انتقام بعد منتصف الليل 🖤-- بقلم / ندا سعيد

part 1

دخلت ليل بغضب وحدفت ورق في وش احلام : اقسم بالله لو حد فكر بس مجرد تفكير انه يفتح موضوع البيت ده مش هرحمه.
احلام بضحكة مستفزة وبتحط رجل علي رجل : هه حببتي شوفي ابوكي شغال ايه الاول وبعدها اتكلمي ،  البيت ده  هيفرق معاكي في ايه وانتي معاكي كل الثروة دي
ليل بغضب : والله بابي مدرس كبير قد الدنيا والفلوس اللي بيكسبها دي من تعبه طول السنين اللي فاتت ، معرفش انتي شاغلة نفسك بشغله ليه
احلام تظاهر بالانبهار: اوووه بجد ، انتي هبلة ولا ايه ، فيه مدرس يبقي معاه كل الفلوس دي .. روحي اسأليه او اسألي جدك كدة شوفي شغالين ايه
ليل بصدمه كبيرة: انتي بتخرفي بتقولي ايه
وبدأت تسرح بتفكيرها لتفاصيل كتير عدت عليها

فلاش باك _________________
الساعة 3 الفجر في مستشفي خاصة كبيرة في القاهرة من 13 سنة فاتوا
ريهام بتعب ومحايلة : حببتي كفاية دموع ، كدة هتعب أكتر ، روحي مع بابي يلا البيت ..والصبح تعالي
ليل بدموع : انا مش عايزة ارجع البيت يا مامي عايزة اقعد معاكي لحد ما تخفي
ريهام بصت لهشام بنظرات حزينة
هشام: سيبيها يا ريهام لازم تفهم وتعيش ده معانا لازم تبقي قوية في اي ظرف..كمل بهزار .. يلا يا ليلو احنا ننزل نجيب بيبسي وايس كريم ونيجي نقعد مع مامي لحد الصبح مش هنسيبها
ليل بفرحة و اثر الدموع في عينيها : بابي عايزة كمان دوريتوس عشان مامي بتحبه
هشام ابتسم بحزن : ماشي يلا
هشام نزل لمستوي ريهام باس دماغها بحب : مش هنتأخر.. وبمناغشة ..هتوحشيني لحد ما اجي
ريهام ابتسمت وسكتت بقلق
هشام مسك ايد ليل وخرج
ليل بقلق : بابي هي مامي هتقعد هنا كتير
هشام : ليلو بصي مامي تعبانة جدا واحنا لازم نبقي اقوية ونساعدها عشان تخف ونفرحها ، واعرفي دايما ان ربنا بيحبنا عشان كدة بيدينا امتحان.. مش انتي بتاخدي امتحانات في السكول
ليل : ايوة امتحانات كتير
هشام : ليه بقي الميس بتاعتك بتديكي امتحانات كتير
ليل بتفكير وبتحرك ايديها بشكل طفولي : مامي قالت عشان اللي يذاكر ينجح وياخد شهادة
هشام بضحك : اممم مامي عندها حق بس فيه حاجة كمان
ليل بصتله باستغراب
هشام : بصي اللي بيذاكر كويس اوي اوي ويحل كل الأسئلة وينجح وياخد شهادة ده يبقي انسان ناجح والناس كلها بتسقفله انه نجح ، وممكن يكون نجح في حاجة تانية غير المذاكرة زي رياضة معينة او حتي خلص الاكل بتاعه كله ده بردو نجاح انه حافظ علي صحته ، ف ربنا بيدينا امتحان ولازم احنا ننجح فيه بالصبر والايمان ومامي ربنا بيديها امتحان واحنا بقي هنساعدها عشان تنجح .. فهمتي حاجة
ليل بملامح مش فاهمه اي حاجة : ايوة فهمت
هشام ضحك : متأكدة
ليل بضحك : ايوة
هشام واقف بيدفع تمن الحاجات اللي اشتراها من السوبر ماركت
ليل : بابي عايزة فلوس
هشام : ليه يا ليلو منا جبت كل حاجة اهو
ليل باصرار : عايزة فلوس بليز  بسرعة
هشام عطاها 20 جنيه
حطيتها في جيب الجاكت
فجأة ليل سابت ايده وجريت ل برة
هشام بخضة : ليل رايحة فين
ليل كانت جريت لبرة بسرعة
