انتقام بعد منتصف الليل 🖤-- بقلم / ندا سعيد

part 14

ليل زقته بعنف وبصتله بغضب وقامت وقفت : قصدك ايه
خيّال حس انه اتسرع لما قالها : بصي هفهمك بس اقعد واهدي كدة وانا هحكيلك
ليل بعصبية : مش ههدي .. ها قصدك ايه
خيّال بصلها بضيق : انا جوزك .. والورقة كانت صحيحة
ليل بدهشة: وانا مضيت ازاي
خيّال : لما كنتي في غيبوبة
ليل بصتله بصدمة ودموعها نزلت وبغضب بدأت تضربه وتزقه : انت كداب ، زبالة وحقير .. ازاي تعمل كدة ، والله ما هسيبك
خيّال مسك ايديها : اهدي بقي .. انتي مش فاهمه حاجة
ليل بدأت تزعق : مش عايزة افهم حاجة .. انت استغلالي وزبالة ومش راجل اساسا
خيّال بعصبية ضربها بالقلم علي وشها : احترمي نفسك بقي
ليل اتألمت ووقفت بصاله بدهشة وحست بخوف ناحيته لأول مرة حد يمد ايده عليها عقلها واقف مش قادرة تستوعب اللي حصل
خيّال مسك ايديها جامد وشدها قعدها علي السرير بعصبية و قام يقفل الباب
ليل بخوف قامت بسرعة ناحيته : انت بتعمل ايه
خيّال بيقفل الباب جامد واخد المفتاح حطه في جيبه
ليل شدته من هدومه وبدأت تعيط : انت بتعمل ايه .. طلعني من هنا
خيّال : مش هطلعي
ليل بدأت تعيط وتنادي علي تسنيم وتخبط عالباب : تسنيم الحقيني .... تسنيم افتحي الباب بالله عليكي
خيّال قرب منها وشدها بعصبية : كل اللي بتعمليه ده ملهوش لازمه ، انا عايزك تس
ليل قطعت كلامه : عايز ايه يا حيوان انت .. ابعد عني .. افتح الباب ده
خيّال بنفاذ صبر : يابت الناس عايز اشرحلك كل حاجة .. كفاية هبل بقي وعصبية وركزي كدة معايا
ليل : مش عايزة اعرف حاجة.. افتح الباب بقي
خيّال بغضب وعيون كلها غضب : ليل ... اقسم بالله لو محترمتيش نفسك وقعدي هاديه كدة وحلوة تسمعيني مش هتخرجي من هنا سليمة .. تمام
ليل بعدت عنه لآخر الاوضة وسكتت بخوف وبدأت تعيط
خيّال كره نفسه اوي وندم انه قالها بس غصب عنه مشاعره ناحيتها حركته
بدأ يحكيلها كل حاجة وان ده طلب جدها لحد ما موضوع القتل والجواز يعدي خوفا عليها
☆☆☆☆☆☆☆☆
زينة ويمني دخلوا ليوسف عشان يصحوه
يمني استغربت نومه بالشكل ده بهدومه: يوسف
زينة : يسف ، يوسف
يوسف مش بيتحرك
يمني بقلق بدأت تهز فيه ومفيش رد
جريت بسرعة تجيب برفان او اي حاجة تفوقه ومفيش رد
يمني بخوف جريت بسرعة تتصل بأبوها : الو ايوة يا بابا الحقني
احمد بقلق : فيه ايه
يمني بتعيط : يوسف يا بابا ..
وبدأت يمني تقول كلام مش مفهوم
احمد خرج من شغله ونزل بسرعة ركب عربيته وفي الطريق اتصل بالاسعاف توصل البيت بسرعة
وفعلا مع وصول احمد ابو يوسف وصلت الإسعاف وطلعوا للشقة بسرعة و شالوا يوسف
يمني بتعيط هي وزينة
احمد شال زينة ونزلوا
احمد بخوف : حصل ايه يا يمني
يمني : مش عارفة .. كان راجع تعبان ودخل نام ودخلنا نصحيه مش بيرد .. هيبقي كويس انا واثقة في ربنا
وصلوا المستشفي
احمد حاول يرن علي ياسر بس موبايله مقفول ف رن علي محمد صاحبه
محمد بابتسامة : السلام عليكم
احمد : ايوة يا محمد يابني ..
