أميرتى ذات الشعر الطويل

الفصل التاسع والعشرون

وما ان أغلقت الخط حتى وجدت السيدة كوثر تخرج من حمام غرفتها وهى تبتسم وتقول : صباح الخير يابنتى
جنى تبتسم وترد قائلة : صباح النور ع الحلوين
لا احنا النهاردة ماشاء الله علينا اتحسنا ع الاخر
كوثر : البركة فيكى يابنتى مسيبتنيش ولا لحظة
سامحينى سيبتك شغلك وعطلتك عن بيتك وجوزك
قاطعتها جنى قائلة : ماتقوليش كدة المهم صحتك
كوثر : كتر خيرك يابنتى أظن كفاية لحد كدة لازم أمشى عشان ماسببلكوش ازعاج و..
قاطعتها جنى مرة اخرى : ماتقوليش كدة ازعاج ايه
انتى منورانا ومزودانا
خليكى معانا هتروحى فين بس
كوثر بحزن : هرجع بيتى ولو انى مش عارفة هاقدر اعيش فيه تانى ازاى من غير آسر حبيبى
بكت وكادت ان تنهار ثانية الا ان جنى اسرعت نحوها وعانقتها وهى تقول : كفاية عشان خاطرى انا عارفة انه صعب عليكى بس حاولى تهدى عشان خاطر صحتك
خليكى معانا احنا بنحبك
كوثر تجلس على الفراش وتمسح دموعها وتقول :
مش هينفع صدقينى
بس عاوزاكى تخلى حمزة يبيعلى الشقة ويشتريلى واحدة صغيرة على قدى عشان مش هاقدر اقعد فيها

جنى : بقولك ايه سيبك من الكلام دة دلوقتى احسن انا جعانة اوى تعالى ننزل نفطر مع بعض
كوثر : ما فاطمة جابتلى الفطار هنا من بدرى
جنى : بجد طب بألف هنا ياحبيبتى
معلش بقى انا اصلى سهرت جامد بالليل ماحسيتش بحاجة خالص غير دلوقتى
كوثر : اه عشان كدة مانزلتيش الشغل
جنى : لا ما انا اخدت يومين اجازة النهاردة وبكرة
تعالى ننزل تحت يلا
كوثر : خلينى هنا عشان تبقوا براحتكم
جنى : لا طبعا كفاية حبسة فى الاوضة
خلينا ننزل يلا ومتعمليش فرق
كوثر تبتسم وتقول : حاضر يابنتى
نزلتا معا واجلستها جنى فى غرفة الصالون ثم توجهت الى المطبخ
جنى :صباح الخير عاملين ايه
دادة فاطمة : صباح النور وصح النوم
ابتسمت جنى وقالت بخجل : معلش بقى المطبخ كان مبهدل اصل حمزة كان جعان واتعشينا سوا و...
قاطعتها مبتسمة : بالهنا والشفا بس واضح ان الأكلة عجبته اوى عشان يقوم بدرى ويطلع يجيب ورد ويخلينى احطه جنبك على الكومودينو
احمرت من الخجل وقالت : بجد هو حضرتك اللى حطيتيه
دادة فاطمة: اه عشان مرضيش يدخل وكوثر هانم نايمة وكمان مكانش عاوز يقلقك
ربنا يسعدكم يابنتى
تحبى تفطرى ايه
جنى : حاجة خفيفة كدة جنب القهوة يعنى ممكن ساندوتش جبنة
دادة فاطمة : هو دة فطار دة
هخلى حد من البنات يعملك اومليت جنب الجبنة والمربى ايه رأيك
حمزة موصينى افطرك كويس
ابتسمت جنى وقالت : ما انا مش عاوزة اتقل فى الفطار عشان اعرف اتغدا كويس خصوصا انى صاحية متأخر
اقتربت جنى منها لتقول بصوت منخفض :
بينى وبينك انا عاوزة اعمل لحمزة الأكل اللى بيحبه بايدى النهاردة وكمان عاوزة يعنى لو ينفع .... عاوزة
دادة فاطمة: فاهماكى يابنتى ومن غير كسوف دة حقكم
انا وكوثر هانم هنتغدا مع بعض
وانتوا بالهنا والشفا مع بعض
