اسكريبتات ل سلمى ياسر

اسكريبت 44

- صباح الخير يا شباب

( سيبت القلم من إيدي وبصيت ناحية الصوت، هو ده الدكتور أحمد اللي كل البنات بتكراش عليه؟ طب ما حقهم فعلًا - ضحكت على الجملة اللي قولتها في بالي فـ شافني )

- الأستاذة اللي بتضحك!
= احم، أنا يا دكتور ؟
- ايوه، إيه اللي بيضحك في كلامي!
= لا مش بضحك على كلام حضرتك أنا بس ..
- أنتي لسه هتبرري! اتفضلي
= اتفضل فين؟!
- أكيد مش عازمِك على الغدا يعني، اتفضلي برا

"طب ما تعزمني على الغدا يا أخي فيها إيه!"

= بس يا دكتور ..
- اتفضلي يا أستاذة

"أستاذة إيه بقى أنت خليت فيها أستاذة"

( خدت شنطتي و خرجت من غير ما أخد بالي إني نسيت الورق اللي قدامي، الورق اللي كنت بكتب فيه حكاية من حكاياتي على أساس إني دحيحة و بذاكر بدل ما أمسك الموبايل وحد يعترض، دخلت أول كافيه قابلني وطلبت قهوة وقعدت استناها وأنا بكتب حكاية تانية، مخدتش بالي من القهوة اللي جت ولا الشخص اللي كان قاعد قدامي، أنا كنت مضايقه من الدكتور وبكتب حكاية عن واحده بتتخانق مع البطل اللي للأسف اسمه أحمد على إسم الدكتور المغرور المتكبر القمر اللي كان في المحاضرة )

- هتفضلي تكتبي بعصبية كتير؟

( اتخضيت و رفعت عيني بسرعة أول ما سمعت الصوت )

= دكتور أحمد!
- لا دكتور إيه إحنا دلوقتي خارج نطاق الجامعة يعني تقدري تقوليلي أحمد عادي
= بس ..
- أنتي لسه هتعترضي!
= إيه هتطردني من الكافيه كمان ؟!

( ضحك بـ صوت عالي بس مركزتش في أنه كان هيفضحنا من كتر الضحك اللي ملوش سبب ده، أنا كنت في حته تانيه، تايهه في جمال ضحكته و حلاوة غمازته و .. عيونه! )

= خلاص يا دكتور!
- بطل ضحك فجأة - لو مبطلتيش تقولي دكتور هفضل أضحك
= طب أضحك
- عجبتِك ضحكتي
= رديت بدون تفكير - ايوه

ساعات ببقى عايزه أقوم ألطشني قلمين كده على ردودي العفوية اللي هو أنتي مبتفكريش في الكلام قبل ما تقوليله ليه ياللي منك لله

= قصدي يعني الضحك حلو
- عشان معاكي

سكت شويه، أنا مستغربة ردوده والأريحية اللي هو فيها في الكلام والهزار دي وأنا أصلًا أول مرة أشوفه بس هو شكله اجتماعي أوي وبعدين إيه الأريحية دي أنا صدقت إني كاتبة وبقول كلام كبير ولا إيه!

= هو حضرتك كنت جاي ليه؟
- خلصنا من دكتور دخلنا في حضرتك
= اومال أقول لـ حضرتك إيه؟!
- قوليلي يا ميدو

مقدرتش أمسك ضحكتي والمرة دي أنا اللي كان صوتي عالي، غير إن أسلوبه وهو بيقولها ضحكني أفتكرت جملة من فيلم لما عادل إمام قال لـ البطلة "قوليلي يا محاميحو" ، حاولت أبطل ضحك عشان أعرف أرد عليه ..