حب وحرب( في ليبيا يحرم العشق ) 🇱🇾
البارت 7 ...للكاتبه Mona alzwiy
~الحياه حرب ؛ حرب مع نفسك.. حرب مع الظروف ،،وحرب مع الحمقى الذين صنعوا هذه الظروف ..
دوشت ولبست بجامه جديده صفرا وعليها ميكي ماوس صغار صغار، نص كم والسروال ببجي حلوه وطفوليه ، رفعت شعري، ونزلت انجيب في فراشي من دار عمتي لطفيه، لقيت البنات في طريقي نضراتهن مزعجه ، لكن ولا وحده فيهن تكلمت ، رفعت فراشي لدار نضال، ونزلت قعدت مع نضال وعمتي ، هدرزنا اشوي وصبا نضال رقا فوق ،،قالتلي عمتي ارقي وراه ، وحياتك امك اكسبيه مالكي غيره يابنتي ، صبيت رقيت فوت ، فتحت الباب لقيته قاعد ع الكنبه ويتفرج على الأخبار،، دخلت بهدوء قعدت جنبه مش جايني نوم ،، لف عليا: تبي اتفرجي؟؟
_ لا
رفع الريموت وطا الصوت ،، وقالي مرتاحه هنا؟؟
رفعت عيوني فيه ،،، تحشمت انقوله لا مش مرتاحه ،، قتله الحمدالله ،، رد سأل،كنتي مرتاحه عند عمك ؟؟
رديت على طول وبدون تفكير : لا
عقد حواجبه بأستغراب : ليش انتي بنت خوه المفروض كيف بنته .
هزيت راسي : المفروض،، هوا عصبي وبخيل ،، حتى كان يضرب فيا ، وفي النهايه باعني .
_ ليش اتقولي باعك ، قولي جوزني ،، واحمدي ربك اللي فكك منه .
حسيته يبي يهون عليا ،، الحقيقه هيا ان عمي باعني مايتخالفو عليها اثنين.. قتله : الحمدلله علي كل حال
نبي نسأله على عمره وخايفه مش عارفه ليه ،،،
_ ممكن سؤال؟؟
جاوبني وهوا يحط في الدخان في فمه ويبي يولعه : اسألي !
_ كم عمرك؟
طلع الدخان من بقوه وسند ظهره على الصالون
_37
عقدت حواجبي وعيوني امتلو دموع ،، عاودت السؤال بأستغراب كم؟؟!!
ركز على ملامحي بعصبيه،، خيرك ؟ مش عاجبك؟؟
انحرجت حسيت ردة فعلي بايخه لكن ظلم ،انا عمري 16 وهوا 37 واللهي ظلم ... حزة في نفسي توا بس كيف عرفت ليش اللي يشوفني من هلهم يستغرب اني مرت نضال ...
مارديت عليه ،،، طفا الدخان بقوه ع الطاوله ودخل سريره ،،، حسيت بروحي مخنوقه محتاجه نبكي ، مشيت للحمام غسلت وجي ،، وطلعت رقدت في فراشي ...
لثاني يوم نضت على صوت حركته ،يفتح في الدولاب ويصكر ،حركته مزعجه ،،، نضت لقيه ،، امصبي على الدولاب ،، سألته الساعه كم ؟؟
لف عليا بعصبيه وهدوء في نفس الوقت: الناس اتصبح قبل ما تسأل ..
حرجني ،، قتله صباح الخير..
رد من طرف خشمه : صباح النور
دخل هوا للحمام ،، مشيت انا للشنطتي ،،طلعت منها غسول للوجه وفورشه ومعجون ،، خذيتهن امس بعد شالني للسوق ،، كل شي خذيته حطيته في الشنطه،الدولاب كله دبشه ماعرفت وين انحط..
طلعت للحمام الثاني،،، كملت رديت للدار على طلعته من الحمام ،، امدوش ولاف المنشق على خصره ، ودبشه على السرير ،، انحرجت ماعاد عرفت انقدم ولا انوخر ،، لفيت وطلعت بسرعه ،، حطيت الغسول على الطاوله اللي في الصاله ، ونزلت ،، البيت هادي البنات وعمتي راقدات ،،
درتله قهوه وحليب ليا ، جهزت الفطور ،، اشوي ونزل هوا ،، دخل على دار امه ،،، صبح عليها ردت ،شكلها كانت واعيه لكن مسكينه ماتقدر اتحرك لين يدخلوا عليها،،، مشيتلها صبحت عليها ،، وقعدت معاهم لين ما الخبزه سخنت ، نضال جوه حلو مع امه يضحك معاها ويضحك فيها، وكأنه طفل مع امه ،، جبت الفطور وفطرنا معاها ،،، طلع هوا وانا غسلت مواعين الفطور....
