اسكريبتات ل سلمى ياسر

اسكريبت 35

- عبدالرحمن هو انا كئيبه ؟
= لا
- طب نكديه ؟
= لا بردو ، ليه بتقولي كده ؟!
- عيطت ،، محدش بيستحملني يا عبدالرحمن .. عارف صحابي كلهم لما بيبقوا زعلانين بسمعهم واطبطب عليهم واطمنهم وافضل معاهم لحد ما يبقوا كويسين بس انا لا .. محدش بيعبرني ولا بفرق مع حد
= وانا لزمتي إيه حضرتك !!
- عارف يا عبدالرحمن انت الحلو اللي في حياتي مع إني لسه عرفاك قريب وكنت مسترخماك جدا بس بقيت صاحبي وقريب مني جدا .. بيست بيست يعني
= قلب البيست من جوا
- بصيت في الارض وضحكت **
=سلمى
- نعم
= انتي حلوة .. حلوة اوي والله وطيبه وحنينه ومش اي حد يستاهل إنه يبقى في حياتك انتي نعمة ل ناس كتير وحتى احمد اللي مرتبطه بيه ده ميستاهلكيش
- عبدالرحمن قولتلك متتكلمش عن احمد
= مبتكلمش عن حد انتي حره بس لو فكرتي كويس هتلاقي إن احمد مش موجود اصلا
- طب انا هقوم امشي احسن
= خلي بالك من نفسك يا سلمى
- حاضر
قومت مشيت ومهتمتش بكلامه انا شايفه إن احمد بيحبني وهو بيقولي انه بيحبني ومش عايز غيري طب .. انا هكلمه
< ايه يا سلمى
- ايه يا احمد انت فين ؟
< في النادي مع صحابي
- مجتش الجامعه ليه طيب ما انا قولتلك إني رايحه
< مليش مزاج يا سلمى هو انا لازم انزل عشان انتي نازله يعني !
- لا مش لازم ، سلام
< سلام
ممسكش فيا ! عادي كده اتحرق انا يعني ! اعيط دلوقتي ؟ يا عبرحماااان
= ايه يا حبيبي انتي فين دلوقتي ؟
- عبدالرحمن اتلم
= حاضر يا ست البنات ، بقيتي فين بردو ؟
- في الطريق اهو
= امم مش عايزه تروحي صح ؟
- عرفت منين !!
= انا البيست يا بنتي
- ده انت قلب البيست والله
= سلمى اتلمي
- يا عره
= يا روح قلب العرة ، استنيني في الكافيه اللي عندكو وانا جاي
- انت بيست قمر على فكره
= طول عمري
- على فكره انت بيست تفاح اصلا وانا مكنتش عايزه اقولك
= اقفلي يا لمضه انا جاي
- مستنياك يعم
= هطير يا قلب العم
بعيدا عن سخافه عبدالرحمن بس هو ملجأي الوحيد وبرتاح معاه جدا ، هو قايم بدور الاب والاخ والصاحب وبيبان انه قوي مبيتأثرش ،، بيبقى جايب اخره من الدنيا ومش طايق نفسه واول ما اقوله انا محتجاك يرمي كل ده ويسمعني ويحللي مشاكلي ، هو اعظم حاجة حصلت في حياتي وانا دايما فخورة بيه وبوجوده .. انا عندي بيست ميتعوضش
= بتفكري فيا صح ؟
- يخربيتك خضتني
= ايه اللي واخد عقلك !
- ملكش دعوه
=ماشي يا ستي مليش دعوه في ايه بقا مالك ؟
وكإنه داس على زرار العياط قعدت اعيط ومش عارفه انطق ،، مسك إيدي وطبطب عليها وفضل باصصلي كإنه بيقولي اطمني انا جمبك وكل حاجة هتعدي ،، هو عارف انا بحب احمد قد إيه واقل تصرف منه بيوجعني
= طب كفايه عياط عشان وجعتي قلبي ، ممكن تقولي في إيه ؟
- انا حاسه إن احمد مبقاش يحبني يا عبدالرحمن ، انا خايفه يكون بيحب واحده تانيه ومش عايز يسيبني بس عشان متعبش او ادمر هو عارف إن من ساعة موت بابا واقل حاجة بتوجعني وتتعبني وعارف إني بحبه وهتوجع .. تفتكر بطل يحبني
بصلي شويه وابتسم بحزن ""
= ده على اساس إن احمد حبك اصلا !
