انتقام بعد منتصف الليل 🖤-- بقلم / ندا سعيد

part 7

ليل مبرقة وبصاله بصدمة ودقات قلبها بتزيد ..  كان راجل طويل وعريض ووسيم بعيون زرقاء نفس درجة عيون ليل ، شهر اسود  ، داغرررر!!!
خيّال بصلها بهدوء تام وبعض النظرات الحادة : هتصوتي تاني
ليل بخوف وارتباك هزت راسها ب لا
خيّال شال ايده وقال : بتعملي ايه هنا
ليل بارتباك اكبر واحراج : مفيش كنت .. ايه .. كنت
خيّال مشي اتجاه الباب : هتلاقي اكل عالسفرة
ليل بنرفزة تخفف احراجها : بتسأل ليه طالما عارف اني عايزة اكل
خيّال : يمكن بتأكد مثلا
ليل اخدت نفس عميق تهدي لخبطة مشاعرها المفاجأة: انت اسمك ايه الحقيقي
خيّال وقف ومديها ضهره : الخيّال
ليل : ده اسمك الحقيقي
خيّال لف بلصها بنظرة سريعة : اه اكيد اومال سالفه
ليل ضحكت ضحكة خفيفة وقالت بتعجب : تعرف حد اسمه داغر
خيّال رفع حاجبه وبصلها : اعرفي يعني ايه داغر الاول وبعدين اسألي عنه ، مفيش انسان اسمه داغر ده اسم ميتسماش .
ليل سكتت ومش فاهمه قصده ايه
سابها وخرج
ليل بتكلم نفسها وقلبها بيدق بسرعة  : ايه ده بس .. هو فيه بني ادمين كدة ، وبعدين انا واثقة ان اسمه داغر ..قصده ايه انه ميتسماش يعني .. بس اسمه خيّال .. حلو اوي خيّال اسم جديد لا وقمر ..  ايه اللي بقوله ده ياربي
وجريت لاوضة السفرة عشان تاكل

............................
طول اليوم اهل نغم قلقانين وخصوصا بعد ما الدكتور قالهم حالتها ايه .
الدكتور خرج وتسنيم ويوسف جروا علي الدكتور وقالوا في نفس اللحظة : نغم كويسة!
الدكتور : الحمدلله كله تمام.. حصلها نزيف جامد بس عدي علي خير ولسه مستنيين لما تصحي هيحصل ايه
محمد ابو نغم : طب بنتي فين
الدكتور : هننقلها اوضة تانية .. بس لسه مش هتفوق دلوقتي
حنين مامتها: هتبقي كويسة صح
الدكتور بيطمنهم
يوسف بقلق: هي كويسة صح ولا فيه حاجة
الدكتور سكت لحظات وبعدها قال : لا مفيش حاجة.. ادعولها تقوم بالسلامة بس
يوسف قلبه حاسس ان فيه حاجة عكس كدة
مشي ورا الدكتور: دكتور لو سمحت انا محتاج اطمن عليها.. حاسس انك مخبي حاجة
الدكتور بأسف :  صدقني كل حاجة هتبان لما تفوق .. واضح عندي ان فيه مشكلة هتبقي في الأعصاب .. بس ممكن يبقي الموضوع محتاج وقت وترجع طبيعية عادي ..
الدكتور طبطب علي كتفه : خليك جنبها وادعيلها
يوسف فضل واقف مكانه زعلان عليها وعلي اللي حصل مش عارف يعمل ايه غير انه بيدعي تبقي كويسة
باباه رن
يوسف : ايوة يا بابا
احمد : عملت ايه
يوسف: انا في المستشفي
احمد باستغراب: كل ده
يوسف بضيق: بابا انا خبطت بنت بالعربية ومعاها في المستشفي ومع أهلها
احمد بخضة : ايييه
يوسف بصوت مهزوز : هي كانت بتجري وانا ملحقتش أوقف العربية .. والدكتور قال ممكن تبقي كويسة وممكن لا
احمد والده : لعله خير يا يوسف  ..انا هحاول اخلص الشغل بسرعة واحجز واجي بكرة
يوسف : لا لا متتعبش نفسك الموضوع مفهوش مشكلة اساسا بس انا هفضل هنا لحد ما اطمن عليها
احمد: مينفعش طبعا لازم اجي .. ده واجب يابني يلا سلام
يوسف : سلام ، لا إله إلا الله
احمد : محمد رسول الله
بعد دقايق وصل طارق
طارق بقلق : ايه اللي حصل
حنين : عملت حادثة عربية..
طارق بغضب : ومين اللي خبطها
تسنيم : الاستاذ اللي واقف معانا ده ، وبعدين نغم ..
طارق مسبلهاش فرصة تكمل وراح ليوسف مسكه من هدومه : انت اعمي مبتشوفش
تسنيم جريت عليهم وشدت دراع طارق تفرقهم : انت ايه اللي بتعمله ده سيبه
طارق بصلها بدهشة : اسيبه
تسنيم بغضب : ايوة سيبه ..هي اللي كانت بتجري
طارق بتريقة : وانتي عرفتي منين انها كانت بتجري
تسنيم بصت ليوسف ورجعت بصت لطارق : هو مش هيكدب .. وقبل اي اتهامات وكلام ملهوش لازمة حضرتك نستني نغم لما تفوق
تسنيم لاحظت انها لسه ماسكة ايده.. سابتها بسرعة : عموما الدكتور قال هتبقي كويسة
طارق بعند: مسألتكيش عشان تقوليلي حالتها ايه
تسنيم قلبها اتكسر كتير اوي بسبب طريقته معاها قالت بهدوء عكس اللي جواها : هو مش احنا التلاتة اخوات ولا ايه  ولازم نطمن بعض .. انت حر
سابته ومشت قعدت جنب جدتها اللي ملاحظة كل حاجة بتحصل حواليها في صمت .. ميلت عليها وقالت : حبيبت تيتة انتي كويسة
تسنيم ايديها بترتعش من كتر الحزن اللي جواها : تيتة
فادية: عيونها
تسنيم دموعها نزلت مقدرتش تتماسك أكتر: محتاجة ارجع البيت واجي
فادية : احنا اتفقنا علي ايه .. خليكي قوية بلاش تحسسيه بحاجة هو زمانه بيفكر في اللي قولتيه
تسنيم : انتي سمعتي
فادية بضحك : الدور كله سمعك
تسنيم : كدة عملت الصح ولا اتصرفت غلط كالعادة
فادية : صح .. ودلوقتي قومي وديني الحمام اتوضي بقي
تسنيم : ماشي يلا
قامت تيتة فادية مع تسنيم
محمد ابو نغم : محتاجين حاجة اجيبهالكوا
تسنيم : لا ابدا يا خالو تيتة بس هتتوضي وتيجي
حنين : خدوني معاكوا طيب
طارق شافهم ماشيين : رايحين فين
فادية وحنين سكتوا عشان تسنيم ترد
تسنيم بعد صمت اتكلمت : وانت مالك رايحين فين ولا جايين منين ..
طارق بدهشة من اسلوبها العنيف تجاهه: ايه الأسلوب اللي بتتكلمي بيه ده
تسنيم بغضب : انا حرة
طارق : ايه كل شوية انا حرة..انا حرة دي
تسنيم تجاهلته  : يلا يا تيتة
كل ده كان بيحصل قدام يوسف وسامع كل حاجة لان صوتهم عالي
يوسف مشي وقعد جنب محمد كان باين عليه التوتر علي بنته : خير ان شاء الله .. الدكتور قال هتبقي كويسة انا روحت وسألته تاني
محمد بحزن : اكيد هتبقي كويسة....دي طيبة اوي نغم بتحب الدراسة وفي كلية طيب كمان.. نفسها تبقي دكتورة اطفال....
بدأوا يتكلموا وبعدها طارق انضم ليهم بعد ما اعتذر ليوسف.

