نغم ضحكت بشدة : هموووت .. اتفجعتي كدة ليه
تسنيم برعب : حرام عليكي انا ناقصة .. مش تكحي وانتي داخله .. وبعدين ايه اللي عاملاه في شعرك ده
نغم : الا مش بدلع نفسي ولا ايه قولت اعمل زعرورتين
تسنيم بضيق : قلبي لسه بيدق بسرعة يا بقرة
نغم ابتسمت : خلاص بقي ياختي .. عرفنا انك كيوت وبتخافي
تسنيم بتريقة : كيوت وبخاف
نغم قعدت بهدوء عالسرير قصادها وسكتت شوية
تسنيم ضيقت عينها : مالك .. قولي اللي عندك انا حاسه ان فيه مصيبة قولي
نغم بتردد: احنا بعد خطوبة يمني والامتحانات هنسافر البلد
تسنيم بقلق : ليه والقضية و .. ايه ده ثانية هو حصل حاجة .. تيتة حصلها حاجة
نغم : لا مفيش حاجة يا تسنيم بس طارق سافر لجدو واحنا معزومين عندهم علي .. علي خطوبة طارق
تسنيم : اه طب ليه خايفة كدة .. هو حصل حاجة
نغم بصتلها بدهشة : لا عادي .. انتي كويسة
تسنيم فهمت قصدها : نغم ده موضوع واتقفل وبعدين ربنا رزقني بواحد حنين وطول بعرض وحليوة ومحترم وبحبه اوي
نغم : وايه كمان
تسنيم : يابت بطلي طريقة الأفلام بتاعتك دي .. انا كويسة ياستي ومفيش حاجة عادي وهنحضر الخطوبة معاكوا ونجيبوا البت ليل كمان
نغم : اشطا يا معلم .. تصبحي علي خير بقي
تسنيم بتعجب : كنتي جاية عشان كدة بس
نغم : اه بصراحة كنت بحسبك هتضايقي
تسنيم : طب اتكلي يلا عشان عايزة انام
نغم : ياتك القرف الحق عليا جاية اطبطب علي مشاعرك
تسنيم: فيه حاجة اسمها اطبطب علي مشاعرك
☆☆☆☆☆☆☆☆☆☆☆☆
طارق اتفاجي من كلام هند بعد ما سمعها من وار الباب وبعدها راح لاوضته بسرعة
طارق بدهشة وحيرة : بتحبني بالشكل ده ازاي !!!!!
اكيد فيه حاجة غلط.... وشكلها ماله .. انا لازم اعرف مالها
بعدها كلم اهله
حنين : حبيب قلبي عامل ايه
طارق : الحمدلله يا ست الكل .. انتوا عاملين ايه
حنين : الحمد لله يا طارق .. المهم طمني عليك انت عامل ايه .. واخبار عروستك ايه
طارق : انتي عارفة يا ماما
حنين بارتباك : عارفة ايه
طارق بضيق : كنتي عارفة انه هيجوزني بالطريقة دي
حنين بضيق من نرفزه ابنها : في ايه يا ولا هو هنعمل حاجة غلط يعني ..دي بنت زي القمر و هتشيلك في عينيها معرفش انت متضايق ليه .. اديها فرصة .. دي يا حبت عيني الدنيا جت عليها كتير
طارق بهدوء : طب طالما انتي عارفة فهميني .. قوليلي هي مالها
حنين بتعجب : مالها
طارق بحيرة : مش عارف دايما بتلاقيها زعلانة مني كمان .. معرفش مجبرة عالجوازة ولا لا ..ومش عارف يا ماما مالها .. هي اتطلقت قبل كدة
حنين : يا حبيبي اسمعها الاول يمكن فيه حاجة احنا مش عارفينها وهي طيبة جدا وجدك عمره ما هيأذيك ده انت أعز واحد علي قلبه وبيحبك جدا
طارق بابتسامة: بجد
حنين : طبعا يابني هو بيحبك جدا عشان كدة صمم يعاقبك بطريقته كأنه بيلومك علي طيشك الفترة اللي فاتت ... المهم سيبك من ده وركز في القمر اللي هتبقي مراتك واسعدها يا طارق عشان خاطري انا
طارق : عيوني يا ست الكل .. المهم اسبوع كدة وتعالوا بقي عشان الفرح ابقي قولي ل نغم .. اديني بابا اكلمه بقي
-------------------------
يوم خطوبة يمني
نغم بعفوية خبطت عالباب بشدة وجانبها تسنيم و ليل : افتحي يا عروسة.. هي لسه نايمة ولا ايه
يمني بضحك فتحت : مجنونة
نغم : جرا ايه يا مزة .. يا ستي اتقلي علي حبيب القلب مش علينا
يمني بكسوف : لمي لسانك ده .. خشي
يمني سلمت عليهم ودخلوا
تسنيم بتشد نغم عشان تسكت لما لقت يوسف وياسر وزينة وباباهم احمد قاعدين في الجانب التاني
نغم بعفوية : والله يا مزة انتي خسارة في الولا محمد ده ..مش اسمه محمد بردو ...