محمد : ايوة يا عمي.. انا عارف انك هتسال عن ياسر .. هو خرج في مهمة بسيطة بس وراجع
احمد بحزن : يابني حاول توصله بسرعة .. يوسف تعبان في المستشفي خليه يجي يشوفه
محمد قام بسرعة بقلق : يوسف.. حصل ايه
احمد : مش عارف لسه الدكاترة عنده جوة
محمد : طب انا جاي .. مستشفي ايه
احمد : ....
محمد : هحاول اوصل ل ياسر و انا جاي عموما
احمد : ماشي يابني لو كلمك قولي
محمد : تمام تمام حاضر
☆☆☆☆☆☆☆☆
تسنيم برة بعد ما سمعت ليل بتزعق قالت تسيبهم يتكلموا بس لما شافت الباب اتقفل خافت عليها جدا
وبدأت تدور علي اي حاجة تفتح بيها : ياربي ..ايه خيّال ده يعني شرير ولا ايه ..لو فتحت الباب هيموتنا احنا الاتنين
حاولت تفتح الباب بأي حاجة
خيّال جوة الاوضة بغضب : تسنيم لو جربتي تفتحي الباب انتي كمان مش هرحمك خلي اليوم يعدي بقي
ليل فضلت ساكتة وخايفة بعد تهديده ليها
تسنيم خافت لما مسمعتش صوت ليل نهائي وسمعت كلامه ..حاولت تبص من تحت الباب او خرم الباب بس مش شايفة حد منهم
فاجاة باب البيت خبط
جريت تسنيم تنزل تفتح وبتحمد ربنا ان حد جيه ممكن يساعدها .. فتحت الباب لقت شاب طويل عريض وسيم بعيونه العسلي يااااه😂
تسنيم شدته بسرعة من هدومه من كتر خوفها وارتباكها : جيت في وقتك .. تعال بسرعة بالله عليك ساعدني
ياسر اتوتر من مسكتها ليه لأول مرة يحس باحساس ملخبط كدة من سنين كتير ومشي وراها وهي طالعه وبتشده وراها
تسنيم دموعها نزلت :افتح الباب صاحبتي جوة و قريبها معاها وقفل الباب عليها وهي بتعيط .. وبعدها مسمعتش صوتها
ياسر بصلها بدهشة : يعني هو معاها دلوقتي
تسنيم هزت راسها بنعم
ياسر خبط الباب بكتفه وكسره
تسنيم دخلت فاجأة لقت ليل بتعيط وخيّال بيطبطب عليها بحب ..
برقت عينيها وبصت ل ياسر باحراج : انا .. انا .. والله كانت بتصوت
ياسر بصلها بغضب وخرج وبعدها ابتسم علي طريقتها واحراجها

خيّال قام ولافف ايد حوالين كتف ليل : ايه اللي حصل ده
تسنيم ابتسمت باحراج : ابدا
ليل ضحكت عليها وسط دموعها
خيّال : مين الراجل ده
تسنيم : معرفهوش .. كان جاي هنا وقولت ينقذ ليل
ليل ضحكت
خيّال باس راس ليل بحب : هطلع اشوف الأخ اللي برة ده وانتي روقي كدة واغسلي وشك وتعالي
بعد ما خرج خيّال

تسنيم بصت ل ليل بغيظ : انتي قاعدة تحبي هنا وانا هموت من الخوف برة
ليل ابتسمت و سكتت شوية
تسنيم : ايه اللي حصل بقي
ليل بضيق: خيّال جوزي
تسنيم بصلتها بدهشة : نعمممممم ياختي
ليل : ايوة كان طلب جدو عشان ينقذني .. كملت بكسوف .. وكمان طلع بيحبني
تسنيم بتتنطط من الفرحة : بجد ... وانتي
ليل بكسوف وباصة في الأرض: انا ايه
تسنيم : بتحبيه
ليل بارتباك : منكرش انه بيجذبني بس مش عارفة انا معرفش عنه حاجة
تسنيم ابتسمت : ممكن تحبيه بعد كدة .. انتوا لايقين علي بعض اساسا نفس العيون ونفس العصبية والعند سبحان الله