ابتسمت جنى لتفهمها وقالت ممتنة : شكرا يادادة
تناولت جنى طعام الافطار
وقامت باعداد أكثر أكلتان مفضلتان لديه وبعض السلطات
انتهت من الطعام على الساعة الثالثة عصرا
فتوجهت الى عرفتها لتأخذ حماما دافئا وتبدل ثيابها
ارتدت البرنص ولفت شعرها بمنشفة صغيرة وخرجت من الحمام لتصدر شهقة عندما رأت أمامها حمزة جالسا على الفراش ينتظرها وبجواره كيس هدايا
ابتسم عندما رآها
كادت أن تعود ثانية الى الحمام ولكنه نهض من مكانه واتجه نحوها سريعا
عانقها ثم قبل يدها وهو يقول : وحشتينى عاملة ايه
جنى تقول مرتبكة : الحمد لله كأنك جيت بدرى شوية صح
حمزة : الصراحة جعت ومش قادر أصبر عشان هاكل من ايدك النهاردة
شكلك مش مبسوطة انى جيت بدرى
جنى : أبدا خالص طب روح بسرعة غير هدومك عشان انا كمان البس وانزل اجهز السفرة
نظر اليها بخبث ثم قال : ليه ماهو كدة حلو خليكى زى ماانتى وانا هخليهم يبعتولنا الأكل هنا
ارتبكت جنى وقالت : نعم لا طبعا يلا بقي ياحمزة اخرج وانا هاحصلك
اقترب منها وقبلها على وجنتها ثم قال هامسا فى أذنها :
مش قادر اخرج عاوز اقعد هنا الاوضة دى هواها بحرى اوى غير تحت خالص
جنى تدفعه بعيدا عنها وتقول : بطل تأليف و يلا اطلع
توجه نحو الفراش ثم استلقى عليه وقال : الله السرير دة مريح اوى ماتيجى تريحى شوية شكلك مرهقة
وضعت جنى ذراعيها فى وسطها ثم قالت : بجد دة انت راجع فايق اوى قوم فز يلا عاوزة البس
حمزة يغمض عيناه ويقول : ماتلبسى حد حايشك
جنى : حمزاااا بطل بقى وقوم اخرج
حمزة : هاخرج بس بشرط خلينى أسرحلك الأول
جنى تتنهد وتقول : ماشى ياسيدى قوم واخلص بقى وترتنى
ابتسم حمزة ونهض بخفة ثم امسك يدها واتجه بها نحو التسريحة وأجلسها ثم تناول المشط فى يده ونزع عن رأسها المنشفة وأخذ يمشط شعرها بحنان وهو يقول :
وترتك ليه ها
ابتلعت جنى ريقها وقالت بارتباك : مفيش بس خلص خلينى ألبس وأنزل انا جعانة
ابتسم وقال : حبيبتى تؤمر هحاول انجز بس مش ذنبى لو طولت شوية شعرك مش عادى ياجنجونة
جنى : هاقصه انا عشان ارتاح منه
حمزة : ينفع تحرمينى من حاجة بحبها
جنى : بتحب شعرى
حمزة : جدا
حمزة : و بحبك
جنى تحاول أن تهرب من كلامه فتقول وهى تقف :
انا كنت شايفة كيس هدايا على السرير ياترى لمين
فهمها على الفور ومراعاة لخجلها قال وهو يتجه نحو كيس الهدايا يأخذه ثم يناولها اياه: اتفضلى ياستى دة ليكى
ابتسمت جنى واخرجت ما فيه لتجد كاش باللون البينك
فقالت وهى تفحصه : جميل اوى وشيك شكرا ياحمزة
حمزة : افتحى التانى
امعنت جنى النظر فى الكيس لتجد شيئا اخر أخرجته وفتحته فكان مغلفا ولا يظهر مابه
تنحنحت جنى وفتحت عيناها على وسعهما وتمنت لو انها لم تسأله عن الهدايا ابدا
جنى تقول بصدمة وهى تنظر لما بيدها : احم احم
ايه دة 😳
حمزة يقول بكل جرأة : قميص نوم ياروحى
بكرة بالليل تلبسيهولى عشان هنسهر سوا
