#ابتليت_بيك " الجزء 2 من رواية زوجي الكبير قصص و احداث جديدة "
#الحلقة_1
و كا بداية كانت غريبة 🍃 : هيا انزلوا وصلنا
طلعت من سرحاني علي صوت بابا .. بهتت و لقيت أن وقفنا قدام عمارة طويلة و كان قدام العمارة ساحة كبيرة ... امدرسات فيها شاحنات اكبار و فيها شجر
تنهدت و فتحت الكرسي اللي قدامي و نزلت من الباب اللي كان مفتوح
بابا وهو ايطلع في المفتاح و ايمد فيه : خوذي يا نيرة ( اختي الكبيرة ) هذا مفتاح الشقة في الدور الثاني و انا توا أنزل الدبش
نور ( اختي الصغيرة ) بوزت : بس يا بابا واجد عليك خلي انساعدوك
بابا بحنان : لا عادي أنزله غير انتوا اركبوا بس
نيرة وهي تمشي للباب : تمام هيا يا بنات
مشينا وراها و خشينا للعمارة .. ركبنا الدروج وكان
هدوء مافيش ولا صوت
وصلنا لدور التاني .. وقفت نيرة اتبهت في البابين اللي امقابلات بعض
نور ب حيره : أي شقة فيهم ؟؟ نيرة بهدؤ : مش عارفة ماقلش بابا
تنهدت و قعمزت علي الأرض عند أول درجة من فوق و ضميت رجليا و اتكيت علي الساس ورائي : طيب خلي نستنوا لحدت ما ايجي بابا
نور قلبت اعيونها : لا طبعا
انا بهزو : هااااا املا شنو يا أبلة نور
نور برفعة حاجب : لازم نعرفوا برواحنا أي شقة مش ضروري انتعبوا بابا اكتر
انا ضحكت : هذا الوضع لما يقعد اللي امعاك عقله اصغير
نور بتعصيب : ما تضحكيش بعدين انتي اللي عقلك صغير يا مستفزة
نيرة بلعت ريقها : بنات اصواتكن الناس تسمع
حكيت بتعصيب و بلا تفكير : شوفي اختك اصغر مني فرضا تحترمني الا باللسان هالطول هالمعاقة : غرام صوت بابا العالي و الصدمة اللي في وجه نور و نيرة فطنتني للكلام اللي قلته
عضيت شفتي وانا انشوف في نور اللي وخرت بالعكوز امتاعها و اعيونها رقرقن و التفتت علي الساس .. عطتني بظهرها
حسيت بندم فضيع جاني " استغفر الله ياربي .. عليك بخت "
قرب بابا و هو ماسك الشناطي لعند وصل لعندي
لف عليا .. و بهدؤ : حا نتكلموا في الموضوع يا غرام
بهتت للجيهة التانية بتوتر
كمل بابا طريقة لعند الباب اللي كان علي اليمين .. وقف قدامه و حط الشناطي .. ولف علينا : افتحي يا نيرة و خشي الحاجات
و بهت في نور و ب حنان : اتجي اتساعديني يا نونا
نور هزت رأسها بلا و هي تكتم في ادموعها
حسيت الموقف حرقني و انا انشوف فيها تمسك في ادموعها و ماتبيش تحكي عشان مايبنش في صوتها
بابا تنهد : طيب خشوا علي ما انجيب باقي الدبش
و بعد عن الباب و قرب نزل من الدروج بلا ما ايبهت فيا
صبيت شور الباب .. خديت شنطة اللي سيبتها نيرة بعد خشيت هي و نور
كان الباب لوح قهوي و فيه باب حديد للحماية لونه أسود .. خشيت و حطيت رجليا علي السجادة الصغيرة اللي قدام الباب .. و ايقابلني ممر
صغير لونه رمادي و الفرش أسود في رمادي .. و طول اول ما اتخش علي يمينك في باب .. فتحته و كان حمام باللون الأخضر .. تقدمت خطوتين و كان باب تاني
و هي المربوعة باللون الكريمي و الصالون نفس اللون .. و الستاير و الفرشة لونهن قهوي و تلفزيون
علي طاولة صغيرة .. ماكنش ابلازما التلفزون
كان مكتوب عليه " قاريونس " و شاشته كبيرة
كملت طريقي و انخش علي الصالة ايقابلني المطبخ اللي كان لونه أحمر
بهتت في الصالة و كانت فاضية مافيش لا صالون ولا تلفزيون .. ستاير و فرشة باللون الرمادي و خربشات عليها باللون الأسود
تقدمت كم خطوة و كان علي اليمين ممر عريض وقصير بنفس لون الصالة و نفس لون الفرشة برضوا فاضي و فيه ثلاث بيبان
باب في نهايته علي اليمين .. قربت فتحته و كان الحمام و لونه الأبيض .. وباب في صدر الممر و كان دار فاضية بي اللون الكريمي و فرشة قهوية .. و باب في نهايته علي اليسار .. قربت
فتحتها و نلقى نور علي سرير و نيرة جنبها
طول بهتت فيا نيرة .. نزلت اعيونها ل شنطة : هاذي ل بابا حطيها في الدار اللي جنبنا
هزيت راسي و رديت لدار حطيتها وطلعت .. لدار التانية واللي شكلها داري مع نيرة و نور .. بهتت و كان لونها كريمي و ستاير كريمي و سريرين من الخشب
القهوي و دولاب نفسهن .. و اتنين كومود و آمراية
امعلقة في الساس
و فرشة قهوية : هذا اللي قدرنا عليه
طول بهتت فيها و كانت نور حاطه رأسها علي كتر نيرة و نيرة تلعب ب شعرها
كملت نيرة كلامها : ماكنتش نبي بابا ايدير هذا كله
كنت بس نبي شقة بسيطة و عادية نقعدو فيه لعند انكمل 4 و 5 بشري و سنوات الامتياز
و انتي تقري التخصص اللي تبيه بعد كملتي انتي الثانوية و نور اتكمل اللي فاضل لها في الثانوية
قتله أن نحنا راضيين بأي شقة مش مهم انعيشوا في مكان فخم .. لأن نحنا امقدرين ظروف لبلاد و الوضع وان مافيش افلوس ... و تنهدت : بس عارض
و قال إن خلاص حا ننتقلوا هنا .. و رفعت راسها ليا : قال إن صح ما قدرش ايجيب شقة أو حوش في مكان فخم .. قالي علي الأقل اتكون الشقة حلوه مش
