أميرتى ذات الشعر الطويل

الفصل السادس عشر

كل عيد وانتوا طيبين وفالشاى بلبن الكحك مغرقين☺️
وحشتونى ووحشتنى تعليقاتكم ♥♥♥
معلش بقى القصة تم وقف نشر الفصول بتاعتها غصب عنى
دوست بالغلط على حذف 🙈

أتمنى لكم قراءة ممتعة للفصل الجديد 😍

🌺🌺🌺🌺

فجأة تذكرت شيئاً مهما فسكنت قليلا ثم مسحت دموعها من على وجهها واتجهت نحو احد الادراج وفتحته واخذت منه كارت قد خبأته يوم زواجها من حمزة

قررت أن تستخدم هذا الكارت ضد حمزة فقد حذرها مازن من تسلطه وكان صادقا بالفعل فيما قاله عنه
لقد تمادى ولم تعد تحتمل تحكمه بها وقسوته معها
وايضا لم تعد تتحمل بعدها عن آسرحبيبها
فقررت أن تتصل بمازن وتطلب مساعدته كما عرض عليها من قبل ولكن ستنتظر الوقت المناسب لذلك

لم تخرج جنى من غرفتها طوال اليوم وأغلقت على نفسها من الداخل وحزنت كثيراً لأنها ستعود وحيدة حبيسة مرة اخرى فلن تخرج ولن ترى صديقتها كما كانت تراها يومياً

سمعت دادة فاطمة من الخارج تناديها: جنى افتحى يابنتى ليه الحبسة دى بس وماكلتيش من بدرى افتحى عشان خاطري

قامت جنى بعد ان وضعت الكارت فى حقيبة يدها
ثم فتحت لها وأدخلتها

قالت جنى بحزن: هو انا حابسة نفسى بمزاجى ولا من عمايل البيه اللى مبيسترش كل كام يوم ينكد عليا وبيتعمد يذلنى بتحكماته

ابتسمت دادة فاطمة وقالت: انتوا عاملين زى القط والفار
تعرفى اللى بيتخانقوا كتير فى اول جوازهم بيبقوا متفاهمين جدا بعد كدة

ضحكت جنى وقالت: دة لو استمر الجواز أصلا دة ميتعاشرش يادادة متجوزنى مخصوص عشان يطلع عقده عليا

دادة فاطمة: انتى عارفه ربنا كويس وعارفة انه لازم تطيعيه وتسمعى كلامه انتى طول ما بتعاندى معاه هتعصبيه وهتخليه يبينلك الجانب الوحش بس
لو هديتى اللعب شوية واتعاملتى معاه بهدوء ورقة  هتشوفى حمزة دة هيتحول لراجل مختلف ازاى

جنى: ولا عاوزاه يتحول ولا هيكون بينا حاجه خالص
جوازنا دة مش حقيقى ومش هيستمر ولا عمرى هنسى اللى عمله فيا

دادة فاطمة: انتوا الاتنين عنديين اوى ربنا يصلح حالكم
مش عارفه الحرب اللى بينكم دى هتخلص امتى وتعيشوا مع بعض فى سلام

جنى: الحرب دى هو اللى بدأها ومش هتنتهى غير بالطلاق

دادة فاطمة: انا هقوم يابنتى انزل اشوف اللى ورايا بس قبل مااخرج عاوزاكى تفكرى بهدوء وتسألى نفسك
ياترى هو بيعمل كل دة ليه اكيد فى اسباب مداريها ورا قسوته وتحكمه اللى مزعلك دة

خرجت وتركت جنى تفكر فيما قالته ولكن لم تجد اى تفسير منطقى لذلك
امسكت الهاتف وطلبت هنا