هشام خرج وراها بسرعة بقلق شافها راحت لست عجوزة بتبيع ورد علي الرصيف .. قرب منها ووقف بعيد نسبيا يشوف تصرفها العجيب الجديد اللي اول مرة يشوفه
ليل بصوت طفولي هادي : طنط عاملة ايه..انا عايزة اشتري ورد
الست بابتسامة : خدي اللي عايزاه ، عايزة كام واحدة
ليل وقفت بحيرة وبعدين خرجت 20 جنيه من جيبها : طب هو 20 جنيه تجيب كام وردة
الست : 10 وردات
ليل بفرحة : 10
الست أومأت براسها بنعم
ليل : طب انا عايزة 10
اخدت الورد بسعادة : شكرا
لفت واتفاجأت ب باباها واقف قصادها
هشام : ينفع كدة
ليل : بابي اسفة بس كنت خايفة طنط تمشي
هشام : وانتي جبتي ورد ليه
ليل : هديه للناس عشان تدعي لمامي
هشام ابتسم بحب وبفخر انه فعلا تعبه وتعب ريهام في ليل جاب نتيجة حلوة في تربيتها وطريقة تفكيرها : فكرة حلوة جدا يا ليلو مامي هتفرح بيكي جدا
هشام بتفكير : ليلو ايه رأيك نجيب ورد لماما كمان
ليل فرحت بشدة : اه ماشي هي بتحب الورد الاصفر
هشام ضحك : اممم اشمعني
ليل : انت علطول بتجيبلها ورد اصفر بس
هشام: نفسي تركيزك ده يبقي في المذاكرة ..حط ايده علي كتفها بهزار ..  تعالي يا مغلباني نشوف فين الست اللي كانت هنا
اشتروا الورد ومشوا راجعين المستشفي
ليل مشت قدام باباها بحماس وبخطوات سريعة ووصلت لباب المستشفي..خبطت في راجل عجوز كان خارج
ليل بخوف : انا اسفه .. سكتت شوية ومدت ايديها بوردة ليه .. ممكن تدعي لمامتي 
الراجل اخدها بحب وقال وهو خارج : بلاش تعاندي كتير.. بسبب العند والسرعة دي هتبقي لوحدك
ليل لفت تشوف باباها لقيته واقف مع دكتور .. راحتله بسرعة في حزن : بابي عمو قالي اني لوحدي
هشام باستغراب : عمو مين
ليل : عطيته وردة وقالي اني هبقي لوحدي
هشام مش فاهم اي حاجة : ليلو ممكن يكون قال حاجة تانية .. روحي يلا ادي الناس الورد عشان نطلع لماما
ليل : حاضر
......
دخلت ليل مع هشام لمامتها باستها من خدها بحب : مامي اصحي
هشام: سيبيها يا ليل هي شوية وهتصحي
ليل باصرار: لا لازم تشوف الورد بسرعة
فتحت ريهام عيونها علي صوتهم بتعب : انتوا جيتوا امتي
هشام قعد جنبها : لسه جايين
ليل : مامي بصي جبنا ليكي ايه
ريهام ابتسمت واخدت الورد : حلو اوي يا روحي .. اممم واصفر كمان 💛
ليل : انا عرفت لوحدي انك بتحبي الورد الاصفر
هشام : في دي صح هي عرفت لوحدها .
فات ايام واسابيع وشهر ورا التاني لحد ما جيه يوم عيد ميلاد ليل....
ليل صحت من نومها وخرجت من اوضتها لقت باباها في الصالة ، قربت منه بحزن : انا عايزة اروح لمامي في المستشفي
هشام : تفطري الاول وبعدها نروح يلا
ليل : ماشي
بعد ساعة وليل لبست هدومها بمساعدة هشام وعلي وشك الخروج .. موبايل هشام رن
هشام : السلام عليكم ، ايه الاخبار يادكتور
دكتور محمد : وعليكم السلام ، هشام للاسف حالة المدام مش مستقرة من الصبح والمدام محتاجة حضرتك تكون موجود
هشام بقلق : طب تمام دقايق واكون عندك
هشام قفل بسرعة وشال بنته وخرج بخطوات اسرع ونزل للمستشفي
ليل : بابي هو حصل حاجة وحشة
هشام بقلق : لا يا حببتي .. اي حاجة بتحصل بتبقي خير .. ادعي ل مامي لحد ما نوصل
ليل بكل براءة : يارب تخف وتروح معانا البيت
