تبتو لكن قايلك دا انت ناغمت ليك التوم التوم جاني جاري طعني وقام جاري وانا ابيت اتكلم وابيت ألحقو خليتو يجري ساي ، علي صاحبك وينو
_علي دا انا ما مصدق نزل مننا عشان بطنو لانو من ما مرقنا من الحلة وهو يتلفت وحمد الله بكلامك لمن قلت ما بتمشي للدكتور وكان مصر اننا نرجع
_اوعى يكون نزل عشان يلحق ود اللغيبش
_ما بعيد والله انا جاري لاحقو
_أجر أجر الحقو ما يجيبلنا كفوة في الليل دا وشيل معاك عكازك
التوم لفح عكازو وفتحتو للباب لقى علي في وشو
_وين مشيت انت ياخي حالتي دي مارق لاحقك
_ما قلت ليك بطني مكركبة ومغلباني ، اها عمي جرحو كيف مشيت ليكم بيت ود الماحي قال لي جرح بسيط وعالجو الحمد لله
حسب الرسول ناغم لعلي وقال ليهو خابرك ما بتكضب آ ود اخوي ، مشيت وين
_اكضب في شنو بس بطني زرتني ساكت كدا تلبت منكم ، مالكم في شنو ؟
_لا لا مافي شي ان كلامك دا صاح
_والله حيرتوني زاتو
سليمان دقتو للتوم مكيفاهو كيف شديد وجاء شارع ناس حسب الرسول اكان مباري علي وقال بعد يمرق يدقو زي ما دق التوم
وعلي قنب مع التوم وابوهو شوية ومرق منهم فايت علي بيتهم في الفريق داك ،والدنيا كانت مضلمة والحلة صانة الا نبحي الكلاب لكن الناس ما فيهم زول حايم وعلي كان شايل ليهو بطارية حجارها كملنات ضو زاتو ما فوقها طقطقها لمن لقى ما منها فايدة ختاها في جيب السديري وفات
قبل يصل بيتهم في فسحة كبيرة ما جمبها بيوت لمن علي وصلها سليمان قال ليهو اقيف يا حيوان
علي وقف وسليمان وصلو وقال ليهو قبيل بتتراجل علي مالك قايلني بخليك ؟
_اها وهسي داير تعمل شنو؟
_داير اوريك رجالتك دي ما علي انا واعفص ليك نخرتك دي في التراب
_امش يا سليمان بحلاتك دي ما تخليني اخش فيك السجن
_السجن انا البخشو فيك
وسليمان رفع يدو عشان يضرب علي وعلي خمشو بنية في وشو جدعو هناك لمن رعف ولقى ليهو مطرق في الواطة قلس بيها سليمان قلس لمن خلاهو يتمرصع ويكورك وكوراكو لملم فوقو الناس وسليمان طوالي من شاف الناس جرى للسيد ركب في عربيتو وقال ليهو وديني المركز ، علي جرى ليهو في العربية وكان شايل ليهو مطوة طعن بيها سليمان في يدو وقال ليهو الليلة بكتلك
سليمان شهد الناس ومشى يبلغ
علي وصل البيت التوم جاهو وقال ليهو دا الشنو السمعتو دا ؟
_ههههههههههه ياخ ود خالتك العوير براهو جاني
_بعد دقيتو لحقتو لشنو وطعنتو بالمطوة
_عشان يجيب البوليس في حاجة كبيرة شوية ما يقول ليهم دقاني
_كدا ما بسجنوك
_ما يسجنوا المشكلة شنو
البوليس جاء ساق علي ودخلوهو الحراسة لمن الصباح يحققوا في المشكلة دي
الصباح الحلة صحت والناس كلها جايطة وكلهم جمب الترعة والحلة مقلوبة فوق تحت وملانة بواليس
قالوا لقوا ليهم واحد غريب مطعون ومكتول ومجدوع جمب الترعة ومافي زول من الحلة بعرفو
يتبع....