- يعني إيه ؟
= لما باباكي اتوفى ، كان موجود ؟ وقف جمبك ؟ سندك ؟
- بدموع ،، لا وموبايله كان مقفول
= لما تعبتي واتحجزتي في المستشفى كان جمبك ؟
- لا
= لما بتنهاري كده وتعيطي وتجيبي اخرك بتروحيله ؟
- لا بيقول عليا كئيبه
= يبقى عمره ما حبك يا سلمى ، اللي بيحب ده بيشيل الشيله كلها
- يعني إيه ؟!
= هقولك يا قمري يعني إيه ... اللي بيحب ده بيبقى شايف اللي بيحبه أحلى واحمل واحد في الدنيا حتى لو هو شخص عادي جدا ومفيهوش حاجة خارقه مثلا بس هو عشان بيحبه شايفه زي القمر حتى لو دبلان وبيعيط ولا حتى بيموت ده بعد الشر عن حلوتي طبعا ، هيسمع مشاكلك التافهه مع صحابك وهيهتم ومش هيقولك بلاش شغل عيال وتفاهات ، هيطبطب عليكي وهيهون عليكي الدنيا كلها ، هيبقى مكنفي بيكي انتي وبس وعمره ما هيرفع عينه في اي بنت ماشيه ولا يقولك حلوه البت دي ولا عنيها حلوه ولا القرف اللي كان بيعمله .. احمد محبكيش احمد كان معاكي عشان انتي بتحبيه زي ما بيقولو كده خد اللي تحبك
- وانا اختارت اللي بحبه !
= انتي جميله اوي يا سلمى ومشوفتش واحده بتخلص ل حد كده ، ده كان بيبقى غايب وبتسمعي كلامه .. الحاجة الوحيده اللي مسمعتيش كلامه فيها هي انا
- عشان انا مش هلاقي زيك وانت مش اي حد يا عبدالرحمن انت كل اهلي وصحابي ، ده انت بتطمن على ماما والدوا بتاعها اكتر مني
= متنسيش إنها امي انا كمان
- ياريت احمد كان زيك
= وياريتني كنت مكانه ، كان نفسي تحبيني انا نص الحب اللي بتحبيه ل احمد .. هو ميستاهلش الحب ده
- القلب وما يريد يا صاحبي وقلبي اختاره
= وقلبي اختارك ومش راضي بغيرك
- نصيبنا
= نقدر نغيره
- ازاي ؟
= تبعدي عن احمد .. مش عشاني عشانك انتي .. انا المهم عندي تبقي كويسه وطول ما انتي حابسه نفسك في دوامه احمد مش هتفوقي .. ابعدي عنه بالتدريج وانا جمبك ابوكي واخوكي وصاحبك بردو ، هفضل معاكي على طول ومش هسيبك تتوهي
- انا بحبك اوي يا عبدالرحمن
= كان نفسي تحبيني بدل احمد
- طب انا .. انا هقوم بقا امشي ووو سلام
= استني هوصلك واطمن على طنط
- لا خليك انا هروح انا
مشي من غير ما يتكلم ، هو انا ممكن اكون بوجع عبدالرحمن زي ما احمد بيوجعني ؟! بس احنا اتفقنا اننا صحاب وهو عارف موضوع عبدالرحمن من الاول ! يارب ارحمني
وصلنا البيت وطلع سلم على ماما واطمن عليها وقعد معاها شويه وقام مشي
كلمت رضوى يمكن اهدى شويه وكالعاده مغلق وهي دي اللي بيست تفاح فعلا .. اروح ل سمسيمو قلبي
~ ايه يا لوما
- بيست قمر  ،، بصي اتصرفي
~ مصيبه صح ؟ انا قولت انتي بتروحي تخربي الدنيا وتيجي
- هتسمعي ولا اقفل في وشك
~ بهزر خلاص احكي في ايه !
حكيتلها اللي حصل طول اليوم
~ انتي عايزه تقنعيني إنك بتحبي احمد بردو مش عبدالرحمن
- ايوه طبعا بحب احمد
~ سلمى يا حبيبتي
- ايه يا قلبي
~ انتي غبيه
- قلبي يارب
~ والله ما بهزر انتي فاكره نفسك بتحبي احمد ! انتي بعدتي عن احمد كتير على فكره وهو كان بيلاقيكي هتروحي من ايده ف ييجي يثبتك بكلمتين وانتي زي الهبله ترجعيله ، انتي بتحبي عبدالرحمن مش احمد ، تقدري تقوليلي مبتغيريش على احمد ليه وبتغيري على عبدالرحمن مننا حتى؟!!
- بغير على احمد على فكره بس انا عارفه انكو مش هتبصولو يعني
~ ده على اساس إننا ممكن نبص ل عبدالرحمن بردو !!