ليل بتفكير : مش عارفة بجد يا تسنيم .. هو قالي لما تعدي فترة قتل بابا والموضوع يخلص كمان بتاع الجواز اللي في البلد ده ممكن نتطلق
تسنيم : وانتي حابة تطلقي
ليل قعدت بحيرة: مش عارفة يا تسنيم .. مش مقررة لسه .. كملت بابتسامة .. بس طلع بيحبني بفكر اديله فرصة مثلا
تسنيم حضنتها بحب : مبروك يا ليلو .. نغم هتنبسط اوي
☆☆☆☆☆☆☆☆
خيّال خرج لقي ياسر بيبص علي حاجات كتير في البيت
خيّال : حضرتك محتاج حاجة
ياسر بصله باهتمام : انا المقدم ياسر الشامي ماسك قضية القتل بتاعت
خيّال كمل : هشام
ياسر : بالظبط .. حضرتك مين بقي
خيّال : انا قريبه و جوز بنته مؤخرا
ياسر ابتسمله وبص ناحية الباب : والأستاذة المجنونة دي
خيّال ضحك : دي صاحبتها .. بعتذر علي اللي عملته معاك هي بس خافت وانا ليل كنا بنتخانق
ياسر : هي شكلها رقيقة فعلا
ياسر سكت شوية وبيفسر ابتسامته وفضوله ناحيتها وكلامه التلقائي ده وبص ل خيّال باحراج : اقصد كانت بتعيط يعني .. المهم انا محتاج افتش البيت ده محتاج اوصل ل دليل وطبعا كويس انكوا موجودين عالاقل تساعدوا ولا ايه
خيّال : اكيد طبعا .. احنا اساسا لسه واصلين من شوية هنا كنا في البلد .. وجينا هنا عشان القضية وليل حابة تساعد وتعرف كل حاجة وانا طبعا معاها وهساعدك باللي اقدر عليه
ياسر : تمام .. محتاج بس ادخل المكتب اول حاجة
خيّال بينادي علي ليل : ليل .. يا ليل
خرجت ليل وتسنيم لقوا ياسر مع خيّال
تسنيم بصتله بارتباك وبعدت نظرها عنه في اي مكان تاني
ليل بصت باهتمام : ايه .. فيه ايه
خيّال : حببتي ده المقدم ياسر اللي ماسك قضية باباكي
تسنيم بصلته بدهشة وفي نفسها قالت: يقطعني..😂
ليل اتكسفت شوية من كلمه حببتي اللي اتقالت وبعدها قالت بجدية : اهلا وسهلا .. انا عايزة اساعدك في القضية دي لازم .. انا اللي هنتقم واجيب حق بابا بنفسي
خيّال : طب يلا ندور علي اي حاجة تنفعنا في القضية دي .. المقدم ياسر كان عايز يدخل المكتب
ياسر بص لتسنيم سريعا : بلاش مسميات .. يعني قول ياسر بس كفاية.. هو الواحد هيتقاله مقدم ازاي بعد الشدة اللي اتشدتها من برة لهنا دي
تسنيم اتوترت من تلميحاته وعملت من بنها
خيّال ابتسم هو وليل اللي فهموا الموضوع: طبعا طبعا يا ياسر .. يلا ننزل المكتب
بدأوا يدوروا علي اي حاجة
وليل راحت للحديدة اللي اتخبطت فيها اول مرة تدخل المكتب وحاولت تحركها
ليل : خيّال تعال ساعدني معلش
خيّال باستغراب : ايه دي
ليل : اتخبطت فيها اول مرة دخلت هنا بس معرفتش ايه دي وليها مفتاح
ياسر قرب ناحيتهم وعطاهم مفتاح : اهو
ليل : وانت جيبته منين
ياسر : كان والدك يوم الحادثة
خيّال اخده وفتح الغطا الحديد الصغير ده وشد البتاعه الحديد لقوا صندوق جوة
خيّال شده طلعه وفتحه وحالة ذهول لبعضهم وصدمة للبعض الاخر