رجعت تسنيم وحنين وفادية
تسنيم : انا هدخل ل نغم
تسنيم قعدت جنبها لحد ما نغم فاقت
تسنيم بفرحة: نغم
طلعت بسرعة نادت عليهم ودخلوا .. ويوسف استأذن ودخل بعد ما تسنيم غطت شعر نغم ..
نغم بصتلهم وبتخرف في الكلام : هو انا ركبت الطيارة
محمد باباها : طيارة ايه سلامتك
وبصت ليوسف بتشوش بس لفت نظرها هدؤه وجاذبيته : مين القمر ده
حنين مامتها بضحك : يابت اتلمي
يوسف ابتسم : حمدلله عالسلامة
تسنيم همست لنغم بصوت مسموع نسبيا : ده اللي خبطك
نغم بفرحة : قولي اقسم بالله .. وبصتله وقالت...انت متجوز
كلهم ضحكوا علي نغم 
يوسف باحراج وضحك  : لا ..  انا همشي بقي
نغم بتهييس : لا خليك هنا والا هبلغ عنك
يوسف بضحك:  خلاص هقعد اهو
طارق بضحك : مش هتحلك

كلهم اطمنوا عليها وخرج محمد وطارق ابنه يجيبوا اي اكل ولا حاجة يشربوها ... ويوسف حاول يخرج معاهم بس نغم صممت يفضل قاعد .
بدأت نغم تفوق واحدة واحدة وشفتهم بصورة أوضح وتركيز : انا عايشة ها 
تسنيم : ايوة الحمدلله
نغم مرة واحدةبصت لمامتها ولجدتها : يالهوي ده طارق .. طارق جيه
تسنيم باستغراب  : ايه المشكلة
نغم باستهبال: لا عادي... تسنيم صح معلش ممكن تكلمي ليل عشان اكيد رنت عليا  وهتقلق
تسنيم : ماشي يا قمر هكلمها برة .. خمسة وجايالك تاني .
خرجت تسنيم
نغم : ماما طارق عرف حاجة .. الخطة باظت
حنين: انتي في ايه ولا في ايه .. محدش عرف حاجة
الجدة :  اطمني يا حببتي.. ارتاحي انتي بس
نغم : هنقوله مين العريس
حنين  : هتتحل ياستي
يوسف قاعد باحراج مش عارف يعمل ايه في المواقف اللي زي دي قام وقف : انا هاروح اشوف الدكتور
نغم : لااااا انت هتبقي العريس .
كلهم بصولها بصدمة ودهشة

................
نرجع ل ليل
رايحة جاية بقلق : نغم مش بترد ليه ياتري
من الصبح مش بترد
خرجت من الاوضة بتاعتها ونزلت تدور علي خيّال .. البيت كان ضلمة وفاضي مفهوش ولا شخص
بدأت تتوتر: هم بيحبسوني هنا ... بدأت تنادي ... دادة ... هي كان اسمها ايه ..
سمعت أصوات غريبة تجاه أوضة السفرة ....