وصلوا المستشفي ودخلوا أوضة ريهام كانت بتعيط
هشام دموعه نزلت بحزن كبير وقرب منها : ريهام
ريهام بدموع: هشام حافظ علي ليل انتوا ملكوش غير بعض دلوقتي خليها تبقي مبسوطة دايما، متخليش حد يحاول يأذيها، مش هيسيبوها في حالها يا هشام
هشام مسك ايديها : ريهام بلاش تتكلمي كدة ابوس ايدك،  انتي هتبقي كويسة والله
ليل قربت من مامتها حضنتها ودموعها نزلت بتلقائية
ريهام بصتلها وبصت لهشام بحزن : النهاردة عيد ميلادها التاسع يا هشام ، هتنسي ازاي يوم زي ده.
ريهام بابتسامة بسيطة وخوف كبير : ليلو حببتي
ليل بدموع: انتي هتسيبيني يا مامي
ريهام بدموع : لا طبعا مين قال كدة، بصيلي يا ليلو ، انا هبقي معاكي علطول المهم اوعي تسيبي حقك في يوم من الايام او تسمحي لحد انه ياذيكي او يضايقك ، انتي بنت هشام وريهام متنسيش ده .. انا بحبك اوي يا ليل ، خلي بالك من .... 
ليل بدموع بتهز مامتها: مامي
مفيش رد...
هشام بكي بشدة ومعاه ليل كمان
وانتهي اليوم بكل الحزن اللي فيه مع صدمة ليل في كل موقف حصل قدامها
---------------------------
بعد مرور شهرين وبدأت حياة ليل تتحسن مع خرجوها من البيت للمدرسة وللنادي وبدأت تتأقلم مع النظام الجديد
هشام بتوتر دخل الشقة ودخل اوضته بسرعة وفي ايده شنطة كبيرة حطها ورا الدولاب
ليل دخلت جري : بابي
هشام بتوتر : ليلو حببتي عاملة ايه
ليل : بابي هي الشنطة دي فيها ايه
هشام: دي حاجات بتاعت جدو سايبها هنا فترة و هياخدها تاني
ليل بضحك : هو خايف تيتة تشوفها
هشام: بس يا لمضة هانم ويلا عشان ناكل ونذاكر
ليل : بابي انت بقيت مدرس كبير كدة ازاي
هشام : عشان بشرح حلو ف طلاب كتير جدا بيحبوا يخلوني اشرحلهم
ليل : وانا هبقي مدرسة
هشام: اللي تحبيه يا ليلو .. لما تكبري شوية هتعرفي انتي بتحبي ايه
ليل : اممم ماشي
--------------------
بعد خمس سنين
ليل رنت علي هشام : بابي انت هتيجي امتي
هشام : لسه قدامي ساعة يا ليلو
ليل : بابي فيه حد بعتلك شنطة واخدتها منه
هشام بقلق: شنطة ايه
ليل : معرفش شنطة صغيرة كدة .. قالي اديهالك ومفتحهاش
هشام : طيب يا حببتي انا جاي اهو ، اوعي تفتحيها لحد ما اجي
ليل:  ماشي
بعد ما ليل قفلت زاد فصولها بشدة وفتحت الشنطة وبصت بصدمة : ايه ده .. مخدرات
قفلتها برعب ودخلت اوضتها
بعد ساعة وصل هشام ودخل بقلق : ليلو عاملة ايه
ليل بتوتر : كويسة
هشام : فين ياستي الشنطة
ليل بتوتر : عالسفرة
هشام قرب من الشنطة وبصلها بشك: انتي فتحتيها يا ليلو
ليل بقلق :بصراحة اه .. ممكن اعرف ايه ده
هشام بيجمع تفكيره المشتت: ده علاج .. دي حاجات كيميائية بتاعت دكتور صاحبي بيستخدمها في الدوا المركب وكدة وهو مسافر ف سابها عندي فكنت خايف تقع ولا حاجة ده جايبها من برة
ليل ضحكت بشدة: وانا اللي افتكرتها مخدرات
هشام بضحك : مخدرات ايه بس يا ليلو😂

باك_________________________
اول ما وصل بيها التفكير لليوم ده حاولت تركز في كلامها قدام احلام

احلام قامت من مكانها ومشت بتعالي طالعة اوضتها : معلش يا حبيبة خالتو هي الحقيقة دايما بتوجع كدة .. see you يا روحي