اسكريبتات ل سلمى ياسر

اسكريبت 48

- تفتكري ممكن نرجع تاني؟
= ابتسمت - افتكر مفتكرش ليه
- يا سلمى أنا مبهزرش، إحنا سايبين بعض بقالنا سنة
= ولو عشر سنين وليكوا نصيب تبقوا سوا هترجعوا
- أنا بحبه أوي يارب نرجع
= إن شاء الله ترجعوا، هدعيلك
- حضنتني - ربنا يخليكي ليا، أنتي معايا من الأول خالص و بتسمعيني حتى لو بعيط بس و دايما مهونه عليا
= و هفضل معاكي دايما متقلقيش أنتي خالة عيالي يا بنتي

ضحكت وسرحت في كلامي .. أو فيه هو .. حب حياتها، حلم طفولتها وشبابها واللي بتتمنى يكون جمبها لما تكبر وتعجز ..
الحب حلو أوي بس العيب بيبقى في الاختيار، وممكن يكون اختيارك صح بس التوقيت غلط فـ تبعدوا لحد ما ييجي الوقت الصح عشان ترجعوا وتكملوا باقي سنين العمر اللي جايه سوا 

- لو جيه أتكلم معايا أقوله إيه؟
= أول حاجه تعمليها إنك تعاتبيه، تخرجي كل اللي جواكي واللي حسيتي بيه في فترة بُعده و تخلصي كل الكلام اللي كان نفسك تقوليه أو بمعنى أصح اللي كنتي بتقوليه ليا عشان هو غايب، ولما تحسي أنك خلاص خلصتي كلامك ابدأوا شوفوا حل أنكوا تصلحوا علاقتكوا وتلغوا فكرة البُعد نهائي، كل شيء مسموح إلا الغياب
- طب وإنه راح ارتبط بعدي أصلا بمنتهى السهولة ؟!
= ممكن يكون عملها من غير تفكير ساعتها عشان مضايق من المشكلة اللي حصلت و..
- قاطعتني - بس يا سلمى كان بيحبها
= وممكن ميكونش حبها ولا حاجه، أو ممكن اتعود عليها فـ أنتي فكرتي كده، لو بيحبها مكانش سابها
- طب ما هو سابني وكان بيحبني!
= دي حاجه تانيه أنتوا حصل بينكوا مشكلة، حاجه خلتكوا مضطرين تبعدوا شويه فـ هو أختار ميبقاش لوحده وأنتي اخترتي تستنيه، كل واحد حر في اختياره وأنتي ليكي كل الحق ترجعي أو لا وكده كده هتشوفي هو لسه زي ما هو وبيحبك فعلاا ولا مكانش في حب من البداية وساعتها هتجبري قلبك يبعد، انتي محتاجة تحطي كل الاحتمالات الممكنة عشان متتعشميش في ولا حاجه وترجعي تتعبي تاني، أنتوا هتتكلموا وهتقرروا ساعتها ينفع ترجعوا ولا خلاص وقتكوا سوا انتهى رغم الحب اللي جواكي
- بس أنا عيزاه..
= وهتلاقيه هو كمان عايزك، مش بيقولوا من القلب لـ القلب رسول .. اللي هو حبكوا لبعض، أنا متفائلة خير اعملي انتي كمان كده
- طب أتكلم أنا ولا أستناه يتكلم؟
= لا أستنيه هو يتكلم
- حاضر
= أنا هقوم أمشي عشان اتأخرت وأنتي متقعديش لوحدك كتير
- أنتي عرفتي منين أني هقولك أني هقعد؟!
= ضحكت - سلام يا هبلة

مشيت وأنا متأكدة إنه هيكلمها، هي كانت ملجأ لـ قلبه وهو دلوقتي تايه وهيدور على بيته، نقطة الأمان اللي كانت موجودة في حياته دايما واللي مهما كابر هيرجعلها

* صوت رسالة *
- سلمى .. أنا رجعت لمطرحي

ضحكت واتصلت بيها، كان لازم أسمع صوتها وهي فرحانة برجوعهم

- كلامها متلغبط، الفرحة هتطلع من التليفون - ألو .. إيه يا سلمى .. كويس أنك اتصلتي عشان عايزه أحكيلك .. أنا مبسوطة أوي يا سلمى .. إحنا رجعنا .. أنا بحبه أوي أوي .. وبحبك أنتي كمان، عارفه؟ قالي أنه مكانش بيحبها وإنه كان دايما بيدور عليا فيها وإنه كان غلطان عشان أنا كنت قدامه وهو أختار يدور عليا في حته تانيه، قالي أنه بيحبني أنا من ساعتها مش عارفه أبطل ضحك، وقالي أنه كان متابعني وعارف كل أخباري وهي كانت عارفه أنه بيحبني الحيوانه ومسابتوش يرجعلي - ضحكت - أنا عايزه أتجوزه دلوقتي حالا ، يا سلمى أنا مبسوطة أوي أوي بجد
= ضحكت - أنا مش مفرحني قد الفرحة اللي في صوتِك والله
- أنتي مش متخيلة أنا عامله إزاي من ساعتها، عماله اتنطط و أضحك زي العيلة الصغيرة
= طب روحي كلميه يلا و عوضي بُعد السنة دي
- ماشي .. سلمى
= عيوني
- شكراً أنك كنتي دايما جمبي
= ضحكت - العفو يستي، يلا عايزه أجهز فستان فرحِك قريب
- بفرحة - حاضر

قفلت معاها وشربت شويه من القهوة اللي قدامي وأنا بسمع أغاني هادية و فرحانة بـ فرحتها برجوعه ليها تاني وبفتكر هي قد إيه عيطت وتعبت و زعلت وهو بعيد ونسيت كل ده مجرد ما كلمها، إحنا بنبقى عيال أوي لما بنحب، بس بنبقى مبسوطين، الحب حلو بس لما يكون اختيارك صح، إنسان بيحبك فعلًا مش واخدك تسلية ومش شايف الدنيا حلوة من غير وجودَك جمبه.♥️

لولا وجودك ما حييت ♥️🌍
#سلمى_ياسر