#زوجي_الكبير
#الحلقة_48
" لله ما نحن به ، لله عيوننا المتعبة ، قلوبنا المرهقة ، لله أملنا و ألمنا "
#وصال
رفعت راسي و بهتت في اعيونه اللي كانن يستنن في جوابي بفارغ الصبر
تنهدت للمرة الالف ل هاليوم ..وحكيت بصوت استغربت ان طلع مبحوح : انا احم احم .. وبهتت فيه : ايهم انت مش حا تكسرني من جديد صح ؟؟ و نزلن ادموعي
ايهم قرب مني و هو ماسك وجهي بين ايديه : مستحيل ان شاء الله يارب انموت لو اذيتك من جديد لو مش اذيتك لو حتي فكرت في هالشي مجرد التفكير بس
لا اراديا ضربته ع كتفه : بعيد السو ما اتقولش هك
ايهم ضحك
انا رفعت يدي و مسكت يده و نزلتها بين ايديا : اللي صار كسرني بجد و قاعد بين اعيوني في كل لحظة
حسيت بيده شدت علي ايديا
غمضت اعيوني و خديت نفس و رديت فتحتهن : بس حا نستني انك اتنسيني كل اللي صار .. و رفعت اعيوني له :حا نستني انك تطوي هالصفحة من حياتي و اتبدل السواد اللي فيها ب لون تاني احلي
و كملت كلامي بهدؤ : عارفة ان البعد و البكاء مش حل لاي مشكلة و التمني و التحسر حا ايزيدو وضعنا سوء و ان التفاهم و الهدؤ و القرب هم الحل الانسب حتي عشان ولدنا اللي بيجي ع الدنيا
و مش عارفة من وين جتني القوة اللي خلتني نبتسم و انا انبهت فيه انصدمت بجد في قرارة نفسي من داخلي ان ابتسمت رغم الوضع الصعب و السئ و اللي تحت السئ بمليون مرة اللي انا فيه
يمكن الحب الكبير اللي انكنه له في داخلي ساعدني .. مافهمتش
بس لقيت ان البكاء .. انا بكيت واااجد .. العياط .. عيطت لحدت صوتي راح ... التحسر .. تحسرت واااجد .. التمني ... هلبه تمنيت .. بس
حسيت كل مرة ايزيد الوضع سوء .. كل مرة نتعب اكثر من اليوم اللي قبله .. حبه #بلاء .. كبير ما نقدرش عليه .. مرض انصبت بيه و مافيش له علاج .. يتغلغل فيا
ايهم مسك بيدي : انا مصدوم انك تحكي في هالكلام رغم صغر سنك
ابتسمت بهدؤ : عادي بابا علمني هالشي كان يحكيلي ان المشاكل اللي كانن ايصيرن امعاه هو وماما و كيف كانوا هم الاتنين ايحلوا فيهن تعلمت هالشي منهم
ايهم حط شفايفه ع خدي و حسيت بإبتسامته ع جلدي من كلامي .. بلعت ريقي بتوتر
غمضت اعيوني بقوة لما حسيت ب بوسة ع خدي منه .. و تدرج لين وصل ل رقبتي ... حسيت روحي سحت بين ايديه
كيف انقلب الوضع مش عارفة .. في لحظة كنت ع السرير وهو فوقي و دافن وجه في رقبتي
فجآة اجتاحني خوف كبير و حسيت اللي صار رد بين اعيوني
معاش دريت علي روحي الا وانا امبعده ايهم و اموخره لنهاية السرير و انا نتنفس بقوة و ادموع تجمعن في اعيوني : ايهم
و بلعت غصتي : انا قلت ان نبدو من جديد بس ممكن لو سمحت
ما نستاعجلوش يعني في المواضيع هذين
بانت الصدمة ع ملامح ايهم : انا انا اسف .. و قرب مني مسك يدي : انا اسف يا وصال انجرفت انا بجد اسف خلاص وعد مش حا يتكرر مرة تانية
خديت نفس و هزيت راسي
ابتسم و حط جبهته ع جبهتي : باه ممكن نتمشوا برا ؟؟ انا جيت نبي نحكي و فجآة نتثاوب .. حطيت يدي ع فمي و بعدها حكيت بصوت مليان نعس : مش قادرة نتحرك رجليا يوجعوا فيا هلبه يا ايهم و ميته نعس
ايهم بصدمة : مالكش اشوي كيف نايضة ؟
