انتقام بعد منتصف الليل 🖤-- بقلم / ندا سعيد

part 5

ليل بصتله بصدمة ودهشة
وبصت لجدها : مين ده
الجد زاهر بصدق : ده العريس
ليل مش مستوعبة اي حاجة وكمية عصبية ابتدت تظهر علي ملامحها : انتوا بتهرجوا..
الجد زاهر شدها من ايديها وقعدها جنبه وهمس : اسكتي قولتلك هساعدك
ليل شدت ايديها بنرفزه : لا انا هخلص من الموضوع ده لوحدي
بصت للعريس كان قاعد قدامها انسان عنده حوالي 35 سنة وكان بيشرب شاي بكل برود وشكله مستفز بطريقته دي
قالت بصوت عنيف خشن لعل يغير رايه وتخلص : حضرتك اسمك ايه
العريس بكل برود : الحاج أحمد
ليل من جواها عايزة تقوم تخبطه بأي حاجة من بروده ده : وبتشتغل ايه بقي وعندك كام سنة
احمد : شغال في الأرض وعندي ياستي 36 سنة
ليل عايزة ترقع بالصوت .. قالت ببرود: مش شايف انك كبير شوية
الجد زاهر هيموت ويضحك عليها وبيداري وشه
احمد بدهشة : ايه
ليل : اقصد يا حاج أحمد اني لسه صغيره شوية 
احمد : والله مش هتفرق كدة كدة هنتجوز
ليل في نفسها :اعمل فيه ايه ده .. قنبلة برود .. هو شكلا مقبول بس صعب اوي اقبله لا فرق السن كبير بينا
ليل: انت متجوزتش
احمد : لا طبعا .. متجوز اتنين
ليل برقت عينيها وفتحت بؤقها بصدمة وبصت لجدها : اتنين
احمد : اتنين وانتي التالته
ليل بنفس الريأكشن وبتكلم نفسها: فين داغر اللي كان في الحلم  .. ياريتني اتجوزته وخلصت من الهم ده .. انا عايزة داغر مليش دعوة
ليل بخنقة : بس انا مش هقبل ده
احمد : والله كدى كدى هتقبلي بالغصب والا الحاج زاهر عارف هيحصل ايه
ليل بقلق وبدأت تسأل اي حاجة عشان تلاقي اي كارت أخضر ليها : انت مخلف طيب
احمد : 5 بنات وانتي هتجيبي الواد
ليل ابتسمت بمكر وقالت بجد وصوت صارم : بس انا مش بخلف
احمد بصدمة : نعم
الجد زاهر بصلها بدهشة : بتقولي ايه
ليل: انا مش بخلف .. يعني مش هقدر اجيبلك الواد
احمد : وانتي عرفتي كيف
ليل : تعبت وكشفت وطلعت مش بخلف
احمد ببرود اكبر : عادي تقعدي تعملي اي حاجة .. هتجوز وإحدى رابعة
ليل بعند: تمام واخر حاجة انا هكمل تعليمي
احمد : ماشي معاد الامتحانات هتسافري لابوكي بس ... وبص لجدها ... انا عملت طلبك اهو وجيت اشوفها الاول .. الفرح التلات الجاي
ليل بصت لجدها بدموع وخرجت بسرعة تطلع اوضتها : يارب انقذني يارب .. انا معملتش لحد حاجة وحشة .. مش عايزة الحياة دي يارب .. يارب ابعده لو شر يارب ..انا لازم اهرب واللي يحصل يحصل
.............................
رجعت تسنيم ل بيت جدتها بحزن كبير صعبان عليها نفسها.. دخلت البيت وقعدت علي الكنبة بتنهيدة
جدتها فادية خرجت من اوضتها علي صوتها : حببتي انتي جيتي
تسنيم بابتسامة: ايوة يا تيتة
فادية حضنتها بحب : شوفتيه
تسنيم بخجل : مين
فادية: طارق حبيب القلب
تسنيم دموعها نزلت
فادية بحب : بلاش دموع حبيبة تيتة يا ناااس بتحب
تسنيم بصوت ضعيف وشهقاتها بتزيد : هو مش بيحبني يا تيتة ، انا عارفة ده كويس بس غضب عني انا بحبه اوي من زمان ، عارفة انه مجاش مع نغم عشان ميشوفنيش هو انا وحشة
فادية : لا مين قال كدة .. انتي قمر .. بذمتك في حد عيونه حلوة كدة بس مش احلي مني
تسنيم ضحكت وسط دموعها..
