اسكريبتات ل سلمى ياسر

اسكريبت 31

- ده خطب يا ياسمين! ازاي يعمل كده! ازاي يقهرني كده!
= سلامتك من القهرة يا سلمى، أنا قولتلك من الأول هو مش نصيبك
- بس ميخطبش أول ما نسيب بعض كده، ده كإنه سابني عشان يخطب!
= بصراحة أنا أتوقع منه أي حاجة
- أنتي بتقولي إيه! ده أحمد يا ياسمين، أحمد اللي مكانش بيعدي يوم من غيري، أحمد اللي محدش حبني قده، واللي قلبي مدقش غير ليه!
=بس هو مش بيحبك أنتي اللي بتوهمي نفسك، أحمد مش ليكي يا سلمى فوقي بقى كفاايه، ارحمي نفسك من حُبه
- مقدرش، والله ما أقدر، لو كُنت هعرف أعمل كده كنت عملته من زمان، من ساعة ما..ما سابني!
= أنتي كُنتي عارفه إنه هيبعد وكملتي
- كنت عايزه أكدب إحساسي، مكونتش عايزه أخسره
= خُسارتِك هينة عليه
- خلاص ..
( قومت من قدامها ودخلت المطبخ، عملت كوباية قهوة، كإني حالفة إني منساهوش، بشاركه القهوة حتى في غيابه )
= مش كفايه قهوة ولا إيه!
- بحبها
= قصدِك بتحبيه
( مردتش، أنا تعبت من إدماني الغريب ليه بس أنا بردو مش عارفه أتجاوزه! )

'' وقعتُ بِك حتى تناثرت أجزائي. ''

- أنا همشي
= طب باتي معايا
- هجيلك بكره
= طيب اللي يريحك
( سلمت عليها ومشيت بس مروحتش البيت، روحت أكتر مكان كُنا بنقعد فيه أنا وأحمد .. النيل ')
كان في صوت أغاني من مركب ماشيه في النيل وناس متونسين بـ اللي بيحبوهم، سندت إيدي على السور وافتكرت كل اللي حصل بينا من أول ما اتقابلنا، خناقتنا عشان خبطني بالغلط وانتهى اليوم بـ إننا مش طايقين بعض، ولما اتقابلنا تاني صدفة وضحكنا على هبلنا من غير كلام، ولما جيه ياخد مني البيبسي وغرقته بيه أحسن من أنه يشربه، ولما ..
• أنا مخطبتش ..
( أفكاري وقفت، جسمي كإنه اتشل مبيتحركش، أنا سمعت صح ولا بيتهيألي!! بس ده صوته، صوت أحمد ..، لفيت وشي لقيته قدامي و مفيش أي تعبير على وشه )
- بتقول إيه؟!
• بقولك مخطبتش
- وجاي تقولي ليه؟
• عشان بحبِك'')
- طب خبر خطوبتك ده كان إيه؟
• كنت عايزك تجربي مرة لما بتبعدي ببقى حاسس بـ إيه، لما بشوفك عايشه حياتك ومبسوطة وأنا تعبان إنك مش جمبي، كل مرة تبعدي وتسيبيني بـ قوة غريبة معرفش بتجيبيها منين ولما أجيلك بلاقيكي أضعف من الطريقة اللي بتخيلك بيها، المرة دي حسيت إن فترة بُعدك بتقرب فـ بعدت أنا ولما لقيتك مش فارق معاكي عملت إشاعه إني خطبت، بس رغم كل اللي كان فيا وإني كنت عايزك تجربي إحساسي في الوقت ده بس مقدرتش، مقدرتش أقسى عليكي و أوجعك، مقدرتش أعدي اليوم وأنا عارف إن وصلك الخبر وإنك أكيد زعلانه عشان رغم القوة اللي بتبينيها أنا بشوف حُبك ليا في عيونك، أنتي أضعف من الصورة اللي بتبينيها لـ الناس، و رغم إنك بردو مكلمتنيش عشان نتصالح أنا جاي أقولك آسف وياريت نتصالح '')
- أنا بحبَك ..
• عارف، بس عايز أشوفها في تصرفاتك، مبقاش أنا بس اللي بعافر
- متعملش حركة الخطوبة دي تاني
• هعملها في خطوبتنا
- مش زعلان ؟
• لا، بحبِك♥️

لولا وجودك ما حييت ♥️🌏
#سلمى_ياسر
" متنسوش لو عجبكم الاسكريبت تدعمونا بفولو ولايك 💛 "