حب وحرب( في ليبيا يحرم العشق )🇱🇾🔥
البارت32
بقلم : منى بن محمد الزوي ...
_________
نزلت و دموعي تجري نبي انقول ل الاء تجي معاي انصكروا علينا في واحد زبق ع البيت،،،لكن شفت شي عمري ماتمنيت اني انشوفه الاء لابسه عبايه واللي انا شفته حاضنها ويبوس فيها وهيا متجاوبه معاه شهقت بصدمه وخوف حطيت يدي على فمي التفت عليا والاء حطت ايديها على فمها ،،، رقيت نجري جا وراي يلحق فيا انعيط وانادي في الاء لكن ماجت دخلت داري نبي انصكر عليا ماقدرت دف الباب ودخل انا طحت على ظهري،، حسيت شي في بطني انقطع ،،، هجم عليا ضربني لين فقدت الوعي....
بدا وعيي يردلي قدرت نفتح عيوني،،، سندت روحي قعمزت بصعوبه ،،،عيوني مضببات ونبكي ونرجف من المنظر اللي شفته،، الوطا يالاي كلها دم ،،، دبشي غارق في الدم،،، مافي حد معاي نضال مشا مع سوسن وخلاني،،، زحفت لين للتليفون حاولت في نضال لقيته مقفل ...ماسكه بطني وانعيط اشوي اشوي انقوي روحي وانحاول ناخذ نفسي نتصل على سمر ،، اتصلت بيها طولت ماردت وانا ذبت من البكاء،،، اول ما ردت قعدت انعيط انقوللها تعاليلي ،،، تبي تفهم مني مافهمت شي،، صكرت وانا لميت روحي ونبكي بطني تتقطع ونزيف قوي لين جسمي يرجف ....
بعد قريب الساعه وانا انتمحمس في الوطا والي في بطني نزل،،،نسمع في الباب يخبط بقوه والجرس وسمر اترن فتحت الخط وانا نبكي فهمت ان مافي حد ،، كسر رضا الباب الخلفي لانه لوح ودخلوا،،،جتني سمر تجري لقيتني في حاله مايعلم بيها الا ربي،،،، شالتني للحمام وهيا تبكي وتسأل على نضال مارديت عليها نبكي بس ،،، غسلتلي ع السريع ولبست طلعوني للمستشفى ركبت معاي سمر لاوره انا انعيط وماسكه فيها،،، ورضا يسوق بسرعه مرتبك،، يسالوا على نضال و الاء مارديت حاطه الشال في فمي انصبر في روحي،،،نزلوني للمستشفى على سرير ولدي مات طلعوه مني ميت،، بعدها اغمى عليا .....
فتحت عيوني شفت سمر يالاي تبكي،، حسيت بفراغ في بطني حطيت يدي على بطني ممسوحه كانت بارزه شوي،،، قعدت نبكي ونضرب في بطني سمر تمسكلي في ايديا وانا انخبط وانعيط آخر شي حطيت ايديا على وجي مانبي انشوف شي ،،تعبت من كل شي،،،كرهت كل شي نضال والاء وسوسن الدنيا كلها كرهتهم كلهم،،، بسببهم ولدي مات لرابع مره ننقهر وفرحتي ماتكمل ،،،انا نبكي وسمر تكبي،،، قلتلها: نضال ما جا؟؟
_ تمسح في دموعها اللي ماوقفن : لا مزال
_ مزال معاها صح
_ مع من؟؟
_ مع سوسن
_ لا سوسن عند اختها،،نضال مختفي
قعمزت بصعوبه وانا مستغربه من كلامها قلتلها : كيف مختفي هوا شال سوسن وعدا
امنزله راسها وتبكي بصوت ،،،قلتلها: لقيتوا الاء؟؟
هزت برأسها لا
