أميرتى ذات الشعر الطويل

الفصل الرابع ( عرض عمل وعرض زواج)

(وأى جمال بعد عيناك يذكر)
*عيناك خلقت لتعشق*
*عيناك بحر بهما أغرق*

نكمل بقي بعد الكلمتين الحلوين دول😍

نظرت إليه وقالت مستفسرة : عرض 🤔
عرض إيه ؟

رد عليها قائلا : عرض عمل
عاوزك تشتغلى هنا معايا فى قسم التخطيط أكيد هنستفيد من أفكارك كتير

أجابته سريعا : آسفة جدا العرض مرفوض 
وقامت من مكانها وهى تستعد للانصراف

وجدته يقول بكل هدوء : متستعجليش فى الرفض عارف انك مش هتقدرى تسيبى الجمعية والقرءان وأنا منكرش انى انبهرت باللى حققتيه فيها بس أنا هحتاجك يومين أو تلاتة فى الاسبوع يعنى نص الاسبوع هنا والباقى هناك
ظبطيها أكيد مش هتغلبى دة انا حاسس انك مديرة وصاحبة مكان هناك مفيش حاجة ماشية غير بأمرك

نظرت إليه وقالت فى تصميم : برضو آسفة انا ماليش فى شغل الشركات دة وبعدين ماشاء الله حضرتك محتاج تخطيط لايه اسمك معروف ومنتجاتك مالية السوق محتاجنى انا أضيفلك ايه معلش؟

ابتسم لها وقال ممازحا إياها : دة احنا جايين نقر بقى

لأول مرة يلفت نظرها وسامته بعد أن ابتسم وفك التكشيرة وملامح الجدية التى تعلو وجهه

قالت سريعاً : ولا قر ولا حاجة زى ماقلت لحضرتك كدة عرضك مرفوض عن اذنك

همت لتخرج ولكن استوقفها قائلا : مش هاخد كلامك دة كرد نهائى

واه أتمنى بكرة تختارى صح ومتتسرعيش عشان متندميش

توقفت مصدومة عند الباب تفكر فكيف عرف أو بماذا  يلمح ولكن لم تعلق بل قالت دون أن تنظر له : عن اذنك انا اتأخرت

قال لها مطمئنا إياها: ولا اتأخرتى ولا حاجة هتلاقى برة نفس السواق مستنيكى هيوصلك لحد البيت والشيك مع السكرتيرة هتسلمهولك

كادت أن تعترض لكنه قال سريعا : ملوش لازمة اعتراضك مش هتلاقى مواصلات بسهولة ثم إن دى عربية الشغل اتفضلى وموضوع الشغل معايا مازال قائم فكرى بجدية انتى بس ومش هتخسرى حاجة بالعكس تأكدى انك هتكونى مبسوطة هنا كتير

خرجت مستشيطة غضبا وهى تحدث نفسها: يخربيتك رخيم وسئيل اوى قال اتبسط قال دة انت يتفاتلك بلاد
اه يانارى هموت واعرف ازاى عرف بموضوع بكرة دة مراقبنى ابن المريبة قال اشتغل معاه قال عم كرومبو دة بلا هم

خرجت من باب الشركة واستقلت السيارة التى أوصلتها سريعا الى منزلها

دخلت مسرعة وألقت التحية على أبيها وقبلت رأسه ودخلت غرفتها وأخدت حماما دافئا بعد هذا اليوم الشاق الملئ بالأحداث

بعد أن انتهت ارتدت بيجامة قطنية وخرجت قاصدة المطبخ ومكثت به حوالى مايقرب من ساعة تعد طعام الغداء لها ولأبيها فلقد طلب منها والدها سمك مقلى مع الارز الصيادية وسلطة الطحينة فكانت سعيدة جدا وهى تعد له ماطلبه واشتهاه فقلما يفعل ذلك