غياهب الجهلِ والظلمِ

-التاسع _والعشرون-

رواية...غياهب...الجهلِ والظلمِ
بقلمي ...نورس _قاسم...

☆☆☆☆☆☆☆

ميرا :-طلعت من المطبخ امشي وامسح ايدي كلها مي بفانيلة اتراكي

وصلت لباب الاستقبال عدلت شعري ودا افتح الباب لكن حسيت و كأنو سكين ونبتت بقلبي حسيت الدنيا فترت بيه من سمعتها وهي تكول ...

...ادم حروح ان شاءالله اليوم اخطب سيماف الك ...

ميرا :- احس قلبي نبضه توقف وكأنو خنجر وضربني هستوني مديت ايدي على كيلون الباب دا ادخل و اتعارك وياهم لكن و قفني صوته الغاضب وهو يزئر ويكول...

:- للمره الثانيه اكلج سدي الموضوع مرتي ما ابدلها بألف سيماف ولتظلين يوميه فاتحتلي هالموضوع سديييييييه كاااااافي ....

ميرا :- من سمعت كلامه تراجعت ومدخلت لان كلامه ريحني سمعت شي تكسر يمكن كسر الماعين ...

سمعت صوته يتجه للباب وهو يرعد اني طرت لغرفتي ورجليه تركص من الفرحه لكن ما انكر عندي خوف من ناحية عمتي ليش تريد تزوجه شنو السبب ليش اني شبيه ...؟

توجهة لميز التواليت وكفت كدام المرايه باوعت لروحي بيضه وعيوني وساع ولونهن اصفر ...

تلمست وجهي بكف ايدي باوعت لعيوني ركزت بلونهن حجيت بتعجب ...

...ليش لون عيوني صفر اشو محلو شمعنى لون عيونها زمردي ...؟

...يلا مو مشكله اشتري عدسات والبس بس مو هسه حكول الادم لانه كولش معصب واذا حكوله اريد عدسات بضربه وحده ميخليني احتاج لعدسات هو حيغير لونهن للاسود ...

جريت نفس وتنهدت رحت كعدت على طارف السرير واني. ضايجه كولش بس الى حتظل ورا وتريد تزوجه سيماف اوووف اني هايه البنيه ابد ما حبيتها ...

--------------------------

شذر :-من رجعنه من عرس اركان ثاني يوم هستوني كاعده من النوم اندكت الباب بابا كان مموجود جريت الشال حطيته على راسي وطلعت وكفت ورا الباب وكلت ...

..منووو

اجاني صوته وهو يكول ... اني صفاء افتحي ...

من سمعت صوته ابتسمت بعدين اختفت ابتسامتي وعالاساس عصبت فتحت الباب اله دخل وكال ...

...ها عاليه نصيف شلونج وروح العبادي لو يدري نوري المالكي شكد مشتاقلج جان انتحر بس الحمدلله ميدري ...

...حاولت اخفي ابتسامتي وحجيت ... شنو تريد شكو جاي لهنا ...

...عقج حاجبه وكال بأنزعاج ...لااه لااه لااه ممقبوله منج شنو شكو جاي غير مرتي حبيبتي هنا وجاي اشوفها ...

حجيت ... مرتك حبيبتك لو هامتك مجان فشلتها كدام صديقتها واهل صديقتها ...تدري لحد لان خجلانه احجي وياها الموقف الخليتني بيه ما اتمناه لعدوي ...