حب وحرب( في ليبيا يحرم العشق)🇱🇾🔥
البارت 14 : Mona alzwiy
《ماذا عساي ان انثرها من كلمات لتجاري هذه الشجيات المؤلمه ، فحروفي حزينةٌ لم تعد تقوى ان انثرها ،،، لعلي القاك في جناته بعد موتي يامن في بعدك مماتي ...》 mona alzwiy
_____________________________________________ ____________ ____________
انا مزلت في مكاني مش فاهمه ليش اتقولي هكي ، ،مزلت مش فاهمه شي وهيا اتلز فيا برا واتقولي فتانه
_ شنو دخلني انا
_ شنو دخلك ها شنو دخلك ما انتي اللي فتنتي عليا يا كلبه،،،،واتصبي اتهد عليا تضرب واتعض وسمر تباعد فيها وعمتي تعيط عليها ،، ترفس فيا بكرعيها على بطني من الوجع ماقدرت نرفع راسي،،، جا نضال رد كسرها يضرب فيها ،،وحسيت بالدم اللي ينزل مني ومعش شفت شي الدنيا ظلمت وحاسه بالدم ينزل مني ومش قادره انتحرك ولا انتلكم وصوت عياط الاء وسمر وعمتي ،،، وألم حقير في بطني، حسيت بأيدين نضال على وجي يواعي فيا ،،،ورفعني طلع بيا ،،،انا بين الوعي والا وعي ،،اصواتهم متداخله في وذني ما انميز شي ،،،اخر شي سمعته من نضال في السياره : غلاي نوضي خلاص قريب نوصلوا ماتغمضي عيونك لالا غلاي........
_______
دخل نضال للمستشفى ورافع غاليه اللي غارقه بدمها ،،،شافوه الدكاتره والممرضات جوه يجروا حطوها على السرير ودخلوها لقسم النساء والولادة،،،، قعد نضال حايس في الممر يمشي ويجي وايديه دم ،، شاف الممرضه طلعت مشالها : خيرها كيف حالها توا
_ نزفت هلبا ووضعها حرج
_ حامل هيا؟؟؟؟
_ سقطت ، ربي يعوضكم خير ..
حط نضال ايديه على راسه ووخر على الساس بضيق وقهر وهوا يردد: لا حول ولا قوة الا بالله
قالتله الممرضه: محتاجين دم نزفت هلبا وهيا صغيره ما تتحمل
تنهد وقاللها ، فصيلة شنو !؟
B+
هز نضال راسه ومشا للحمام غسل ايديه وسحبو منه دم واجد لغاليه ...
طلع قعد يالا قسم النساء وواضح عليه الضيق والقهر ،،، اتصلت عليه امه تطمن على غاليه ،على طلعة الدكتوره، صكر على امه ومشا للدكتوره ..
_ ها يا دكتوره كيف حالها توا !؟
_ البنت متعرضه للتعنيف نتيجة مات اللي في بطنها..
_ لا حول ولا قوة الا بالله، ان لله وان اليه راجعون،،، نقدر انشوفها توا !
_ تفضل بس بلا ازعاج ،،، واشوي ويجو الامن ياخذو اقوالها البنت مضروبه
_ لا اتديري معروف ما لازم الامن ،،، عندي مشاكل في البيت وانا انحلهن لمي القصه
_ مانقدر هذي امانه
_ معلش لمي القصه وان شاء الله ما تتكرر الولد ولدي وانا اللي فاقده قدري الضروف
_ تمام ربي يعوضكم ان شاء الله
_ بارك الله فيك
دخل نضال على غاليه اللي راقده بتعب واضح عليها ،،والأجهزة المتصله بيها...قرب حب على رأسها ونزلت دمعته بعد شافها هكي ،، كسرت خاطره مقهوره عليها وعلى ولده اللي راح قبل مايفرحوا بيه او يشوفوه ،، حتى فرحة الحمل انحرموا منها .... قعد يالاها مسك يدها اللي فيها التغذيه : اسف غلاي سامحيني ،،، انا السبب في اللي انتي فيه توا ،،انا اللي اناني ماقدرت ضعفك وعمرك...تنهد وحط راسه على يدها ،،، سمع صوت الباب رفع راسه دخلت الممرضه: ماناضت
_ لا
قربت اتعدل في الجهاز اللي ينقل في الدم للغاليه سألها: كانت حامل في الشهر الكم
_ الثاني
زاد انقهر نضال يعني هيا حامل لها شهرين كيف مالاحظ ، ولا هيا عرفت ،،ماتغير فيها شي ..
