وخز الدبابيس.. إحتضار و الراء نون

٣٣

"بعد مرور 14 عام"

"يحدث الآن"

"على لسان مجتبى مجدي_22عام"

_من وأنا صغير أتعلمت حاجات كتيرة من علاقة أمي وأبوي ببعض..أتعلمت يعني شنو تكون سند وداعم حقيقي لشريكك..أبوي علمني كيف أصبر على البحبها وأستحمل وأتنازل عشان المركب يعدي..أمي علمتني كيف أفصل بين حبي للقدامي وزعلي منو ودايماً كانت بتحببني في أبوي فوق ما أنا بحبه أصلاً..لما أول مرة حبيت فيها وكنت مراهق لما البحبها خلتني وواجهت الحاجه دي بالبكى..ما جات وقالت لي ما تبكي..لالا عملتني إنو الراجل بضعف ببكي بتكسر بس برجع أحسن وأعقل وأوعى💙..أبوي علمني كيف أحب البعملو حتى لو ما عاجب الناس المهم عاجبني..علمني كيف أعامل أخواتي بحنية وما أشد عليهم مهما غلطوا..وبدل ما يجروا مني يجروا علي ويلقوني خير عون وصاحب كويس💙..أهلي ربوني تربية سليمة بعيدة كل البعد عن أنهم ينتقدوني إذا ما حليت الواجب أو إذا ما جبت أقوان كتيرة وإذا خسارة الفريق كانت بسببي...علموني كيف أكون إنسان عطاء...علموني كيف أواجه الحياة مهما بلغت صُعوبتها..واليوم أنا على وشك إني أحقق ذاتي..درست محاسبة بكامل رغبتي وحريتي وح أسافر أحضر الماجستير والدكتوراه...أنا هنا بسببهم..بسبب أنهم ولا لحظة ما بِخلوا علي بنصيحه أو توجيه عشان أمشي صح...أيوة بقع وبغلط بس هم بعرفوا كيف ومتين يخلوني أصلح الغلط ومهما كررتو فأنا قادر أتخطاهو وأغلبو..💙.

"على لسان سما مِشعل"

"هذا الصباح..تكتبُ على إحدى مُذكراتها ما راودها وما جاء على هوى نفسها.."

_اليوم عيد ميلادي ال18..سن الرشد كما يُقال..خلوني أقول وبكل صراحه وأمانة أنا عندي ألطف أهل في الدنيا..عندي أب جامع كل الصفات الحلوة..كان صحبي لما أحتجت لكتف وكان أخوي الكبير العاقل لما أحتجت لنصيحه..وكان ولا زال حبيبي الأولاني...أبوي مثال حي للعطاء الممتد والحب..من وانا صغيرة كان بحببني في نفسي وبسببه أنا بقيت شخصية واثقة من نفسها لأبعد حد..أنا وفرزدق وأيان محظوظين إننا أولادو...عمرو ما حل مشكلة بينو وبينا بالعصبية والضرب..بلجأ للحنية والهدوء والتفاهم وعلى الأساس ده برضو أمي...أمي💙بتهتم بأدق تفاصيلي..بتسمع أتفه مشاكلي ومهما المشكلة كانت تافهه هي بتشوفها من منظوري أنها كبيرة فعلاً ومحتاجه حل..طول الوقت بتشجعني أعمل الحاجه البحبها والبترضيني..عمرها ما بخلت علي بحاجه..كانت ولا زالت جنبي💙..أنا ما عندي صحبة أكاد أجزم أنها قريبة لي وفاهماني وبتحبني زي أمي..هي القريبة وهي الصحبة وهي الأخت...أي حاجه بنعملها مع بعض..أي طلعة نحنا سوا..الداعم الأول لي لما أبتديت تصميم الديكور..أنا هنا بسببها وبسبب دعمها المستمر لي هي وأبوي..💙