وخز الدبابيس.. إحتضار و الراء نون

٧

_بعدها غيرتا ملابسي وحاولتا أنوم بس ما قدرتا..كل ما أغمض بجيني شكل ليالي والحادث وتفاصيل اليوم داك كله💔..لحدي المغرب كده طلعتا لعبت كورة مع اولاد الحلة..لمن جيت راجع لقيت أمي عاملة عمود ومستنياني عشان نمشي لليالي في المستشفى💙..قولته ليها:-والاكل لزومه شنو😂..قالت لي:-عشان أهلها بكونوا هناك..أطلع يا ولدي ارح قبل الزمن يروح لينا..قولته ليها:-طيب أستحمى بس..أستحميت سرعه وطلعتا معاها على المستشفى..لما وصلنا لقيت ناس مجدي لسه هناك..سلمنا عليهم وأمي وقفت مع أم ليالي وأم مجدي..إيناس قالت لي:- نتناقش اسي ولا يوم تاني؟..قولته ليها:-ليه يوم تاني..يا شباب كلامي واضح والموضوع منتهي..نحنا ما ح نعتمد على اللقاءات إعتماد كلي..نحنا برضو ح نشتغل زي زمان ونضغط نفسنا..المبلغ ما بسيط وما كتير..لكن شنووو ما بغلبنا أصلاً💙..مجدي قال:-يا زولي قدام...إيناس قالت:-طيب طيب..موافقة..بس ظهورنا في الوقت ده وليالي في غيبوبة ده ما بفسر شي غير انو نحنا ما عندنا دم الصراحه يعني...مقداد اتحسس من كلامها بس أنا ظبطته سرعه وقولته ليها:- بالعكس تماماً..ليالي ح تقوم بالسلامة إن شاء الله وبعدين ضروري حياتنا وتفاصيلنا تكون قدام الناس عشان نبين إنو نحنا فعلياً زعلانييين!..أيوة ليالي وضعها حالياً ما كويس وهي ما بينا بس ده ما بيعني إننا نوقف..ح نستمر💙...وضربت مجدي في كتفه:-ولا شنو يا صحبي!..قال:-بالضبط..بعدين ليالي ح تفرح لما تعرف نحنا بنخطط لشنو..إيناس في الاخر اقتنعت واعتذرت من مقداد بطريقة لطيفة رغم إنو ما بين زعله بس كان واضح...

"على لسان مجدي"

_لحدي بعد العشاء طلعنا كلنا من المستشفى..أنا و مقداد ومجتبى طلعنا على الجنبة..قبل القهوة تجي أنا شارب تلاتة سجاير ولسه عاوز اواصل..بالي كله مع ليالي والح يحصل لقدام..مجتبى قلع مني العلبة وقال:-هو لو بتفيدك ما كان كتبو ضار بالصحة...يا ولدنا صدرك ده ارحمه..قلعت العلبة منو وابتديت اشرب وحكيت ليهم اني يوم العرض اعترفت لليالي وطلعت عندها لي نفس الحاجه بس ما اتهنينا..قال لمقداد:-هوالحب ده بعمل كده يعني!؟...مقداد اخد نفس وقال:-اسكت يا صحبي بعمل اكتر من كده..قبل يكمل جملته تلفونه اتصل وكانت وعد..مجتبى قال:-يا سبحان الله..لا دي حست بيك بتجيب في سيرة الحب واتصلت ولا شنو!؟..اتفضل اتكلم..مقداد قال:-ألو..أممم..كويس أنا..طيب حبيبي💙تمام...مجتبى ختا يدو على قلب مقداد وقال:-تصدق نبضاته زايدة...ابل الحب زاتو يا شيخنا😂😂..انا فاهم انو مجتبى بحاول يطلعنا من الكآبة النحنا فيها و عارف إنو زعلان على ليالي بس ما مُوضح لينا..ماكلها في حنانه..بعد شربنا القهوة..قولته ليهم:-عارفين..اول ما ليالي تصحى ح أعرسها طوالي..بقوا يضحكوا...مجتبى قال لي:-تعرسها بشنو!..ولا هو عرس وخلاص..قولته ليهو:-عقد بسيط وبيتنا يا صحبي..هي ما ح يكون عندها مانع💙..قال لي:-بيتكم ده قصدك بيهو ياتو بيت عشان نفهم بس..قولته ليهو:-بيتي انا وهي لكن هو وين ح اجيبوا بشنو الله اعلم..المهم البت دي تصحى بجاي بعرسها بجاي..مقداد قال:-اللهم قوي ايمانك...خش في الحديد..ياخ انت عشان تعترف اخددت معاك اربعة سنوات..اها لمن تعرس نتوقع كم..عشرة!؟..قولته ليهم:-اطعمجوا اطعمجوا..خلوها تصحى بس..مجتبى قال لي:-والله يا صحبي مالو كمل نص دينك..كلنا معاك ووراك وفي ضهرك واي حاجه..لكن ما تتحمس..يمكن هي عاوزة عرس فخم وبتاع ويمكن امها بتاعت مظاهر وعاوزة عرس في الصالة الفلانية..المهم خت احتمالات زي دي..لكن انا حسب معرفتي بيها..ليالي دي بتعرسك ببلح بس💙..قولته ليهو:-والله تستاهل يتعمل ليهل افخم عرس..بس انا ما في يدي حالياً إمكانيات..ومابقدر وما عاوز زاتو انتظر سنوات طويلة عشان اعمل قروش والحركات دي..عشان كده عقد بس والسنوات الطويلة دي نعافر فيها سوا...مقداد قال:-ده الكلام الصح اصلاً...هوي أقوم أنا..مجتبى قال:-ماشة يبطه تتكلمي مع حبيبه القلب..قال ليهو:-الما عندو حبيبة قلب يعمل ليهو يلا...بقوا يضحكوا..بعدها مقداد مشى..مجتبى كان سرحان مرة مرة يتذكر القهوة حقته..كنت مركز مع رعشة يدو ونظراته..وعارفو بفكر في شنوو..قولته ليهو:-ح تبقى كويسة💙..قال لي:-نعم!..قولته ليهو:-ليالي..ح تبقى كويسة💙..وبعدين فضلنا ساكتين مسافة...