فادية بتفكير  : اممممم اقولك تعملي ايه وهتخليه يجري وراكي ..حببتي لو شوفتي طارق اتعاملي معاه ببرود .. خليكي قوية قدامه وعندك لا مبالاة كدة وليكي شخصية واحلام وطموحات اوعي تبيني مشاعرك أكتر من كدة قدامه ، جربي تخليه يغير مثلا وساعتها نعرف اذا بيحبك ولا لا.
قومي يلا اغسلي وشك انا عملتلك شوية مكرونة حلوين اغرفيلنا طبقين وتعالي نكمل رسوماتك دي .
تسنيم حضنتها بحب : حاضر  و احلي طبق مكرونة بالصلصة لاحلي تيتة في الدنيا
بعد 3 ساعات الباب خبط وفتحت تسنيم وكانت نغم و عيلتها
تسنيم بهزار : لحقت اوحشك
نغم دخلت وبصت للصالة بدهشة وانبهار : واااااو.. ايه الرسومات دي كلها .. حتي الحيطة رسمتي عليها .. وايه كل الألوان اللي في كل حته دي .. قمة الروعة بجد انا مش همشي من هنا .. انتي خليتي ديكور الصالة تحفة بالألوان و العشوائية دي .. بحبك يا عشوائي انت
ضحكت تسنيم بشدة : بتفصليني ضحك ..
مامت نغم (حنين) : تسنيم موهوبة جدا من زمان ربنا يحفظك يارب يا قمر .. امي فين
تسنيم : جوة في اوضتها لسه داخلة .. اومال خالو مجاش ليه
نغم : لسه في الشغل .. ممكن يجي وممكن يتأخر بقي واحنا قولنا نقضي يومين هنا
تسنيم : انا مبسوطة اوي انك هتقعدي معايا من زمان مقعدناش كتير سوا
نغم : تعالي بس الاول عشان فيه موضوع مهم لازم نتناقش فيه
تسنيم قعدت قدام نغم : خير
نغم : طارق جاي بكرة
تسنيم وقفت بخضة : ايه
نغم: ايوة جاي بكرة  عشان المصيبة اللي انا فيها
تسنيم بقلق: فيه ايه
نغم بحزن مصطنع: تيتة جايبالي عريس وانا مش عايزاه
تسنيم باستغراب: عريس ازاي يعني .. وانا معرفش .. اكيد بتهزر معاكي يابنتي كانت قالتلي الاول
نغم : ماهي كلمت ماما واقنعتها وبابا بردو .. يمكن مثلا محبتش تفتح الموضوع قبل ما انا اعرف مثلا ولا اي سبب
تسنيم: طب ليه كدة ..انتي لسه في كلية وقدامك أحلامك لسه
نغم : ايوة قوليلهم بقي .. بجد مش عارفة اعمل ايه وهم مصممين
تسنيم طبطبت عليها بحنية : هتتحل انا عمري ما هخلي ده يحصل انتي مستقلية بيا ولا ايه
نغم بحب : ربنا يخليكي ليا .. هقوم اشوف تيتة واجي
تسنيم سرحانه في طارق اللي هيجي بكرة.
نغم ومامتها حنين في أوضة الجدة فادية اللي كانت بصالهم بمكر : فيه ايه .. عملتوا مصيبة وجايين هربانين هنا
حنين بضحك : دايما قفشانا
نغم: ارجو من الجميع الاستماع جيدا .....
وبدأت نغم تقول خطتها واللي بدأت تنفذها
فادية بتفكير: بس غلط كدة يا نغم
نغم بتكشيرة : ليه بس
فادية: عشان ممكن يحصل مشكلة بينهم لو الموضوع اتكشف .. وبعدين هنقول مين العريس
حنين: ماما انا شايفة انها فكرة كويسة .. عالاقل البغل ده يحس شوية .. ممكن نقول اي حد يعني معرفة ولا حاجة .
