حب وحرب( في ليبيا يحرم العشق )🇱🇾
البارت 6 ..كتابة mona alzwiy
___
الوطن ليس فندقاً نغادره عندما تسوء الخدمه ..سوف نبقى هنا ..🇱🇾🤍
___
مر اسبوعين، وانا عندهم، نرقد مع عمتي لطفيه ،، طيبه ومتعاطفه معاي ،،صارت كم مشكله بيني وبين سمر والاء خواته ،، من عرفن قصتي يعزقلي في كلام ،، هلك باعوك وخونا لمك ،،،
اكيد دايره فضيحه وهلك عزقوك له ،
،، عمتي اتسكت فيهن ، وانا مرات نسكت مرات انرد ،وما يتعرضلي ونضال قاعد يخافن منه، من يطلع هوا يبدن فيا ،،، تحملت منهن واجد ،،
لين في يوم ، غسلت مواعين الغداء ،، مشيت دوشت ورقدت في دار عمتي لطفيه،، نضت بعد العصر بواجد،، نسمع في صوت صبايا وهدرزه ،صليت العصر، لبست جلابيه بناتيه تحت الركبه وثلاث أرباع، سوده فيا من فوق ورد خفيف ،، درت شعري شده ونزلت خصلات من قدام،، حسيت وجهي باهت ،، ،، درت اشوي روج وطلعت..لقيت الاء في الصاله تبرم واتبخر ،، سألتها من في جوا،، ردت من طرف خشمها : الجارات ..تخطيتها ودخلت على دار المعيشه اللي فيها سرير عمتي لطفيه ،،دخلت سلمت ،ثلاث صبايا وحده كبيره واجد كيف عمتي لطيفه لكن بصحتهااا ،، والاثنين التانيات يمكن الخمسين،،،سلمت وجيت نبي نطلع لفت المرا الكبيره على عمتي لطيفه: هذي هيا؟؟
رديت لفيت -- ردت عليها عمتي لطفيه وهيا تبتسملي ، هذي الغاليه مرت الغالي ...ابتسمتلها وجيت نبي نطلع نادتني عمتي لطيفه ، قالتلي قعمزي ،،رديت قعدت،، سألتني المرا الثانيه : شكلك صغيره، كم عمرك؟؟
_ 16
لفت على عمتي لطيفه، مش كبير عليها نضال !
عمتي لطيفه: لا مش كبير مش اول واحد ياخذ صغيره .
كملن هدرزه ، وطلعت انا انساعد في سمر والاء في المطبخ ، وخاطري نسأل على عمر نضال ،،، ليش اللي انقوله عمري يقول حرام...
خليت سمر لين طلعت، قلت نسأل الاء انحسها خير من سمر،، الاء ؛ لفت عليا بدون ماترد ،،،
_نبي نسألك!!
_ على؟؟
_ نضال كم عمره؟؟
ههههههه ههههه تضحك وتغسل في النعاع ،انا وراها ومستغربه ،دخلت سمر: خيرك تضحكي ضحكينا معاك!!
_ المدام قصدي الانسه تسأل على عمر راجلها ههه
ضحكت سمر بهزوه ، ماتلوميهاش ،مش معتبرها مراته ،،، تي هوا ما يشبحلها اصلآ،،، قعدت ساكته معش عرفت شنو انرد او شنو انقول كلامهن يقهر ، ولو حد يسألني كنك ننفجر بكاء ،،مسكت روحي وقويت عزمي ،، لفت عليا سمر : قصدي بجديات عمك لوحك هكا عادي ،،، تي مادارلك حتى قيمه ، مزال ما جمعت كلامي حتى عشان انرد عليها ،،اتقول الاء : اكيد مدايرتلهم فضيحه رموها بلاش
انفجرت فيها ،، احترمي نفسك وسيرتي معش اتجيبها على لسانك انا انشرفك وانشرف عيلتك ،،لكن لومي ع الزمان اللي جابني لامثالكم ،،ويهدن عليا،، هنا الاثنين طلقن السنتهن ،،، معش قدرتهن انهد حيلي ،، طلعت من المطبخ يدي على فمي ودموعي اربعه اربعه ،، معش انشوف في حد قدامي ، سرعت خطواتي ، خبطت في نضال ،،بعد شفته قعدت نبكي ونشهق ..
_ خيرك ؟ علاش تبكي ؟؟
نبكي وما رديت عليه نبي نمشي لدار عمتي لطفيه ، نبي نقعد بروحي ،، كرهت ضعفي كرهت كوني بلا سند ،، مسك في يدي ،، وجرني وراه ،، رقا ع الدورج وانا وراه ،، طلعن سمر والا، يشوفن فينا ،،، دخلني لداره وصكر الباب : خيرك تبكي؟؟