"على لسان مجتبى"

_مرت الايام ما بين المستشفى وتخطيطنا لقصص جاية المفروض تتمثل وتتعرض..رجعنا قلبنا المدرسة استديو واعتذرنا للطلاب💙..ايناس بدت تكتب في قصة المفروض انها تكون عبارة عن 15 حلقة..كانت الفكرة بتاعتها جاهزة واي حاجه...بس باقي نحنا نجد في الموضوع ونبدا...جا يوم الخميس..المفروض نظهر على القناة الساعه7 مساءً....عمر ظبط موضوع القروش مع ادارة القناة..مجدي ما كان عاوز يطلع بس انا أصريت عليه..في النهاية لازم كلنا نبقى يد واحدة..لو ما عملنا كده العملية ما بتتعمل ويبقى خسارة يسمونا أصحاب أصلاً💙...إيناس من بدري فتحت أضان أهلها على الموضوع وما كان عندهم إعتراض وأخوها الكبير وصلها لحدي القناة...التوتر والخوف والكلام الما مرتب وضحكاتنا المصطنعه..نحنا كنا بنعمل كده طول الحلقة..بنبتسم بالعافية💙..آخر الحلقة طلبوا مني أختم بأغنية غربية...ما كنت جاهز أغني بس قلت يلااا...غنيت وكانت حلقة أروع ما يكون ظاهرياً..بس من جوه نحنا مجبوريين على الموضوع ده💙..

برنامج واتنين وتلاتة واعلانات وغيرو جمعنا نص المبلغ خلال شهر💙..كان إنجااااز..

"على لسان إيناس"

_مر شهر ونص وليالي لسه في غيبوبة..كل يوم خوفنا عليها بزيد..كل يوم بنجي المستشفى على امل انها تصحى..بس لا💔..ليالي كانت لسه زي ما هي..جمعنا نص المبلغ حق العملية..وطوالي بدينا في تصوير مسلسل..حبكتا القصة وخليتا تكون بين أربعه اشخاص بس عشان ما نتضطر نجيب ممثلين ويطالبونا بقروش ونحنا يا الله بنلم فيها اساساً...محمد اخوي كان في البدايات بس بحضر معاي المشاهد حقت التصوير وتاني كسر الحنك...كنتا متحمسة لعملية مقداد اكتر منه..وكل يوم بقول ليهو قربنا نتم المبلغ قربنا...لما كنا بنتعب من التصوير عمر بقول لينا:-كسرتوا حنك العملية ولا شنو!؟..فا بنقوم بحماس ونصور كذا مشهد واحياناً فوق طاقتنا...مستمتعين من الضغط ده لأنو بنعمل حاجه بنحبها..وزعلانين انو ليالي ما معانا المرة دي...

"على لسان مقداد"

_كنتا بحس بتعب اصحابي وقدر شنو نفسهم العملية دي تتعمل..عكس اهلي البرة البلد..الانا من لحمه ودمهم..باخلين علي بمبلغ قد يكون هو في متناول يدهم كل يوم..حال البشر لمن يغتروا💔...كنتا كل ما أيأس واقول ليهم خلاص ننسى الموضوع..مجتبى بضايق مني..كان ضاغط على نفسه وراحته عشاني..ده حتى كان بشتغل شغل اضافي عشان المبلغ يتلمى في اسرع وقت...احساسي بالذنب اتجاه ليالي ما خف خالص..كنتا كل ما أمشي المستشفى واسمع بكى اهلها بتخنق..هي ما بتطلع من دعواتي💙ويارب تستجيب...أكتر واحد كان مُتفائل انها ح تصحى هو مجتبى..لأنو كلنا وحتى مجدي شبه فقدنا الأمل...💔

______________________!

_بحرك أصابعي شوية شوية..الحته كلها ضلام..الرؤية أبتدت توضح...ناس كتار شديد وكاميرات في كل حته..أمي وأبوي..ياسمين..إيناس هناك...مجتبى على بعد امتار مني..مجدي واقف مع خالتو فاطمة..أنا ومقداد..كلام عمر..التلفون...بتاع الكافتريا...مجدي.....أصوات العربات العالية...الضوء الجهرني فجأه...فتحت عيوني مخلوعة...💙

#نتلاقى