حب وحرب ( في ليبيا يحرم العشق)
البارت 2
توا عدا شهرين على موت ماما ، كل يوم نبكي على
فراقها، صح هيا عاشت مع بابا مرتاحه ومش متعوده على التعب ،لكن تعبت روحها عشاني ، اشتغلت وتعبت ،وسهرت عشاني ، عشان ما نحتاج لحد ، ولكن احتجت..
شهرين في بيت عمي سالم ،ماذقت فيهن طعم الراحه ، في مره قررت نهرب منه ،ونمشي لعمتي سالمه ، راجلها شيخ وله كلمته، وهيا تحبني يمكن تقبل تخليني عندها وانتريح من عمي ، او حتى نقعد في بيت بابا ،حتى كان بروحي اهون عليا من العيشه عند عمي ، وراني الويل، اهملت قرايتي بسببه ، انا صف ثالث متوسط المفروض انركز على قرايتي ساد اللي فاتني بعد ماتت ماما ،
المدرسه بعيده من شقة عمي ، وهوا مايوصل فيا ، نمشي بروحي وانجي بروحي ، وانتعرض للمضايقات ، انكمل في الطريق نقرا قي اذكار وآيات، وفي يوم ....
كنا انضفوا انا وعمتي هدى في المخزن،،،تميناه ومشيت انا انراجع في امتحاني وعمتى هدى في المطبخ، دخل عمي بسرعه يدور في طروف السياره ، مستعجل ويسب والدنيا اللي لميناها كلهن رد حوسها ،صبينا من الخوف اندوروا معاه ،،،سألتني عمتي هدى قالتلي وين حطيتيهن ...؟؟
- مش عارفه واللهي مش مركزه...
التفت عليا بعصبيه انتي اللي حركتيهن؟؟
- مش عارفه واللهي ما شفتهن ،،، ويهجم عليا كسرني تكسير ،،، وعمتي هدى ساكته اوكان تكلمت تنظرب حتى هيا ...
طلع عمي يسب ويحط في اللوم عليا ،،، قربت مني عمتي هدى تبكي ومش عارفه شنو اتديرلي..
: انتي كيف متحمله العيشه معاه ، ليش صابره عليه سكار ويضرب فيك وبخيل شنو مصبرك عليه بس ؟؟
- مسحت دموعها وتنهدت بألم ،،،غاليه حتى انا زيك ماعندي حد يسندني ، انا من المرج وامي متوفيه من صغري، عندي خو واحد بس شقيقي، باتي اجوز بعد فتره قصيره من موت أمي ، مرته ورتنا الويل ، وهوا يسمع في كلامها اللي اتقولها هيا تمشي ، تحرم فينا من الاكل انا وزيد خوي ، تضرب وتسب وتخدم فينا ، نرفعو وانحطو وما يعجبها شي ، وباتي الله يرحمه ويسامحه يسمع منها ويزيد يضربنا ، وتوا باتي مات من خمس سنوات وزيد انتحر زمان من العذاب اللي شافه ،،وخوتي من باتي زي امهم البنات والعيال مافيهم خير .
- كم عمرك بعد ماتت امك ؟؟
- انا عمري 10 وزيد 7 ،،عيشتني عندها خدامه، جوزوني لعمك بدون علمي ، مجبوره نصبر وانتحمل
.
كملنا الليل نشكو ونبكو ،،رقدت وانا حاطه في راسي اني مش راح نرضى بالذل هذا اكثر من هكي... ثاني يوم الصبح ، نضت نبي نمشي للمدرسه ، توضيت وصليت ، اشوي وناضت عمتي هدى ،،،
: صباح الخير...
:صباح النور ..
- فطرتي ؟؟
- لا ، ماعندي نيه، خلاص وقت ضروري نطلع توا عشان نوصل ع الموعد.
- مربوحه استودعتك لله، عينك من روحك ..
ابتسمتلها وطلعت تعجبني حنيتها ،تخطر عليا امي ،،،نزلت من العماره جت من قدامي سياره فيها شاب اسمر ،،، ماركزت عليه ماشيه وسرحانه ،قرب عليا بسيارته ونزل القزاز ..
