ليل قاعدة عالكنبة بارهاق في اوضه خيّال .. رنت عليه كتير مردش و فاجاة وصلها رسالة منه انه واقف برة البيت مستنيها
قامت ليل بسرعة ونزلت جري وفتحت الباب
ليل لقته ماسك شنطة هدومه : ايه ده
خيّال : انتي شايفة ايه
ليل بدهشة كبيرة : انت رايح فين
خيّال : مسافر
ليل : مسافر فين
خيّال ببرود : هتفرق معاكي
ليل ابتسمت: لا مش هتفرق عشان اكيد انا جاية معاك .. اي مكان هتكون فيه انا هكون موجودة فيه .. هطلع احضر شنطتي
خيّال : انتي مش هتيجي معايا
ليل ملامحها اتغيرت: ليه .. وبعد صمت لثواني... انت هتسيبني
خيّال : كل حاجة انتهت بينا يا ليل .. هتسافري ازاي معايا وانتي رايحة تعرضي نفسك للخطر بسبب قضية ملهاش اي ستين لازمة غير انها هتوجع قلبك .. انتي مقدرتيش اي حاجة قولتهالك.. معتبرتيش اني جوزك والمفروض انك تسمعي كلامي لاني اكتر واحدة بخاف عليكي
ليل بدأت تعيط : انا اسفة .. والله مكانش قصدي اقولك كدة ، انا بس اتشتت ، كنت متلغبطة، متمشيش
خيّال : انا مكنتش هقولك اني مسافر.. بس حبيت اعرفك عشا متتفاجئيش
ليل بدموع : خيّال بالله عليك ماتسيبني .. انا اسفة والله مش هقول كدة تاني
خيّال رق قلبه ليها و قال بهدوء : تمام انا هسافر فترة ضروري عشان شغلي وهرجع
ليل : يعني مش هتسيبني
خيّال : لا اكيد هرجع تاني ... يلا همشي بقي
ليل بتلقائية حضنته بحب : هتوحشني اوي ... وابقي كلمني علطول .. ومتزعلش مني يا خيّال والله مكانش قصدي اقول كدة
خيّال : حصل خير يلا سلام
ليل: سلام ... لا اله الا الله
خيّال بصلها بحب : محمد رسول الله
سافر خيّال لشغله و ليل طلعت اوضته وقعدت فيها كالعادة لوحدها ووصلها رسالة منه عالموبايل
" ليل متزعليش انتي كمان مني اني قسيت عليكي في كلامي أو حسسستك بضغط ، استنيني لحد ما ارجع...بحبك "
☆☆☆☆☆☆
ياسر قاعد مع محمد عالقهوة
ياسر بحيرة وضيق مصطنعين طلب الجرسون بصوت عالي : يابني هاتلي واحد قهوة كمان
محمد : مالك يا ياسر .. من الصبح قاعد مخنوق... تشرب ٣ قهوة ليه ؟؟؟؟
ياسر : والله يا محمد مخنوق من كل حاجة
محمد : حصل ايه يعني لكل ده
ياسر كشر : انا قولت ليمني علي طلبك
محمد قلبه دق بسرعة جدا وابتسم : وقالت ايه
ياسر كشر اكتر وشاور علي وشه: وشي مش باين عليه الرد
محمد اتوتر : طب ليه .. يعني هي قالت مش موافقة ..
ياسر سكت
محمد : هو فيه حد تاني في حياتها طيب .. يعني متقدملها
ياسر بيحاول بتماسك : اه واحد كدة اخو صاحبتها
محمد بضيق وعصبية كبيرة لأول مرة يتعصب بالشكل ده : وهي موافقة
ياسر : اهدي يا محمد .. كل حاجة قسمة ونصيب
محمد وقف بغضب : لا يا ياسر انا اسف في اللي هقوله بس انا بحب اختك ومش هسيبها لحد تاني .. انا متأكد ان فيه حاجة غلط .. انا ماشي
ياسر وقف بسرعة يلحقه : محمد اصبر .. ياض انت يخربيتك ...
ورجع يدفع الحساب بسرعة وخرج بس لقاه ركب عربيته ومشي بسرعة .. طلع موبايله يرن عليه ..بس مش بيرد
محمد بغيرة كبير في العربية : مااشي يا يمني والله لاوريكي.. بقي ترفضيني .. انا لولا متأكد وحاسس انك بتحبيني مكنتش هعمل اللي بعمله ده .. انا لازم افهم
أنت تقرأ
انتقام بعد منتصف الليل 🖤-- بقلم / ندا سعيد
Romanceفي نهاية مرحلة الطفولة تبدأ حياة البطلة في التغيير و اكتشاف بعض الأمور الغامضة ومن ثم تبدأ في البحث عن حقوقها وتسعي للانتقام من أجل والدها بمساعدة حبيبها ضد إعصار مخيف في عالم غريب