- لا مش هتبصولو بس عبدالرحمن البيست ومهم في حياتي جدا وقزيب مني اووي
~ وبتحبيه اعترفي
- بحبه عشان صاحبي
~ كدابه بتحبيه ومش بتحبي احمد ، انتي بتداري حبك ل عبدالرحمن في احمد بس انتي مش بتحبي احمد ، احمد بيغيب عنك كتير اوي يا سلمى وبتقولي مش مهم لما يفضى هيكلمني ، فاكره لما موبايل عبدالرحمن كان مغلق عملتي ايه ؟! كنتي خايفه عليه وهتموتي وعماله تعيطي وعايزه تروحيله شغله تطمني عليه وقرفتينا ، عايزه تفهميني إنك بعد كل ده مش بتحبي عبدالرحمن وبتحبي سي احمد ؟!!
- طيب خلاص اقفلي دلوقتي
~ هبله والله ، اقولك ؟ صلي واسألي ربنا
- طيب ماشي يلا اقفلي
~ ماشي سلام يا هبله
- سلام يا قلبها
قومت اتوضيت فعلا وصليت وسألت ربنا كتير ودعيت إنه يقرب مني اللي خير ليا ونمت
صحيت على صوت موبايلي
= سلمى انتي لسه نايمه !
- ايوه يا عبدالرحمن في ايه عمال ترن كتير ليه ؟!
= وحشتيني
- عبدالرحممننن
= خلاص خلاص ايه هتاكليني
- عايز ايه اخلص
= عايزك
- هقفل في وشك
= مش ههون عليكي
- وبعدين بردو عايز ايه
= قومي اتهببي اجهزي انا قولت ل طنط امبارح اننا هنخرج النهارده
- محدش قالي يبقى مش خارجه
= على فكره انا تحت بيتك ف يا نقومي تجهزي بالادب يا هطلعلك
- وتتعب نفسك ليه يباشا انا بلبس الكوتش اصلا
= ضحك * يلا مستنيكي ،، وقفل
نطيت من على السرير وكميه نشاط وفرحة وحاجة قمر خالص
لبست فستان اسود وفي ورد ابيض ولبست طرحه بنفس اللون ونزلت لقيته قمر يعني كالعاده ولابس بنطلون اسود وقميص ابيض "" لا مطقمين سوا حلو ""
= كل ده تأخير يا هانم وإيه الحلاوه دي كلها يا شيخه يخربيت حلاوتك
- ضحكت ،، اتأخر براحتي
= طبعا يا باشا
- قلب الباشا
= اتفضلي امشي خلينا نخرج نتفسح زهقت
- والله كان نفسي اخرج فعلا خد قلبي يا عبزالرحمن
= هاتيه يا شيخه ده انتي تعبتيني
- ضحكت ومشيت **
= لطفي استنى يا لطفي مخدتش قلبك لسه
- ضحكت ** امشي يلا
= انا مهزء اساسا
- لا انت قلبي
= مين ! ايه ! قولتي ايه ؟
- اتهبب امشي انت مش عايز تخرجني ولا ايه
= لا طبعا يلا اتفضلي
ضحكنا ومشينا ولقيتني بمسك إيده هو كان كل ما يحاول يمسك إيدي اضايق بس انا كنت محتاجة اطمن وانا مبطمنش غير معاه وفي وجوده ،،،، فضل باصصلي شويه ومش مستوعب وبعدين مسك ايدي وتبت فيها وضحك .. ضحكته كانت حلوه زي عادته وانا كنت مبسوطه معاه كالعاده .. هو وجوده لوحده بيطمني وبيريحني
- احنا جايين ملاهي نعمل إيه ؟!
= نطلع الكبت ونصوت
- بتهزر صح !
= لا والله تعالي يلا
لعبنا وصوتنا فعلا وضحكنا كتير وخد قلبي يعبرحماان يا قمر انت
= مبسوطه ؟
- عمري كنت معاك ومتبسطتش !
= عشان تعرفي اني على وضعي
- اه طبعا
-= سلمى
- نعم
= انا بحبك
-....
= انا عارف إن دي اول مره اقولهالك وكانت بتبان في افعالي وغيرتي وجناني يعني ، بس انا مش قادر انا بحبك يا سلمى
- ممكن نمشي
= طب ..
- بعد إذنك يا عبدالرحمن عايزه امشي
= طب انا اسف متزعليش
قومت امشي ف قام ورايا ومشي جمبي ساكت لقيت في زحمه وانا مبحبش الزحمه ف مسكت ايده عشان اطمن وفضلنا ساكتين لحد ما وصلنا
= سلمى
- نعم
= متزعليش
- مبزعلش منك انت عارف
= تصبحي على خير
- وانت اهلي ،، وطلعت جري
- ماماا ،، انتي فين يا ست الكل !