ودلوقتى البسى الكاش دة وانزلى حضريلنا الغدا
جنى تقول فى نفسها : يادى النيلة الواد دة اتجرأ وخد عليا اوى
ازاى قدر يجيبلى هدية سفلة زى دى
دة شكله عاوز قلة أدب 🥺
حمزة يقترب منها ويهمس بأذنها قائلا: بتفكرى فى ايه
خلاص اليومين عدوا والست بقت كويسة الحمدلله
بكرة هتبقى ليا أنا وبس
ارتبكت جنى وكادت ان تبكى من خجلها فقالت وهى تدفعه نحو الباب وتصرخ بوجهه : اخرج بقى ياحمزة مكانوش شوية ورد جبتهملى عاوز تغرغر بيا وتضحك عليا قصادهم....يلا اخررررج
حمزة يخطف قبلة من على شفتيها ويقول قبل أن يخرج:
يامجنونة ياجنجونة
أغلقت الباب وراءه وابتسمت قائلة : انت اللى مجنون والله
ارتدت ملابسها ورفعت شعرها عاليا ذيل حصان
نزلت واتجهت نحو السيدة كوثر تطمئن عليها
جنى : ها ياحبيبتى أكلتى
كوثر : اه الحمد لله انا وفاطمة أكلنا يلا روحى انتى حضرى الاكل لجوزك عشان تاكلوا سوا
جنى : حاضر هادخل اهو عن اذنك
كادت ان تدخل ولكن وجدت دادة فاطمة أمامها والتى قالت : البنات حضروا الأكل خلاص بس مش فى السفرة
حمزة خلاهم يحطوه على تربيزة جنب المرجيحة برة
ابتسمت جنى وقالت : بجد طيب تسلم ايديكم تعبتكم
دادة فاطمة : ولا تعب ولا حاجة ماانتى اللى عاملة الأكل كله
توجهت جنى الى الخارج ووجدت التربيزة عليها الطعام والسلطات ويحيط بها كرسيان
احست بيد تلمس كتفيها فالتفتت لتجد حمزة يحاوطها ثم يقبل يدها ويقول : تسلم ايدك ياحبيبتى تعبتك النهاردة
جنى : مفيش تعب المهم الأكل يعجبك
أجلسها حمزة ثم جلس أمامها وهو يقول : أكيد هيعجنى دة من ايد حبيبتى
بدءا يأكلان وأبدى حمزة اعجابه بالأكل قائلا : تسلم ايدك الأكل لذيذ اوى وخصوصا الورق عنب اللى بعشقه
طلعتى شاطرة فى الشغل وفى المطبخ كمان
جنى : بالهنا والشفا
حمزة :بكرة هنا وجوزها جايين صح
انا كلمت محمود وأكدت عليه علي فكرة
جنى : بجد طب كويس
كانت جنى تفكيرها مشتت وخائفة من بكرة حيث ستبدأ بالفعل زواج حقيقى مع زوجها حمزة
حمزة وقد لاحظ شرودها : ملك سرحانة فى ايه
جنى : ها ولا حاجة انا بس باكل مركزة فى الاكل
حمزة : فاكرة لما ايدى كانت متجبسة
كنت مبسوط اوى باهتمامك بيا وخوفك عليا
جنى تضحك وتقول : اه وخصوصا اللبس اللى كنا بنغيره كل شوية أصل دة اتوسخ ودة بيحرر وكل شوية طلب لما جننتنى
حمزة : الصراحة كنت بستعبط عشان تفضلى جنبى وتدلعينى يلا اكلينى زى ماكنتى بتأكلينى وانا متفشفش ولا لازم اتعب عشان تحنى
جنى : لئيم انت مش سهل خالص
حمزة : عشان واقع فى الحب اعمل ايه لازم ابقى ذو حيل كثيرة
جنى : ماشى ياابو حيل كثيرة اكلت
حمزة : اه شبعت الحمد لله بتهربى منى عشان متأكلنيش ماشى ملحوقة بس خليكى فاكراها
ابتسمت جنى ونهضت لترفع الأطباق
ولكن استوقفها قائلا : خليكى البنات هاتشيل تعالى اغسليلى ايدى بالصابونة أصلها بتتزحلق وتتزفلط منى
جنى : امشى انجر قدامى يادلوع انت