يمني : اه
نغم بتبص لتسنيم : سيبي الجشاكت بتاعي ....
عارفين يا بنات انا لما اتجوز هبهدل الدنيا مش زي جوز النكد اللي معايا .. بس يجي بس الاسطي حجي .
ليل ضربت نغم في رجليها لما لاحظت ان الرجالة قاعدين جوة
نغم : يالهوي ااااه يا مفترية
ليل : احسن لمي لسانك ده بصي علي يمينك كدة
نغم بحيرة وبصت علي ايديها : دي ايدي اللي باكل بيها يبقي ده يمين .. بصت لقت الرجالة قاعدين و يوسف فاصل ضحك
نغم باحراج ليمني : فين الاوضة اللي هنقعد فيها
يمني بضحك : تعالوا
...............
ياسر بتعجب : بتضحك كدة ليه متحرجهاش
يوسف : اسكت انت .. بتقولك الاسطي حجي
احمد ابوهم ابتسم : ازيكوا يا بنات عاملين ايه
ليل : الحمدلله يا عمو حضرتك عامل ايه
احمد : الحمدلله علي كل حال ... البيت بيتكوا
زينة بتلقائية جريت علي تسنيم وابتسمتلها
تسنيم بتوتر : كوكي عاملة ايه..
زينة : عاوزة ارسم زيك
تسنيم ضحكت وميلت عليها باستها: انتي لسه فاكرة بجد .. يا روحي انتي .. هبقي اخدك عندي نقعد طول اليوم نلون ونرسم اتفقنا
زينة بفرحة مسكت ايديها : يلا بينا
تسنيم شالتها : لا دلوقتي عندنا فرح يمني .. بكرة هاخدك اتفقنا ؟
زينة : اه
ياسر ابتسم وحس قلبه ارتاح من معاملة زينة وتسنيم
احمد ميل علي ابنه ياسر : هي دي
ياسر : مين
احمد : اللي كلمتني عنها وانك كنت متردد
ياسر : اه هي
احمد : وبعدين
ياسر : كويسة صح
احمد : هتتقدملها امتي
ياسر : بعد خطوبة يمني ولا انت رأيك ايه
احمد : علي بركة الله
يوسف : سامعكوا علي فكرة
ياسر : اسكت ياض
يوسف : ياض .. انا دكتور قد الدنيا ، مش بعيد اتجوز قبلك
ياسر : نشوف
يوسف وقف: نشوف ... انا نازل بقي
ياسر : خدني معاك انا رايح الشغل
احمد : انا هقوم اتصل ب الناس اللي هتيجي تزين الشقة .. مش عارف مجوش ليه لحد دلوقتي
#############
أنت تقرأ
انتقام بعد منتصف الليل 🖤-- بقلم / ندا سعيد
عاطفيةفي نهاية مرحلة الطفولة تبدأ حياة البطلة في التغيير و اكتشاف بعض الأمور الغامضة ومن ثم تبدأ في البحث عن حقوقها وتسعي للانتقام من أجل والدها بمساعدة حبيبها ضد إعصار مخيف في عالم غريب