فادية بصت لنغم : ابوكي عارف
نغم : ايوة
فادية ضحكت : يخربيت افكارك السودة دي ، طب لبه مقولتوش لتسنيم
نغم : بصراحة كنت هقولها اهها خطة بس تسنيم مش هتوافق فقولت الموضوع يبقي جد قدام طارق وتسنيم
دخلت تسنيم ليهم : بتتكلموا في ايه يا حلوين
حنين : ولا حاجة يا روحي تعالي
تسنيم : هو اللي سمعته ده صح
نغم شاورتلها تسكت من بعيد
فادية: هو ايه
تسنيم غيرت الموضوع وقالت بتلقائية: طارق جاي بكرة .
حنين : اه ان شاء الله
تسنيم ابتسمت لها : ان شاء الله .. تشربوا شاي يا جماعة ولا اي حاجة
نغم : اه تعالي نعمل شاي
دخلوا المطبخ
نغم : تسنيم
تسنيم: امممم
نغم: انتي ناوية تعملي ايه مع اخويا
تسنيم : ولا حاجة
نغم : ازاي يعني
تسنيم : ولاحاجة بجد
نغم : يابت انطقي
تسنيم: اخوكي اذي مشاعري كتير بس المرادي غير .. هوريه مين تكون تسنيم
نغم بفرحة : ايوااا بقييي... هتعملي ايه
تسنيم : لما يجي تفرج .. غيري الموضوع بقي ..
نغم بصتلها بغيظ وسكتت
.....................................
الجد زاهر : اقعدي يا ليل خليني اتكلم
ليل رايحة جاية بغضب : انا ههرب والله علي جثتي الجوازة دي تتم .. انتوا عايزين تموتني بدري .. حرام عليكوا
زاهر : يابنتي اقعدي اشرحلك هتهربي ازاي
ليل وقفت قدامه : ههرب بجد
زاهر : ايوة مفيش حل غير كدة
ليل : طب هم حاطين ناس تراقبني
زاهر بثقة : هتهربي عادي.. هتلبسي زي الستات  اللي هنا وتخرجي من الباب اللي ورا .. وهديكي عنوان تروحيله .. لمي هدومك اللي هتحتاجيها
ليل بسرعة لمت هدومها واخدت حاجاتها المهمة : منه لله معرفش انا فرح ايه اللي بعد يومين ده اوف حتي ههرب بسرعة.. كل حاجة في حياتي بتحصل بسرعة .....   يارب عدي اليومين دول علي خير
لبست ليل هدوم سودة ونزلت
زاهر حضنها بحب : انتي هتروحي لمكان امان ليكي .. متخافيش ابدا وانتي هناك
ليل : هو ممكن يعملوا حاجة لما اهرب
زاهر : لا لاني انا اللي هعلن انك هربتي وهاخد الموضوع بجدية فمستحيل حد هيلاقيكي.... بس رني عليا اول ما توصلي المكان ده .. هتلاقي حصان مربوط هناك اركبيه وهو هيوديكي المكان الصح
ليل بدهشة : حصان
زاهر : ايوة يلا امشي بسرعة مفيش وقت
خرجت ليل وركبت قطر ونزلت ومشت علي وصف الطريق في اماكن صحراوية لحد ما لقت حصان ابيض جميل جدا مربوط في مكان بعيد شوية.. مشت لحد ما وصلت وركبته بعد معاناة والحصان مشي لوحده لمكان جوة الصحراء
ليل بخوف: يالهوي يالهوي يالهوي ايه الصحراء دي  .. جدو هيجيبلي سكتت قلبية باللي بيحصلي ده
بعد نص ساعة الحصان وقف
ليل كانت حاسه دماغها بتلف من كتر الحر والشمس كانت شديدة عليها : وقفت ليه .. مفيش ولا بيت هنا ولا بني آدم حتي .
سمعت صوت من وراها رجولي رائع خطف قلبها في ثانية " هل يعقل ان نبرة صوت تخطف قلب "
: ليل
ليل بصتله بارهاق وتعب ثم بانبهار وصدمة نزلت من عالحصان بسرعة وقربت منه وهي علي وشك الإغماء : داااغر