• تعالي يا سلمى انا هنا
- ايه يا قمر لسه سهرانه
• مستنياكي يا بكاشه
- قلبي يارب
• اتبسطتي ؟
- عمري كنت مع عبدالرحمن ومتبسطتش
• ربنا يخليكوا لبعض يا بنتي ويهديكي
- مجنونه انا يعني !
• اه وهبله الواد بيحبك وانتي مطلعه عينه
- ايه ده في ايه ؟!
• هو انتي فاكره إني مش عارفه ! هو حاكيلي على كل حاجة ومستنيكي تحني عليه
- يا ماما انا بحب احمد
• لا والله ! انتي فكراني هبله زيك ، انتي لو بتحبي احمد مش هتقدري على بعده كل ده بس انتي عادي وبعيد ومبسوطه كمان تبقي بتحبي مين
- عبدالرحمن ،، رديت من غير ما افكر وبعدين استوعبت اللي قولته ف سكت
• الواد شاريكي وطالع عينه معاكي ، حني عليه يا مفتريه
- انتي امي انا على فكره
• ما هو عبدالرحمن ابني بردو على فكره ، فكري كويس يا بنتي وانا عارفه انك هتختاري صح ، يلا قومي ارتاحي
- حاضر
قومت دخلت اوضتي لقيته بيتصل
- ايه يا اخره صبري
= ماما خدت الدوا يا بت ؟
- استنى كداا ، ماما خدتي الدوا ؟
• ايوه يا بنتي
- اه يا عم خدته
= طيب يلا روحي اجري
- كلمني كويس يا كابتن
= قلب الكابتن
- تصبح على خييير
= وانتي اهلي
قفلت وضحكت ، هو انا بحبه هو فعلا !
< اه بتحبيه هو
- انا بثق فيكي يا سما ابقى بحبه هو
< طب إيه ؟ هتفضلي مطلعه عينه كده
- هو انا هطلع عينه على طول بس هقوله لا تقلقي
< طب اخلصي بقا قرفتينا
- اقفلي يا سما اقفلي واقطعي علاقتك بيا
< روحي يا هبله تصبحي على خير
- ضحكت ** وانتي معايا يا قلبااي
قعدت افكر وقارنت بين احمد وعبدالرحمن كتير هو اينعم عبدالرحمن ميتحطش في مقارنه مع حد بس قارنته ب احمد وهو اللي كسب ، هو اللي معايا على طول ، هو اللي بيوحشني وهو اللي بقلب الدنيا لما يغيب ،، انا بقالي كتير معرفش حاجة عن احمد ومش فارق معايا ، مش هاممني غير ان عبدالرحمن معايا ، انا طلعت بحب عبدالرحمن فعلا هم مش بيكدبوا
= مصحيااني بدري لييه ارحميناااي
- كلمني كويس
= يادي النيله
- قوم اتنيل تعالى دلوقتي
= ليه في ايه انتي كويسه ؟ طنط كويسه ؟ في حاجة حصلت
- اييه يابني احنا كويسين ، انا عايزه اخرج بس
= اقتلها يارب !
- مش ههون عليك
= دي حقيقه
- قوم يلا مستنياك
= طيب جااي
لبست فستان ابيض وفي ورد زهري وطرحه بلون الورد
= انزلي انا تحت
- نازله اهو
نزلت لقيته واقف تحت البيت وفي ايده ورد و دي اول مره تحصل إنه يجيب ورد يعني هو بيشوف إن دي حاجات تافهه !!
= ايه الحلاوه دي طيب
- قلبي يارب ، الورد ده ليا ؟!
= ايوه اومال لمين !
- افتكرت ل ماما يعني
= بت
- قلبها
= لا خلاص
ضحكت وخدت الورد حضنته
= مبسوطة ؟
- طول ما انت معايا ببقى مبسوطة ، ببقى اسعد واحده في الدنيا
= بصلي شويه ،، عايزه تروحي فين ؟
- النيل
= اشمعنا!
- هو كده
= طيب يلا
ركبنا وروحنا على النيل
= هي دي الخروجة ؟
- بص هي حجة بصراحة ، كنت عايزه اتكلم معاك
= في ايه طيب!
- انا بحبك
= اه وبعدي... ب ايه!!!!
- بحبك
= قولي والله
- والله
طلع موبايله واتصل بحد
= قالتها يا ماما قالتها اخيراا قالتهاا يا نااس
ضحكت اوي لفرحته دي ، انا بحب اشوفه فرحان اووي
= بحبك يا سلمى بحبك اوي 💕
- بعيشك يا قلب سلمى 💕

لولا وجودك ما حييت
#سلمى_ياسر

" رأيكم وتفاعلكم شويه 😹💕 "