طلعت الممرضه اتكا ع الكرسي يالاها واتصل بأمه طمنها وقاللها كانت حامل وطيحت ،، انقهرت حتى هيا ،، شاف غاليه تبي تفتح اعيونها وتون من الألم ،،، صكر من امه ،،،وقرب منها.....
___________
فتحت عيوني بصعوبه وحاسه ان جوفي فارغ ،، انشوف للدار مش داري ،وحاسه بألم حقير في بطني من تحت،،، نبي نقعمز ماقدرت ،،
جاني نضال ؛ غلاي الحمدالله على سلامتك
ماقدرت انرد عليه هزيتله راسي و رديت غمضت عيوني مش متحمله الضي
_ شني اتحسي توا
جيت نبي انحول جهاز التنفس انرد عليه ،حول يدي وقالي خليك تريحي
قعد ساكته اشوي انشوف للسقف وشفت لنضال لقيت عيونه فيهن دموع قهر ،،حولت الجهاز وقتله: نضال كنك
_ مافي شي انتي كيف حالك توا
_ مش تمام ،تعبانه
_ رفع يدي حبها وحطها على خده : سامحيني
_ الله يسامحك
_ نبي نمشي للبيت
_ تو نمشو اتجي الدكتوره اتشوفك قبل
_ خلاص انا كويسه نبي نمشي للبيت مش متحمله المستشفى
_ انكملها وانجي تريحي انتي
جا نضال يبي يصبي قتله: نضال
_ رد عليا : نعم
_ شنو الدم اللي كان ينزل مني انا حامل صح
_ تريحي توا
_ قولي بلاهي
_ كنتي حامل
_ كنت !!يعني مات صح قول لا بلاهي نضال قول لا نبيه انا نبيه ،،
معش قدرت انسيطر على روحي انا ليش هكي مكتوبلي انعيش وحيده ليش ياربي
انعيط ونضال يهدي فيا ،،ودخلت الدكتوره والممرضه وانا انوخر فيهم : نبي اوليدي نضال قوللهم نبيه ،،، تعبت من البكاء رقدت ودفنت راسي في المخده ونبكي بقهر وفقد حسبي الله ونعم الوكيل فيك يا الاء الله يقهرك كي ما قهرتيني ،،،، نضال يهدي فيا وواضح عليه حتى هوا مقهور ،،، قال للدكتوره نبي انطلعها دارتلنا خروج ،،قالي تو انجي انجيبلك حاجه تلبسيها وانشيلك للبيت ،، جيت هنا بملاية الصلاه وكلها دم ،،، طلع نضال وقعدت انا بروحي مع خيبتي وقهري ،، جتني الممرضه قعدت معاي شكله موصيها نضال ،،، اتواسي فيا وانا مارديت عليها بحرف دموعي اربعه اربعه، ،ماعندي مانقول اصلآ،،، يمكن نص ساعه وجا نضال جايبلي دبش ،، صباني للحمام قتله امشي انت ندخل بروحي قالي انساعدك ما خليته ،، جت الممرضه قالتله خليها تو ندخل معاها انا ،،، قتلهم نقدر ندخل بروحي،،،دخلت ومعش قدرت انصبي الدنيا اتدور بيا اتكيت ع الساس ،، دق نضال: غاليه كويسه انتي
ماقدرت انرد عليه حاسه بروحي نبي انطيح سندت روحي عشان نوصل للباب ،،فتحته جاني نضال بسرعه مسكني ،،ونادا الممرضه جت هيا ساعدتني غسلت وغيرت،،، حطتلي اللي كنت لابسته في اشكاره وحطاته في الشنطه اللي جابها نضال ،،،طلعنا من المستشفى فاقدين ولدنا قبل مانفرحو بيه،،، الطريق كلها ونضال يهون عليا ،،ويصبر فيا ،،،وانا حتى حيل نسمعه ماعندي ،،حطيت راسي ع القزاز وسرحت في خيالي كان مزال ولدي عايش وعرفت روحي حامل قبل مايموت ،، ليش ننحرم من الفرحه هذي ياربي ليش
وصلنا للبيت جا نضال يبي يسندني قتله نقدر نمشي بروحي رفع هوا الشنطه ودخلنا على دار عمتي واضح عليها كانت تبكي وسمر معاها ،، من شفت عمتي وكأني شايفه امي قعدت في حضنها وبكيت وهي تبكي معاي واتصبر فيا ،،، سمر نزلو دموعها قالتلي ان شاء الله ربي يعوضكم خير ...
